Read Timugon Murut JOSUA 8 Bible Online

JOSUA 8 - Timugon Murut bible

JOSUA 8

¹Indagu TUHAN ri Josua, “Ibito' noyo ngaangai' saujor am ongoi ra bandar Ai. Pai' kalaa' kapoam mapalo guang. Taakin Ku ramuyun kamanangan ra raja' Ai; mamagun, bandar am tana' nano masauk ra akau tatangan.

²Baalo' bandar Ai am raja' nano koson ra pinamakuan min ra bandar Jiriko am raja' nano, kaa' raino ti makaalap kau ra rapu' am tinambiag no tayar min galama'. Tampos noyo mongoi bulunsar ra bandar no ra mamulali' intor ra tinaulian.”

³Ginio ra timinampos i Josua am ngaangai' saujor nano koson mongoi ra bandar Ai. Nampili' i Josua ra 30,000 ngaulun intor ra saujor nano ondo' moonsoi kaga' am nanusub risilo mongoi ra rondom ti.

⁴Nanusub i Josua risilo, “Pansibuni giu' ra tinaulian ru bandar no, kaa' pai' najanjayan galur. Tampos noyo ra mamulunsar.

⁵Aku am ulun-ulun kuti minggaar ra bandar no. Paat ra ulun ru Ai mingkual mamulunsar ramon, maruli' akai am magiru' koson ra binaal takau ra kasaa' i.

⁶Mangilou ilo ramon saboi maalur intor ra bandar. Indoson nilo nagiru' akai intor risilo koson binaal takau ragili.

⁷Paat raginio musiti' kau mingkual intor ra pansibunian am mampagaau ra bandar no. Manaak TUHAN i Aki Kapuuno' min ra bandar raginio ramuyun.

⁸Mopongo min magaau bandar no, solobo' bandar no nontopot ra susuban ru TUHAN. Ginio noyo susuban ramuyun.”

⁹I Josua pana nanusub risilo mugar; ongoi ilo ra intok pansibunian am naginaa ra giu' no. Intok no giu' ra tampilon kalasaan ru Ai, nangkilolot ra Ai am Bitil. Nombolong i Josua rondom raginio giu' ra pangkiman.

¹⁰Orou ra suabon no, i Josua kiminarat mataki' am nampiau ra saujor timinimung. I Josua pana am tingganai-tingganai ru ulun ru Israil naningganai ra pulalai ru saujor no mongoi ra bandar Ai.

¹¹Saujor-saujor ondo' nabaya' ri Josua minongoi ra kulobon garabang ru bandar am nangkim tampilon ra ralayo; mokoondo' limayak nangkilolot risilo am bandar Ai.

¹²Nagibit i Josua olo'-olo' 5,000 ngaulun am nanusub risilo nansibuni tampilon ra kalasaan ru bandar no, nangkilolot ra Ai am Bitil.

¹³Saujor no sinusub mangayou maya' ra tinampos ragitio: pulalai maatang soroi ra tampilon ralayo ru bandar am ondo' bokon no giu' ra tampilon kalasaan. I Josua galama' nombolong rondom raginio giu' ra limayak no.

¹⁴Paat ra raja' ru bandar Ai nakakito ra saujor-saujor ri Josua, imbuor io ra mataki'. Raja' am ngaangai' ulun nano minongoi ra tampilon Limayak Jordan koson mangayou ra saujor ru Israil giu' ra intok nangayawan ragili. Kalo nakapandai raja' ra bulunsaron io intor ra tinaulian.

¹⁵I Josua am ulun-ulun nano ilain ayuk koson liminugut am nagiru' tampilon ra tana' mapua'.

¹⁶Ngaangai' ungkuyon giu' ra bandar Ai tinimung koson nangilou ri Josua am ulun-ulun nano. Tatanga' ilo nangilou ri Josua, nakainggalur ilo poyo ra bandar Ai.

¹⁷Ngaangai' ungkuyon intor ra bandar Ai[5] nangilou ra ulun ru Israil, saboi bandar no nokoloso naukab am kalo naalungan. Kolondo' sangulun pana ondo' nagalung ra bandar no.

¹⁸TUHAN pana mindagu ri Josua, “Patuluo' tutura' muno tampilon ra bandar Ai; pataakin Ku rirun ra bandar no.” Baalo' boo ri Josua ginio.

¹⁹Pakakakat ayuk ri Josua kalindu' nano, saujor-saujor ondo' nansibuni mataki' miningkakat, am pasimbul minongoi ra bandar no am pamulunsar. Ginaau nilo bandar no am rayuso' nonolob raginio.

²⁰Paat ulun ru Ai nangkaili ra tinaulian, nakito nilo lisun makapal mininsawat. Kalo nakapagiru' ilo sabap ra ulun ru Israil ondo' nagiru' tampilon ra tana' mapua' ra raitii' ni, riminuli' boo am namulunsar risilo.

²¹Paat nakito ri Josua am ulun-ulun nano ra pulalai ra bokon nampagaau noyo ra bandar no am nonolob raginio, naruli' ilo am tumalimpuun mamatoi ra ulun ru Ai.

²²Ulun ru Israil ondo' giu' ra bandar no pana minatong am minaya' niayuk pamulunsar risilo. Ginio ra ulun ru Ai inawangan ru ulun ru Israil, am ngaangai' ulun Ai pinatoi. Kolondo' sangulun pana nakapagiru' am kolondo' osoi pana naayag

²³ondo' ayuk am raja' Ai. Rinakop io am inibit pinauma' ri Josua.

²⁴Ngaangai' ulun ru Israil namatoi ra ngaangai' pantula' nilo giu' ra tana' mapua'. Ulun ru Israil pana siminaguli' ra bandar Ai am namatoi ra ngaangai' ulun ra giu' no.

²⁵Narayus i Josua napatulu' ra tutura' nano tampilon ra Ai am kalo pinatuun kalindu' nano saboi ngaangai' ulun giu' ra bandar no pinatoi. Ngaangai' mamagun ru Ai pinatoi paat orou raginio; suang ru ngaangai' no 12,000 ngaulun ungkuyon am ruandu'.

²⁷Nambuli ulun ru Israil ra bibiag tinambiag am kuliamos ginaau intor ra bandar no tayar nilo galama', sumugut ra susuban ru TUHAN ri Josua.

²⁸Nonolob i Josua ra bandar Ai am nompoloso raginio nasauk nangatuyas. Baal ru bandar no lakat poyo koson raginio saboi ra orou raiti'.

²⁹I Josua nampatair ra raja' ru Ai ra sampuun tataun am baangkai no pinoloso ra giu' no saboi mamai'. Paat tumolop mato ru orou, nanusub i Josua ra ulun koson napatuun ra baangkai no am namatir raginio giu' ra saang ru kulobon garabang ru bandar. Pinumpunan nilo baangkai no ra batu saboi nasauk ra rondo' pumpun maayo; batu-batu no lakat poyo soroi ra giu' no saboi ra orou raiti'.

³⁰I Josua pana nambaal ra rondo' altar ru TUHAN i Aki Kapuuno' ru Israil giu' ra Gunung Ibal.

³¹Nambaal io raginio sumugut ra tulu' ondo' tinaakan ri Musa, ulipon ru TUHAN no ra ulun ru Israil, koson ondo' tinulisan ralalom Ukum ri Musa, “rondo' altar ondo' baalon intor ra batu-batu ondo' kalo pinaat ra kuliamos ru basi'.” Napataak ilo ra taak simbalui koson mapabansuk ra guang ru TUHAN[6] am taak simbalui koson makibarakat ra TUHAN[7] giu' rasawat ru altar no.

³²Ra giu' no, ra saang ru ulun ru Israil, nanulis i Josua ra batu ru altar-altar no[8] ra ralin ru Ukum ondo' tinulisan ri Musa.

³³Ulun ru Israil nababaya' ra tingganai-tingganai, pagawai-pagawai am akim-akim nilo, am niayuk ulun bansa' ru bokon ondo' minayan risilo, minigor ra karuo-ruo sapapa' ru Kaban Nabantuan. Timiningkuang ilo ra imam-imam bansa' ru Liwi ondo' nansaan ra Kaban no. Sampiruo intor ra ulun ru Israil timiningkuang ra Gunung Girijim am sampiruo poyo timiningkuang ra Gunung Ibal. I Musa, ulipon ru TUHAN nanaak noyo risilo ra susuban koson mambaal raginio masaboi paat ra ilo barakaton.

³⁴I Josua pana nambasa' ra ngaangai' Ukum no ra mosongou, nakaaya' ngaangai' barakat am ulas nano, totopot koson ra tinulisan ralalom Kitab ru Ukum.

³⁵Moonong susuban ri Musa binasa' ri Josua ra saang ru ngaangai' ulun, nakaaya' bala ruandu' am lalaing, am niayuk ulun bansa' ru bokon ondo' minayan risilo.