Read Timugon Murut 2 TIMOTIUS 4 Bible Online

2 TIMOTIUS 4 - Timugon Murut bible

2 TIMOTIUS 4

¹I Jisus Kristus matong poyo saguli' mongoi pangukum ra ulun maayag am ulun ondo' namagatoi noyo. Io ti matong mamarinta koson ra raja'. Ralalom inggalan Nano am poyo ri Aki Kapuuno', gitio kitaakon kutu toojo rirun;

²kasalok no makatampos mampabala' ra Tanou Moonsoi ra apuon kia ru ulun kapoam kalo. Painonoo' noyo ulun no, sawayo' amon ru makasala am paikango' ilo po. Ilaa' ilo toojo mabaya' ra kaaratan ru guang muno.

³Sabap ra masuku' paat nano ra kalo boo masaga' ulun mangapu ra pangilaan motopot. Kaa' sotopot no maya' ilo boo ra kasagaan ru guang nilo galama' am mampalulur ilo boo ra masuang mangingila' ondo' masaga' mangila' ra atan ondo' sumangut ra guang nilai.

⁴Kalo boo mangkirongog ilo ra ondo' motopot no, kaa' mangkirongog boo ra ondo' tutunungon ra binaal-baal ayuk.

⁵Kabalu' koson raginio, okou Timotius musiti' guangon mu toojo atan ayuk ondo' baalon muno. Oroton ayuk ra okou imboloon. Paugaro' noyo kandoi muno koson mampasaboi ra Tanou Moonsoi ti am pongoono' noyo ngaangai' ondo' pinalansan rirun koson ra sangulun ulipon ri Aki Kapuuno'.

⁶Kaa' koson raki' ti, maar noyo aku simbaluyon pataakin ri Aki Kapuuno'. Kalo boo mabuoi aku mangiruan ra tana' ti.

⁷Siminingkotog aku no koson sangulun masisimbul am nakasuku' aku no ra pamupusan, am pinongo ku[4] ngaangai' kandoi ondo' pinalansan raki'.

⁸Am raino, taak kamanangan maginaa noyo raki'. Tuhan ondo' mangakim ra motopot, mangani' raki' ra taak ti paat ra Orou Pupus no. Pai' ru aku ayuk ondo' mokoowot raginio, kaa' ngaangai' ulun ondo' magiginaa ra ratangan Nano.

⁹Kinam no toojo ongoi raki' ra mataki',

¹⁰sabap ra nanatang noyo i Dimas raki' sabap ra nampakaatang io ra kaayagan ru tana' ti. Minongoi io noyo ra bandar Tisalonika. I Kriskis pana minongoi noyo giu' ra libung Galatia am i Titus poyo minongoi giu' ra libung Dalmatia.

¹¹Sangulun ayuk i Lukas rangan kutu ragiti. Ongoyo' raki' alapo' i Markus am paayaan mu io, sabap ra makapangindangan io ra kandoi kutu.

¹²Pinoongoi ku noyo i Tikikus giu' ra bandar Ipisus.

¹³Paat ra okou matong ragiti, ibito' raki' sukub kuli ondo' tinatang ku giu' ra bandar Troas, intok ri Karpus. Ibito' niayuk raki' naskhah rinulun kuli, mulu' poyo ondo' binaal intor ra kungkung i.

¹⁴I Aliksandir ondo' manukang ra basi' no, masuang kalaatan nano raki'. Kaa' Tuhan mambalos riso maya' ra kalaatan ondo' binaal nano.

¹⁵Ilalain mu io ti, sabap ra anggalon no toojo pangilaan takati.

¹⁶Paat ra aku binisara' ra kasaa' i, kolondo' sangulun kon pana nangindangan raki'. Ngaangai' boo nangiruan raki'. Gama' ru i Aki Kapuuno' kalo noyo mampakasala risilo ra baal ragitio.

¹⁷Kaa' Tuhan noyo ondo' nangampin raki' am nampaikang raki' saboi naalap ku mampabala' ra ngaangai' ru Tanou Moonsoi no, suku' maining boo ru ulun sala' ka Jaudi. Ginio ra pinalabus aku niayuk intor ra potoyon raan.

¹⁸Mampainggalur niayuk Tuhan raki' ra moonong kalaatan am magibit Io raki' ra pamarintaan Nano ra suruga' mabaya' ra kaansukan. Katulayon Io ayuk suku' ra sabuoi-buoi no! Amin.

¹⁹Mampasaboi aku ra bilin kaansayan kuno ri Priskila am i Akwila am i Onisiporus ilo sambaloi.

²⁰I Irastus timinatang giu' ra bandar Korintus, kaa' i Tropimus pinatatang ku giu' ra Militus sabap ra narualan io.

²¹Kinam no ongoi raki' ra mataki' ra kalo poyo bulintok masimu'. I Ibulus, Pudis, Linus am poyo i Klaudia mampasaboi ra bilin kaansayan rirun, koson niayuk ra ngaangai' pabukat ra Kristian ragiti.

²²Gama' ru Tuhan mabaya' rirun. Gama' ru i Aki Kapuuno' mambarakat ramuyun ngaangai'.