Read Timugon Murut TITUS 2 Bible Online

TITUS 2 - Timugon Murut bible

TITUS 2

¹Kaa' okou Titus, musiti' kou mangila' ayuk ondo' mimpuun ra pangilaan motopot.

²Ragui' noyo ungkuyon matutuo maa' raginio mapintar, tumanda' am mongorot. Musiti' ilo ti mangintopot ra Kristus, motogom am poyo mataan guang.

³Ragui' niayuk ruandu' matutuo rati ra tumanda' ilo sumugut ra tiluan ru sangulun ondo' mapasau. Kalo noyo mansunur ra bokon kapoam gagaukon, kaa' makapangila' poyo ra moonsoi,

⁴maa' raginio makapangila' ilo ra ruandu' mangamulok ra ati kulaan tumogom ra ralaki am niayuk anak nilai no,

⁵mongorot am mapasau guang, am mapandai mampaugar ra kandoi nilo koson sangulun andu' ondo' mampagagaya' ra ralaki nano. Maa' raginio kolondo' sangulun pana makapagasab ra bala' ri Aki Kapuuno'.

⁶Ragui' niayuk tuu'-bagu koson ilo ti pana mapandai mongorot.

⁷Ralalom ngaangai' baal okou musiti' masauk ra tiluan moonsoi toojo am pangilaan muno pana musiti' mabanis am mapirot.

⁸Raguo' noyo pangilaan motopot ayuk ondo' kalo mauwan ru ulun, maa' raginio pantula' muno mangauyu' sabap ra kolondo' rondo' pana panguwan ritakau.

⁹Ragui' niayuk ulipon-ulipon ra gagayaan nilo toojo tuan nilai no, am poyo katasuon nilo guang ru tuan nilai ralalom ru ngaangai' baal.

¹⁰Kalo noyo manggal kapoam mantakou intor risilo. Kaa' sotopot no, musiti' ilo mabanis guang am mampagagaya'. Maa' raginio, ralalom ru ngaangai' baalon nilo, pangilaan ri Aki Kapuuno', Mamamayag takau, omporon ru ulun.

¹¹Sabap ra nampaintalang noyo i Aki Kapuuno' ra kataawan Nano koson ra pamayagan ru ngaangai' ulun.

¹²Am ginio noyo makapanulu' ritakau mangulau ra kaayagan ondo' kalo sumugut ra kasagaan Nano, ioginio kasagaan ru tana' ti. Maa' raginio mabanis guang am mongorot takau am makapampagagaya' takau toojo ri Aki Kapuuno' ra tana' ti.

¹³Raino ti magiginaa takau ra Orou Kalansanan takau, ioginio papaintalangan ru katulayan ru Tuhan ondo' Maayo Kaga' Kuasa', i Jisus Kristus, Mamamayag takau.[3]

¹⁴Pinataak No painawo Nano, maa' raginio makapamayag Io ritakau am mampainggalur ritakau intor ra nansalinut kalaatan am makapagibit ritakau masauk ra ulun Nano ondo' mirot poyo mambaal ra kandoi moonsoi.

¹⁵Ilaa' noyo ngaangai' raginio mabaya' ra paningganayan muno ra okou mampaikang ra guang kapoam mansawai risilo ondo' mangkirongog rirun no. Pai' polosoo' osoi ayuk pana intor risilo magasab rirun.