Read Timugon Murut IBRANI 1 Bible Online

IBRANI 1 - Timugon Murut bible

IBRANI 1

¹Paat ra galing i, ingkukula' noyo i Aki Kapuuno' nampasaboi ra bala' ra nansalinut bayaan ra kinamatuaan takali ondo' pinabala' galing ra nabi-nabi.

²Kaa' paat ra pupupus ti, posoboyon No bala' Nano ondo' pinabala' galing ra Anak Nano. Nansail ra Anak Nati noyo limbowon am tana' ti biningkal No am Anak Nano tatangan ra ngaangai' no.

³Io noyo mampakito ra kuasa' ri Aki Kapuuno' am paliso Nano mogondo' toojo ri Aki Kapuuno'. Io noyo niayuk magalung ra limbowon am tana' ti mansail ra bala' Nano ondo' makakuasa'. Mopongo Io namasau ra ulun intor ra tula nilai, nanturung Io ra takhta ra suruga' ra tampilon pamiris ri Aki Kapuuno' ondo' Maayo Kaga' Kuasa'.

⁴Anak Nano nasauk ra maatang poyo intor ra malaikat-malaikat mogondo' ra inggalan ondo' tinaakan ri Aki Kapuuno' no Riso pana maayo kaga' intor ra inggalan nilai.

⁵Kalo igondo' i Aki Kapuuno' no minindagu ra ati ayuk pana malaikat koson ragitio: “Okou no Anak Kuno; orou raiti' ngaangai' balain ra Aku Ama' Muno.” Kalo poyo niayuk i Aki Kapuuno' minindagu ra ati ayuk pana malaikat ra: “Aku masauk ra Ama' Nano, am Io masauk ra Anak Kuno.”

⁶Kaa' paat i Aki Kapuuno' nanusub ra Anak langkuir Nano mongoi ra tana' ti, minindagu Io koson ragitio: “Polosoo' noyo ngaangai' malaikat ri Aki Kapuuno' sumamba Riso.”

⁷Am intor ra malaikat-malaikat mindagu i Aki Kapuuno' kon ragitio: “Saukon takamin mogondo' ra angin, am ulipon-ulipon Kuno mogondo' ra simbula' ru apui.”

⁸Kaa' intor ra Anak no mindagu Io koson ragitio, “Takhta Muno, i Aki Kapuuno',[1] mantilayun ra sabuoi-buoi no. Am Okou mamarinta ra ulun Muno[2] mabaya' ra katimpakan.

⁹Maansayan Kou ra katapatan am masisang Kou ra kalaatan. Ginio sabap ra Aku, i Aki Kapuuno', Tuhan Muno, nampili' am nangurumat Rirun am nangani' Rirun ra kaansukan maayo intor ra rangan-rangan Muno.”

¹⁰Minindagu poyo i Aki Kapuuno' ra Anak Nano: “Okou noyo Tuhan, ondo' namingkal ra tana' ti ra talimpuun i, am Okou galama' nambaal ra limbowon.

¹¹Ngaangai' ti maliom niayuk am maapu' koson ra bayang, kaa' Okou Tuhan soroi ayuk mantilayun.

¹²Limbowon am tana' ti purunon Mu saguli' am aligin Mu poyo ra baguon. Kaa' Okou Tuhan kalo makulau am soroi Kou ayuk ra mantilayun.”

¹³Kalo igondo' i Aki Kapuuno' no minindagu ra ati ayuk pana malaikat koson ragitio: “Panturung no ra pamiris Kutu, saboi mampasauk Aku ra ngaangai' pantula' Muno gumagaya' Rirun.”

¹⁴Sabap ra sotopot no malaikat-malaikat no mangngandoi ri Aki Kapuuno' am ilo sinusub No mangindangan ra ulun ondo' makaapu ra pamayagan.