Read Timugon Murut JOSUA 2 Bible Online

JOSUA 2 - Timugon Murut bible

JOSUA 2

¹I Josua pana nangator ra ruo ngaulun pansigo intor ra pangkiman giu' ra Sitim mongoi ra Kanaan. Sinusub ilo maa' raginio lumiput ra tana' ru Kanaan koson mangintutun ra sinokon, mulu' poyo toojo bandar Jiriko. Pakasaboi ilo ra bandar no, minayan ilo ra sangulun ruandu' mantalan ra inan inggalan no i Ragab.

²Binalaan raja' ru Jiriko ra kukula' ngaulun ru Israil minatong rondom raginio koson mansigo ra pagun nano.

³Raja' no pana nanusub ra ulun mambala' ri Ragab, “Ulun giu' ra baloi muno matong koson mansigo ra titikop pagun ti. Ibito' ilo mingkual!”

⁴Taam ri Ragab, “Topot mokoondo' kukula' ngaulun minatong ra baloi kutu, kaa' kalo nakapandai aku ati intor nilo. Minugar ilo paat ra palunggai' ti, ra kalo poyo inangaban kulobon garabang. Kalo nangkuot aku ati angayan nilo kaa' amon ru ilowon ilo ra mataki', marakop ilo.” (Ati ka pinasibuni ri Ragab ruo ngaulun pansigo no giu' rasawat ru taap ru baloi ondo' marata', giu' ragana' ru pupug ru rami, ondo' pinabanta' no ra giu' no.)

⁷Pakaingkual ayuk ulun-ulun sinusub ru raja' intor ra bandar, inangaban kulobon garabang. Naguyum ilo ra ulun-ulun pansigo no saboi ra intok laupan ru Sungoi Jordan.

⁸Ra kalo poyo nombolong ulun-ulun pansigo no ra rondom raginio, nagaloi i Ragab ra taap ru baloi

⁹am indagu risilo, “Nakapandai aku ra nanaak noyo TUHAN ramuyun ra tana' ragitio. Ngaangai' ulun ra pagun ti malaa' ramuyun.

¹⁰Nokorongog akai ra kinapua' ru TUHAN Raat Galaga[1] giu' ra saang min paat akau nangiruan ra Misir. Nokorongog akai niayuk ra namatoi kau ra Raja' Sigon am Raja' Og, ruo ngaulun raja' ru bansa' ru Amori tampilon ra sirangon ru Sungoi Jordan.

¹¹Nangalaa' akai paat akai nokorongog ra baal raginio. Kalio boo kabaanian mai sabap ra akau. TUHAN i Aki Kapuuno' min sotopot no i Aki Kapuuno' ondo' makakuasa' giu' ra limbowon no am ra tana' ti.

¹²Raino pagibot no ralalom inggalan ru TUHAN ra moonsoi pamakuan min ra sasambaloi kuno koson ra moonsoi pamakuan kuno ramuyun. Anii' aku ra rondo' tatandu' ra maintopot maa' raginio mangintopot aku ramuyun.

¹³Bantuo' noyo raki' ra bayagon min matuo kuno am pabukat kuno ra ungkuyon am ruandu', am niayuk ngaangai' sasambaloi nilo. Pai' polosoo' akai potoyon!”

¹⁴Indagu ulun-ulun pansigo no riso, “Polosoon noyo i Aki Kapuuno' mamatoi ramon amon ru kalo suguton mai bantu' maiti.[2] Amon ru kalo mambala' kou ra ulun intor ramon, mambantu' akai ra paat manaak TUHAN ramon ra pagun ti ra maagu no, moonsoi pamakuan mai ramuyun.”

¹⁵Baloi ri Ragab binaal ra timbok ru bandar. Ginio ra pinatuun no ulun-ulun pansigo no namakai ra tali ra liwar ru timbok mansail ra gigimpalan.

¹⁶Indagu i Ragab, “Ongoi no ra intok kabuluran maa' raginio kalo matuum kau ru ulun-ulun sinusub ru raja' no. Pansibuni kau ra giu' no buoi talu ngoorou saboi ulun-ulun sinusub no sumaguli'. Rayusi' min boo pangkiralanan min.”

¹⁷Indagu ulun-ulun pansigo no ri Ragab, “Suguton mai bantu' maiti sumugut ra kitaak muno.

¹⁸Baalo' noyo baal ragitio. Paat bulunsaron mai pagun min, pobongkoso' tali malia' ti ra gigimpalan ru intok napatuunan muno ramon. Timungo' noyo ina' ama' muno, pabukat-pabukat muno am ngaangai' pabukat ru ama' muno ra baloi mutu.

¹⁹Osoi intor risilo ondo' mingkual intor ra baloi ti, patayan nano sala' ka akai ra sala, ginio kasalaan nano galama'. Kaa' amon ru sasangulun ondo' soroi ra baloi mutu mapilatan, akai noyo ondo' mansaan ra kinibit no.

²⁰Kaa' amon ru mambala' kou ra ulun pasal ramon, palabuso' akai intor ra bantu' maiti.”

²¹Nangiou i Ragab ra baal raginio am nanusub risilo mugar. Pakaugar ilo, pobongkoso' no tali malia' no ra gigimpalan nano.

²²Ulun-ulun pansigo no minongoi giu' ra kabuluran am nansibuni ra giu' no. Naguyum ulun-ulun sinusub ru raja' no risilo ra titikop intok liwar ru bandar buoi talu ngoorou, kaa' kalo natuum nilo. Ginio ra siminaguli' ulun sinusub no ra bandar Jiriko.

²³Bagu no ulun-ulun pansigo no timinuun intor ra kabuluran, liminaup ra sungoi, am saguli' ri Josua. Nambala' ilo ri Josua ra ngaangai' ondo' nasauk risilo.

²⁴Indagu ilo boo, “Mangintopot akai ra manaak TUHAN ritakau ra titikop ru pagun no. Ngaangai' mamagun ru pagun no malaa' ritakau.”