Read Timugon Murut JOSUA 6 Bible Online

JOSUA 6 - Timugon Murut bible

JOSUA 6

¹Kulobon garabang ru bandar Jiriko inalungan am inangaban maa' raginio ulun ru Israil kalo makaumpos. Kolondo' sangulun pana makaumpos kapoam makaingkual intor ra bandar no.

²Indagu TUHAN ri Josua, “Pataakon Ku rirun Jiriko am raja' nano am ngaangai' saujor nano ondo' mangapanggol.

³Okou am saujor-saujor muno musiti' mugar lumiput ra bandar no igondo' songorou buoi onom ngoorou.

⁴Tulu' ngaulun imam ondo' sigagama' magibit ra rondo' bujung musiti' mugar giu' ra saang ru Kaban Nabantuan. Paat orou Katulu', okou am saujor-saujor muno musiti' mugar lumiput ra bandar no intulu', liliwa' imam-imam manamput ra bujung.

⁵Mopongo raginio ilo musiti' manamput ra bujung ra bolos ondo' maawar, am morongog min ayuk ginio, ngaangai' ulun musiti' gumolok ra mosongou, am mapuut boo timbok ru bandar no. Paat raginio ngaangai' saujor muno musiti' marayus mumpos ra bandar no.”

⁶Nampiau i Josua ra imam-imam am indagu risilo, “Saani' noyo Kaban Nabantuan, am tulu' ngaulun ramuyun musiti' mugar giu' ra saang no magibit ra bujung.”

⁷Nanusub boo i Josua ra saujor-saujor nano maa' raginio mugar lumiput ra bandar no, siguluin ru sambarisan magalung ru saang ondo' minugar giu' ra saang ru Kaban Nabantuan ru TUHAN.

⁸Koson ra nanusuban ri Josua, magalung ru saang minugar giu' ra saang ru imam-imam ondo' nanamput ra bujung, sinunu' ru imam-imam ondo' nansaan ra Kaban Nabantuan ru TUHAN; am pinupusan ru sambarisan magalung ru tinaulian. Narayus sinamput bujung no.

¹⁰Kaa' nanusub i Josua ra saujor-saujor nano maa' raginio kalo gumolok kapoam mindagu rondo' ragu pana saboi mambala' io risilo.

¹¹Koson raginio noyo i Josua nanusub ra pulalai ru ulun no lumiput ra bandar no igondo' am mansaan ra Kaban Nabantuan ru TUHAN, am saguli' ilo ra pangkiman am nombolong ra giu' no.

¹²Suabon no, riminondom i Josua kiminarat, am koson ra kainduo ru imam-imam am saujor-saujor lumiput ra bandar no maya' ra tinampos paat ra orou kalo poyo raginio: talimpuun no, magalung ra saang; am tulu' ngaulun imam ondo' manamput ra bujung; am imam-imam ondo' nansaan ra Kaban Nabantuan ru TUHAN; am pupus toojo magalung ra tinaulian. Narayus sinamput bujung no.

¹⁴Paat orou karuo no, minugar ilo liminiput ra bandar no igondo' poyo, am saguli' ra pangkiman. Binaal nilo ginio buoi onom ngoorou.

¹⁵Paat ra orou katulu', kiminarat ilo paat sumirang mato ru orou. Minugar ilo liminiput ra bandar no intulu' ra nogondo' binaal. Paat ra orou raginio ayuk, minugar ilo liminiput ra bandar no intulu'.

¹⁶Paat ra kaintulu', paat imam-imam no nanamput ra bujung, nanusub i Josua ra ulun nano gumolok am indagu io, “Pinataak noyo ru TUHAN bandar ti ramuyun!

¹⁷Bandar no am ngaangai' ra giu' no musiti' pusoon lingono' koson taak ra TUHAN. I Ragab ayuk am sasambaloi nano ondo' bayagon, sabap pinasibuni no ulun pansigo takau.

¹⁸Kalo pangalapon kau ra atan pana ondo' musiti' pusoon. Amon ru mangalap kau raginio, maparatong kau ra kapaganan am kapusaan ra pangkiman ru Israil.

¹⁹Ngaangai' kuliamos ondo' binaal intor ra pirok, mas, gangsa' kapoam basi' musiti' pasuayon tayar ru TUHAN. Kuliamos-kuliamos raginio ibiton ra intok pambulian ra rapu' ru TUHAN.”

²⁰Imam-imam no pana nanamput ra bujung. Kaining ayuk ru saujor-saujor ginio, golok ilo ra mosongou, am napuut timbok ru bandar Jiriko. Ngaangai' pulalai ru saujor pana narayus nagaloi ra bandar no, am namulunsar am nampagaau raginio.

²¹Ra ilang, namatoi ilo ra moonong ulun ralalom ru bandar no, ungkuyon am ruandu', ondo' mamulok am ondo' matutuo. Namatoi ilo niayuk ra sapi', domba am kaladai.

²²Indagu i Josua ra ruo ngaulun ondo' ragili nangandoi koson ulun pansigo, “Ongoi noyo ra baloi ru mantalan ra inan no, am ibito' io am sasambaloi nano mingkual koson ondo' binantu' min riso.”

²³Ginio ra ugar ilo nagibit ri Ragab miningkual nababaya' ra ina' ama', pabukat-pabukat, am ngaangai' sasambaloi nano. Binayag nilo ngaangai' ulun no, pabukat ru sasambaloi ri Ragab am poyo ulipon-ulipon nano, am nagibit risilo mongoi ra intok matanda', maar ra pangkiman ru Israil.

²⁴Bagu solobo' nilo bandar no am ngaangai' ondo' soroi ra giu' no saboi mapuso, ondo' ayuk am kuliamos ondo' binaal intor ra mas, pirok, gangsa' am basi'. Nangalap ilo ngaangai' ra kuliamos raginio am inibit ra intok pambulian ra rapu' ru TUHAN.

²⁵Kaa' binayag ri Josua i Ragab, ruandu' mantalan ra inan no am ngaangai' sasambaloi nano sabap binuni no ruo ngaulun pansigo ondo' sinusub ri Josua minongoi ra bandar Jiriko. (Papag ri Ragab minayan ra pagun ru Israil saboi ra orou raiti'.)

²⁶Paat raginio napatanou i Josua ra pangkaraan ragitio, “Osoi ondo' kuminam mambaal saguli' ra bandar Jiriko ulason ru TUHAN. Osoi ondo' mapabanta' ra batu maatang no matatakan ra anak katuaan. Osoi ondo' mambaal ra kulobon garabang no matatakan ra anak pupusan.”

²⁷TUHAN mabaya' ri Josua am masauk io ra mauligan kaga' ra titikop ru pagun no.