Read Timugon Murut JOSUA 16 Bible Online

JOSUA 16 - Timugon Murut bible

JOSUA 16

¹Balitan giu' ra tampilon rabugus ru tana' ondo' tinaakan ra papag ri Jusup tinalimpuun intor ra Sungoi Jordan maar ra Jiriko, giu' ra rondo' intok tampilon ra sirangon taur ru timug Jiriko, saboi ra tana' kaagisan. Balitan raginio tinalimpuun intor ra Jiriko am magaloi ra intok kabuluran saboi ra Bitil.

²Intor ra Bitil balitan raginio saboi ra Lus mansail ra Atarot, intok inayanan ru ulun ru Arki.

³Balitan raginio sumaboi ra tampilon kalasaan, giu' ra intok ru ulun ru Japlit, saboi ra intok Bit-Oron-Rabugus. Intor ra giu' balitan raginio sumaboi ra Gijir, am polos giu' ra Raat Tanga'.

⁴Ginio noyo wilayah ondo' inapu ru papag ri Jusup, iono bansa' ru Ipraim am bansa' ru Manasi Kalasaan, koson ra longgom nilo.

⁵Sumunu' ti ioginio wilayah ondo' inapu ru sasambaloi bansa' ru Ipraim: balitan raginio intor ra Atarot-Adar, sumaboi ra sirangon saboi ra Bit-Oron-Ralayo.

⁶Intor ra giu' balitan raginio sumaboi ra Raat Tanga'. Mikmitat nokosor ra tampilon ralayo ru wilayah no. Intor ra giu', tampilon ra sirangon, balitan lumikou ra tampilon Taanat-Silo. Balitan no mansail ra bandar Taanat-Silo giu' ra tampilon sirangon, am mongoi ra Janoa.

⁷Balitan raginio pana tumuun intor ra Janoa mongoi ra Atarot am Nagarat, saboi ra Jiriko am polos no giu' ra Sungoi Jordan.

⁸Balitan raginio sumaboi ra kalasaan tumalimpuun intor ra Tapua saboi ra Sungoi Kana, am polos giu' ra Raat Tanga'. Ginio noyo tana' ondo' tinaakan ra sasambaloi ru bansa' ru Ipraim koson longgom nilo,

⁹nabaya' ra ngaangai' pekan am ngaangai' kampung ondo' nakasimpung ralalom wilayah Manasi, kaa' ondo' tinaakan ra bansa' ru Ipraim.

¹⁰Kaa' kalo pinagiru' nilo ulun ru Kanaan ondo' minayan giu' ra Gijir. Ginio ra saboi raino ulun ru Kanaan lakat poyo minayan ra gino ngai' ru bansa' ru Ipraim, kaa' jinajalan ilo masauk ra uliponon.