Read Timugon Murut JOSUA 9 Bible Online

JOSUA 9 - Timugon Murut bible

JOSUA 9

¹Tanou ra namanangan ru ulun ru Israil norongog ru ngaangai' raja' ru pagun tampilon ra kalasaan ru Sungoi Jordan: giu' ra kabuluran, giu' ra ragana' ru bulur, am giu' ra igig ru tampilon ra nagas ru Raat Tanga', saboi ra Libanon giu' tampilon ra ralayo. Ilo noyo raja' ru ulun ru Git, Amori, Kanaan, Piris, Giwi am Jibusi.

²Raja'-raja' no naguguum am nagamung koson manggal ri Josua am ulun ru Israil.

³Kaa' mamagun ru Gibion, iono ulun ru Giwi, nokorongog ra atan ondo' binaal ri Josua ra bandar Jiriko am Ai.

⁴Ginio ra nangatang ilo koson mamparuung ri Josua. Nangalap ilo ra akanon am posokoyo' ra kaladai-kaladai nilo karung mangalaat am kantungan ru kungkung ondo' tinombong.

⁵Nangkasut ilo ra lairon ondo' tinombong am nambayang ra nangarilak. Nagibit ilo ra ruti' ondo' mapua' am nangkulapuk.

⁶Ongoi ilo boo ra pangkiman giu' ra Gilgal am minindagu ri Josua am niayuk ulun ru Israil, “Minatong akai intor ra pagun maalur. Pambaal noyo ra nabantuan ramon.”

⁷Kaa' indagu ulun ru Israil, “Kua pambaal akai ra nabantuan ramuyun? Maaru' lair ru minayan kau ra mamaar ti!”

⁸Indagu ilo ri Josua, “Akai ti ulipon mu.” Kuati' ri Josua ilo, “Osoi kau? Ati intor min?”

⁹Ilo pana nantunung ragitio, “Tuan, intor akai ti ra pagun ondo' maalur kaga'. Minatong akai sabap nokorongog ra TUHAN i Aki Kapuuno' muno. Nokorongog akai ra ngaangai' ondo' binaal Nano giu' ra Misir,

¹⁰am atan ondo' binaal Nano ra ruo ngaulun raja' ru Amori tampilon ra sirangon ru Sungoi Jordan: Raja' Sigon namarinta ra Gisybon am Raja' Og namarinta ra Basan ondo' minayan giu' ra Asytarot.

¹¹Tingganai maino am ngaangai' mamagun ru pagun mai nanusub ramon nagibit ra akanon am minugar tumuum rirun. Sinusub akai masauk ra ulipon muno am nakitaak maa' raginio makimabantu' kou ramon.

¹²Ilai' ruti' maiti. Paat akai minintor mongoi uma' rirun, lakat poyo malasu' ruti' ti. Kaa' raino ilai' noyo! Mapua' noyo kaga' ruti' ti am nangkulapuk.

¹³Paat mai sinuangan kantungan-kantungan ru kungkung, ngaangai' lakat poyo baguon. Kaa' raino ilai' noyo! Ngaangai' no nangarilak noyo. Bayang am kasut mai pana mangalaat noyo sabap ra pangkiralanan ondo' maalur.”

¹⁴Inapu ru ulun ru Israil akanon ondo' pinataak nilo, kaa' kalo nakitaak ra panuluan intor ra TUHAN.

¹⁵Nakimabantu' i Josua ra nabantuan pabansayan ra ngaangai' ulun ru Gibion no am nambantu' ra kalo mamatoi risilo. Nagibot ulun ru Israil koson mampaguut ra nabantuan no.

¹⁶Talu ngoorou nalupus binaal nabantuan no, nakapandai ulun ru Israil ra ngaangai' ru ulun no sotopot no minayan kalo maalur intor ra giu' no.

¹⁷Ginio ra ugar ulun ru Israil am nalupus talu ngoorou nakasaboi ilo ra bandar ru ngaangai' ulun no: bandar Gibion, Kipira, Biirot am Kiryat-Jiarim.

¹⁸Kaa' kalo nakapamatoi ulun ru Israil risilo sabap tingganai-tingganai ru Israil nakapagibot noyo risilo ra sabap ra TUHAN i Aki Kapuuno' ru Israil. Nambutok ngaangai' ulun ru Israil ra tingganai-tingganai nilo

¹⁹ra baal raginio kaa' taam tingganai-tingganai no, “Nakapagibot akai noyo risilo sabap ra TUHAN i Aki Kapuuno' ru Israil. Ginio ra kalo makapamilat takau risilo.

²⁰Musiti' takau polosoon ilo maayag sabap ra nabantuan takano; amon kalo, mangukum i Aki Kapuuno' ritakau.

²¹Polosoon ilo maayag kaa' musiti' ilo mangapak ra luton am mansagou ra timug ritakau.” Ginii noyo inatang ru tingganai-tingganai no.

²²Nanusub i Josua ra ulun ru Gibion muma' am nangkuot risilo, “Kua pamparuung kau ramon am minindagu ra minatong kau intor ra maalur, ati ka minayan kau ra mamaar ti?

²³Sabap ra ruung no inukum kau ri Aki Kapuuno'. Ulun mino magail masauk ra uliponon. Musiti' kau mangapak ra luton am mansagou ra timug tayar ru baloi ri Aki Kapuuno' kuno.”

²⁴Taam ulun Gibion, “Tuan, binaal mai koson raginio sabap nokorongog akai ra sotopot no TUHAN i Aki Kapuuno' muno namarinta ra ulipon nano i Musa koson manaak ra ngaangai' tana' ti rirun, am niayuk mamatoi ra mamagun nano paat okou mangayou. Binaal mai koson raginio sabap malaa' akai rirun; malaa' akai potoyon.

²⁵Kaa' raino ralalom akai ru kuasa' muno; pamakuan ramon sumugut ra karaan muno ra moonsoi.”

²⁶Ginio ra nangampin i Josua risilo am kalo nangiou ra ulun ru Israil mamatoi risilo.

²⁷Kaa' i Josua nampasauk ra ulun ru Gibion ra uliponon. Musiti' ilo mangapak ra luton am mansagou ra timug tayar ru ulun ru Israil am tayar altar ru TUHAN. Saboi ra orou raiti' lakat poyo ilo mambaal ra kandoi no giu' intok ondo' pinili' ru TUHAN koson intok sumambayang Riso.