Read Timugon Murut 2 TIMOTIUS 1 Bible Online

2 TIMOTIUS 1 - Timugon Murut bible

2 TIMOTIUS 1

¹Aku i Paulus ondo' sinauk ri Aki Kapuuno' ra sangulun rasul ri Jisus Kristus, koson mampatanou ra kaayagan ondo' binantu' ri Aki Kapuuno', ioginio pasimpungan takau ri Jisus Kristus.

²Timotius, ondo' tagamin kuno: Gama' ru i Aki Kapuuno', Ama' takau am i Jisus Kristus, Tuhan takau manaak rirun ra barakat, asi' am pabansayan.

³Maringkuanang aku ri Aki Kapuuno' ondo' sinugut kuno mabaya' ra guang mapasau, mogondo' ra kinamatuaan kuno. Orou-rondom niayuk masalok aku mangkara' rirun ralalom moonong pakiasian kuno.

⁴Makakara' aku ayuk ra kalumpusan ru guang muli am ginio boo ra aku masaga' toojo mongoi tuum rirun, maa' raginio maansukan aku toojo.

⁵Makakara' aku poyo ra pangintapatan muno ondo' mabanis, mogondo' ra pangintapatan ru aru' muno i Lois am niayuk ina' mu i Unis. Nakatainu aku ra okou pana mangintopot mogondo' risilo.

⁶Ginio sabap ra mampakara' aku rirun ra rayuso' noyo kandoi tinaakan ri Aki Kapuuno' rirun paat ra aku napabanta' ra kalindu' kuno ra ulu muli.

⁷Sabap ra pai' ru Ambiluo ri Aki Kapuuno' magibit ra guang takau malaa', kaa' sotopot no mangani' io ritakau ra kaikangan, togom am kinataan ru guang.

⁸Ginio nai ra pai' kauyu' mapabala' intor ra sauk ru Tuhan takau am pai' niayuk kauyu' sabap ra aku ondo' inaput ti sabap ri Kristus. Kaa' sotopot no, maya' ra kaikangan intor ri Aki Kapuuno', musiti' kou maya' maimbolo' sabap ra papasabayan ru Tanou Moonsoi no.

⁹I Aki Kapuuno' nampakaayag am nampiau ritakau maa' raginio gumagaya' toojo Riso. Am gitio sala' ka intor ra atan ondo' binaal takau ra moonsoi, kaa' sotopot no sabap ra pangatangan am kataawan Nano galama'. Am ginio sinauk Nano sabap ri Jisus Kristus ra kalo poyo tana' ti biningkal,

¹⁰kaa' raino bagu pinaintalang mansail ra ratangan ru Mamamayag takau, i Jisus Kristus. Io no namandak ra kuasa' ru kapatayan ondo' manguasa' ra ngaangai' ulun am nagibit ra kaayagan mantilayun mansail ra Tanou Moonsoi ti.

¹¹Sinauk aku ri Aki Kapuuno' ra sangulun rasul am mangingila', koson mampasaboi ra Tanou Moonsoi ti.

¹²Ginio boo puun ru aku maimbolo' ra ngaangai' ti, kaa' kalo lumawo pangintapatan kuno sabap ra naintutunan ku toojo osoi Io ondo' inintopot kuli. Am mangintopot aku toojo ra mampalayun Io ra kandoi ondo' pinalansan Nano raki' i,[1] saboi ra Orou Pupus no.

¹³Guuto' noyo pangilaan motopot ondo' inila' kuli rirun koson alapon mu ra tiluan. Pasingkotogo' noyo pangintapatan am togom ondo' intor ra pasimpungan takau ri Jisus Kristus i.

¹⁴Mabaya' ra indangan ru Ambiluo ri Aki Kapuuno' ondo' maayag ra ralalom takau, rayuso' noyo toojo kandoi moonsoi ondo' pinalansan rirun.

¹⁵Nakaintutun kou noyo ra ngaangai' ulun ru pagun Asia nangiruan raki', am nakaaya' niayuk i Pigilus am i Irmoginis.

¹⁶Gama' ru Tuhan mangani' ra asi' Nano ri Onisiporus ilo sambaloi, sabap ra ingkukula' io no napabansuk ra guang kutu. Io kalo mauyu' raki' kabalu' ra aku inaput.

¹⁷Pakasuku' io ayuk ra bandar Roma, mapirot io naguyum raki' saboi nakatuum.

¹⁸Okou galama' noyo nakapandai ra ingkukula' io no nangindangan raki' giu' ra bandar Ipisus. Gama' ru Tuhan mangani' riso ra asi' paat ra Orou Pupus no.