Read Timugon Murut 2 TISALONIKA 1 Bible Online

2 TISALONIKA 1 - Timugon Murut bible

2 TISALONIKA 1

¹Aku i Paulus, mabaya' ri Silas am i Timotius. Surat ti posoboyon ra pasimpungan ulun Kristian ra bandar Tisalonika, ulun kau ri Aki Kapuuno', Ama' takau, am poyo ulun kau ru Tuhan Jisus Kristus:

²Gama' ru i Aki Kapuuno', Ama' takau am i Tuhan Jisus Kristus manaak ramuyun ra barakat am pabansayan.

³Pabukat ku ngai', musiti' akai masalok maringkuanang ri Aki Kapuuno' sabap ra akau. Am ginio noyo maaru' baalon mai, sabap ra mulu' poyo boo akau mangintopot ri Kristus am togom maayo min ra ulun bokon.

⁴Ginio ra akai galama' maansukan mantunung ra pasimpungan ulun Kristian no ra ati kulaan kinaikang ru pangintapatan mino ri Kristus paat ra maimbolo' am mapagon ondo' malimanan min.

⁵Am gitio noyo kakitanan ra kinabanis ru pangakiman ri Aki Kapuuno': Ra naimbolo' kano sabap ra pangintapatan min Riso, paayaan kau makaliman ra Tana' Bagu ri Aki Kapuuno'.[1]

⁶Mabanis baalon ri Aki Kapuuno'. Mambalos Io ra ulun ondo' mangimbolo' ramuyun no.

⁷Am poyo mangani' Io ra katasuan ramuyun ondo' raino ti imboloon, mogondo' niayuk ramon. Gitio saukon Nano paat ra Tuhan Jisus mintalang intor ra suruga' mabaya' ra malaikat mangaikang Nano,

⁸am mabaya' ra simbula' ru apui. Mangukum Io ra ulun ondo' kalo masaga' mintutun ri Aki Kapuuno' am ondo' kalo gumagaya' ra Tanou Moonsoi ri Jisus, Tuhan takau.

⁹Ukumin ilo ra kapatayan mantilayun, pasuayon ilo intor ra Tuhan am intor ra kuasa' matulai Nano.

¹⁰Paat ra Orou ratangan Nano katulayon Io ru ngaangai' ulun Nano, am urumaton Io ru ngaangai' ulun ondo' mangintopot Riso. Akau pana makasimpung risilo, sabap ra nangintopot kano ra tanou ondo' pinasaboi maili.

¹¹Ginio sabap ra masalok makiasi' akai ri Aki Kapuuno' koson mampasauk ramuyun ra ulun ondo' maaya' ra pampiawan Nano. Gama' ru mabaya' ra kuasa' Nano, i Aki Kapuuno' makasauk ra kasagaan min mambaal ra moonsoi am mampaukop ra ngaangai' kinapirot ru pangintapatan min.

¹²Maa' boo raginio inggalan ru Tuhan takau, i Jisus, katulayon min am akau pana katulayon No, mabaya' ra kataawan ri Aki Kapuuno' takau am ru Tuhan Jisus Kristus.[2]