Read Timugon Murut PILIMON 1 Bible Online

PILIMON 1 - Timugon Murut bible

PILIMON 1

¹Aku i Paulus ondo' inaput sabap ra pampatanawan kuno ri Jisus Kristus. Am intor niayuk ra pabukat takau i Timotius. Okou ti Pilimon papasabayan ku ra surat ti, okou ondo' tagamin mai am niayuk rangan mai mangandoi.

²Am posoboyon ku niayuk gitio ra pasimpungan ulun Kristian ondo' maya' sambayang giu' ra baloi muno, am niayuk sangulun ruandu' pabukat takau ra Kristian i Apia am poyo i Arkipus, rangan mai mangandoi.

³Gama' ru i Aki Kapuuno', Ama' takau am Tuhan Jisus Kristus manaak ramuyun ra barakat am pabansayan.

⁴Masalok ra aku makiasi' am mangkara' rirun, maringkuanang aku ri Aki Kapuuno'.

⁵Sabap ra mokoondo' noyo naining kuno intor ra pangintapatan muno ra Tuhan Jisus Kristus am poyo togom muno ra ngaangai' ulun ri Aki Kapuuno'.

⁶Makiasi' aku gama' ru pabukatan takau koson ra ulun mangintopot ri Kristus, manangampos ra makatutun kou ra ngaangai' barakat ondo' noowot takau intor ra nasisimpungan takau ri Jisus Kristus.

⁷Pilimon, pabukat ku ra Kristian, togom muno raginio noyo ondo' nampakaansuk toojo raki' am niayuk nampaikang ra guang kutu! Sabap ra nampakaansuk kou no ra guang ru ngaangai' ulun ri Aki Kapuuno'.

⁸Kabalu' pana mokoondo' aku ra kuasa' intor ri Jisus Kristus koson manusub rirun ra ati rondo' sotopot no moonsoi baalon muno, kaa' kalo noyo.

⁹Kaa' sabap ra togom ti, makitaak aku ayuk rirun. Aku ti duta ri Kristus Jisus am raino inaput poyo sabap Io.[1]

¹⁰Gitio noyo kitaakon kutu rirun, pakaasi' no ri Onisimus ondo' pinakaanak kutu. Sabap ra aku ti noyo ondo' nagibit riso minintopot ri Jisus Kristus giti ra pangaputan ti.

¹¹Ragili io ti kolondo' onong rirun, kaa' raino mokoonong[2] io rirun am raki' niayuk.

¹²Kabalu' pana motogom aku toojo riso, kaa' raino pootoron ku io niayuk saguli' rirun.

¹³Sotopot no, moogot aku riso mamparangan poyo raki' koson malit rirun mangindangan raki' buoi ra aku giti ra pangaputan ti, sabap ra pampatanawan kuno ra Tanou Moonsoi ti.

¹⁴Kaa' kalo masaga' aku mambaal ra atan ayuk pana amon ru kolondo' ragu mu mangiou. Sotopot no, moonsoi ru okou ayuk galama' mangapu riso saguli' maya' ra kasagaan muno am sala' ka jajalin tokou.

¹⁵Ginio lair ra i Onisimus ti nakatuliar rirun ra sangkinolor ayuk, sabap ra masaguli' mu io ra sabuoi-buoi no.

¹⁶Am raino sala' ka sangulun ulipon io ayuk, kaa' mulu' poyo intor raginio, io sangulun pabukat muno ra Kristian ondo' tagamin mu. Mokoonong io raki' am mulu' poyo rirun, koson ra sangulun ulipon am niayuk ra sangulun pabukat muno ondo' mangintopot ra Tuhan.

¹⁷Ginio sabap ra amon ru makimabukat kou raki' ra Kristian, apuo' io no mogondo' raki'.

¹⁸Amon ru namparuung io lair rirun kapoam nakaira' rirun, polosoo' ayuk ra aku mangani' panampilon ra ngaangai' no.

¹⁹Ilai', gitio noyo tinatanduan kutu: Aku i Paulus, ondo' mambayar ayuk saguli' ra ngaangai' no. (Kapoam pakaraan tokou po kia ra sotopot no okou galama' makautang raki', ioginio kaayagan bagu muno koson sangulun Kristian).

²⁰Pilimon, pabukat kuno ra Kristian, sabap ra Tuhan indangano' aku noyo. Katasuo' noyo guang kutu sabap ra pangintapatan tati ri Kristus.

²¹Tinulisan tokou ra surat ti sabap ra mangintopot aku ra suguton mu niayuk kitaakon kutu. Am napandayan ku ra mulu' poyo baalon muno.

²²Liliwa' raginio, pongoono' raki' kalalair rondo' lamin giu' ra baloi muno, sabap ra malansan aku i Aki Kapuuno' mangiou niayuk ra pakiasian min ngaangai', koson mokoongoi aku po tuum saguli' ramuyun.

²³I Ipapras, ondo' inaput nabaya' raki' sabap ra pampatanawan ri Kristus Jisus, mampasaboi niayuk ra bilin kaansayan rirun.

²⁴Mogondo' niayuk ra rangan-rangan mangandoi kuno i Markus, Aristarkus, Dimas am poyo i Lukas.

²⁵Gama' ru Tuhan Jisus Kristus mambarakat ramuyun ngaangai'.