Read Timugon Murut TITUS 3 Bible Online

TITUS 3 - Timugon Murut bible

TITUS 3

¹Pakaraa' noyo ulun muno ondo' mangintopot no ra gumagaya' ra tingganai am pamarinta no, koson masaga' toojo mambaal ra atan ayuk kandoi moonsoi.

²Ragui' ilo no ra pai' pangalimut kapoam pakimansangor, kaa' masalok masamba am molomoi ra ngaangai' ulun.

³Itakau pana galama' ragili sasambungon, maanggal-anggal am makasala. Inulipon takau ru nansalinut kalaayan am kasagaan ru guang saboi kaayagan takali napanu' ra solon am ingot. Ulun nasisang ritakau am itakau pana galama' nasisang niayuk risilo.

⁴Kaa' paat i Aki Kapuuno', Mamamayag takau, nampaintalang ra kataawan ru togom Nano,

⁵namayag Io ritakau. Ginio pai' ru intor ra binaal takau ra moonsoi, kaa' intor ra asi' Nano galama'. Mamayag i Aki Kapuuno' ritakau mansail ra Ambiluo Nano, bagu inanak takau saguli' am inanian No itakau ra kaayagan bagu mansail ra pampariwan.

⁶Intor ra kinataau Nano, pinataak ri Aki Kapuuno' Ambiluo Nano mansail ri Jisus Kristus, Mamamayag takau.

⁷Bagu, intor ra kataawan Nano mobonsoi takau saguli' ri Aki Kapuuno' am poyo mokoowot takau ra kaayagan mantilayun ondo' lansanin takau raino.

⁸Motopot ragu raginii. Masaga' aku ra mampakaatang kou toojo ra kaintutunan raginio, maa' raginio ilo ondo' mangintopot ri Aki Kapuuno' makapambaal ra kandoi moonsoi. Ngaangai' ti moonsoi toojo am mokoonong ra ngaangai' ulun.

⁹Kaa' inggaluri' noyo pantataaman ra kolondo' onong, tutunungon ondo' binaal-baal ayuk ru ulun, pangayawan am pansasangaran intor ra Ukum ri Musa. Sabap raginio ngai' kolondo' onong kapoam ampos no.

¹⁰Moonsoi ru induain mu mansawai ra ulun ondo' mangkinibit ra pantutuliaran ra pasimpungan ulun Kristian. Am amon ru kalo niayuk gumagaya' io, pai' noyo pakimanrangan riso.

¹¹Napandayan mu noyo ra ulun koson raginio malaat am tula nano noyo tatandu' ra io ti makasala.

¹²Paat ra poongoyon ku i Artimas kapoam i Tikikus rirun, kinam ongoi uma' raki' ra bandar Nikopolis. Sabap ra ginuang ku noyo ra bulintok ra masimu', masaga' aku mayan ra giu' no.

¹³Pirot kono toojo pamintor ri Jinas, peguam i am niayuk i Apolos. Am ilain mu toojo ra mokoondo' ngaangai' ondo' maatang ibiton nilo.

¹⁴Ulun takau musiti' migigila' ati kulaan mambaal ra moonsoi. Ginio makapangindangan toojo ra ulun ondo' kolondo' kaukapan am mambaal ra kaayagan nilo pana makaampos.

¹⁵Ngaangai' ulun ragiti mampasaboi ra bilin kaansayan rirun. Am posoboyo' niayuk bilin kaansayan mai ra ngaangai' pabukat Kristian. Gama' ru i Aki Kapuuno' mambarakat ramuyun ngaangai'.