Read Timugon Murut TITUS 1 Bible Online

TITUS 1 - Timugon Murut bible

TITUS 1

¹Aku i Paulus mamatik ra surat ti koson sangulun ulipon ri Aki Kapuuno' am sangulun rasul ri Jisus Kristus. Aku pinili' koson mampaingkotog ra pangintapatan ru ulun pinili' ri Aki Kapuuno' am mampaintutun risilo ra pangilaan motopot sumugut ra ugama takau.

²Pangilaan raginio noyo puun ru kalansanan takau ra mokoowot takau ra kaayagan mantilayun ondo' binantu' ri Aki Kapuuno' ra kalo poyo tana' ti biningkal. Kalo noyo magabau i Aki Kapuuno'.

³Paat ra inaru' i, pinaintalang ri Aki Kapuuno' ra bala' Nano ralalom ru Tanou Moonsoi ti. Pampatanawan ragitio noyo pinalansan raki' am posoboyon ku noyo maya' ra susuban ri Aki Kapuuno', Mamamayag takau.

⁴Titus, pinakaanak tokou niayuk sabap ra mogondo' ayuk pangintapatan tati. Gama' ru i Aki Kapuuno', Ama' takau am i Jisus Kristus, Mamamayag takau, manaak rirun ra barakat am pabansayan Nano.

⁵Gitio noyo ra aku nanatang rirun ra Krita, maa' raginio mokopongo kou ra kandoi ondo' kalo poyo nopongo tali am mampasauk ra tingganai ru pasimpungan ulun Kristian ra tukir-tukir pamagunan ra giu'. Karaa' noyo nambilinan kuli rirun:

⁶Sangulun tingganai no musiti' kolondo' sala; musiti' sangulun ayuk andu' nano,[1] am anak-anak nano pana musiti' mangintopot ri Kristus am kalo niayuk kauligan ilo ra maanggal-anggal kapoam mailo balain.

⁷Sangulun tingganai musiti' kolondo' sala sabap ra mangatang io ra kandoi ri Aki Kapuuno'. Kalo noyo io minsawat guang, kalo mataki' malasu' guang kapoam gagaukon, am poyo kalo maangkol-angkol kapoam maringkumaa' ra kalangkayaan ru tana' ti.

⁸Kaa' sotopot no, musiti' io ti sangulun ondo' mataau mangapu ra tambului am maansayan mambaal ra motopot. Musiti' io mataan guang, mabanis guang, gumagaya' toojo ri Aki Kapuuno' am niayuk matanda'.

⁹Io ti poyo musiti' mangintopot toojo ra bala' ondo' malansanan am ondo' naila' noyo riso. Maa' raginio makapangikang io ra guang ru ulun bokon-bokon no mimaya' ra pangilaan motopot am poyo makapampainono' ra kasalaan ru ulun-ulun ondo' manggal no.

¹⁰Ginio maaru' baalon no sabap ra mokoondo' masuang ulun ondo' masaga' ayuk manggal am ragu nilai pana kolondo' onong; mulu' poyo ulun ru Jaudi ondo' nangintopot ri Kristus.

¹¹Moonsoi sonsongon kabang nilai no, sabap ra mampakalayau ilo ra sasambaloi ra pangilaan nilai ra kalo motopot ti. Baal nilo ti makauyuyu' toojo sabap ra maguyum ilo ayuk ra panginduitan galama'.

¹²Nakaili' niayuk sangulun nabi nilo galama' minindagu ra: “Ulun ru Krita masalok maabau-abau, malaat ilo kaga' koson ra bibiag masigo, moroot kaga' am mangatiar toojo.”

¹³Motopot tupo kaintutunan nali. Ginio sabap ra sawayo' noyo toojo ilo, maa' raginio pangintapatan nilai ti kalo makalayau.

¹⁴Am kalo boo makaaya' ilo ra pangilaan ru ugama Jaudi kapoam tutunungon ondo' binaal ayuk ru ulun ondo' timinalikur intor ra pangilaan motopot.[2]

¹⁵Ngaangai' niayuk karaan mapasau ru ulun ondo' mapasau guang, kaa' kolondo' rondo' pana karaan mapasau ru ulun ondo' malaat guang am kolondo' pangintapatan. Sabap ra pangkaraan am bolos ru guang nilo malaat ayuk.

¹⁶Migiangku ilo ra mangintopot kon ri Aki Kapuuno', kaa' naimumuyan boo intor ra baal nilo ra kalo noyo mangintopot ilo. Mangalaat ilo kaga', kalo gumagaya' ri Aki Kapuuno' am kalo makaangun ra baal moonsoi.