Read Timugon Murut IBRANI 10 Bible Online

IBRANI 10 - Timugon Murut bible

IBRANI 10

¹Ukum ri Musa no koson ra babara' ayuk ru baal giu' ra suruga', kapoam asilan ayuk ru barakat moonsoi ondo' matong ra tauli no. Gumagaya' ra ukum raginio kalo makapangindangan ra ulun ondo' matong ri Aki Kapuuno' masauk ra matanda', kabalu' pana moonong bilor ruli'-ruli' ilo magibit ra taak simbalui.

²Amon ru ulun ondo' sumamba ri Aki Kapuuno' no totopot inimpasau intor ra tula, kalo boo mangkara' ra makatula ilo am kalo pana boo magibit ilo ra taak simbalui.

³Kaa' sotopot no taak ondo' simbaluyon ra moonong bilor mampakara' ayuk ra ulun ra makatula ilo.

⁴Sabap ra sotopot no raraa' ru sapi' gawayan am kambing gawayan kalo noyo makapangiru' ra tula.

⁵Ginio boo i Kristus minindagu ri Aki Kapuuno' paat ra Io minatong ra tana' ti, kon Nano: “Sala' ka taak simbalui am poyo taak ra bokon ondo' kasagaan Muno, kaa' inaru' Mu noyo ra Aku sumauk ra ulun am mapataak ra painawo Kuno Rirun.

⁶Kalo noyo maansayan Kou ra taak simbalui ondo' solobon[10] kapoam taak simbalui koson mangampun ra tula.

⁷Am indagu Io poyo, ‘O Aki Kapuuno', nakatampos Aku no mambaal ra kasagaan Muno, koson tinulisan noyo intor Raki' ra Buuk Kitab.’ ”

⁸Kasaa' i minindagu i Kristus, “Marara' Kou ra taak simbalui am taak ra bokon, taak simbalui ondo' solobon am taak simbalui koson mangampun ra tula. Ngaangai' ragitio kalo noyo kasagain Mu.” Minindagu Io koson raginio iou pana ngaangai' ti pataakon sumugut ra Ukum ri Musa.

⁹Indagu Io poyo: “O Aki Kapuuno', nakatampos Aku no mambaal ra kasagaan Mu.” Ginio boo ra batalo' ri Aki Kapuuno' ngaangai' taak nakalair am aligi' No ra taak ri Kristus.

¹⁰Sabap ra paat ri Jisus Kristus nampataak ra painawo Nano ra igondo' ayuk, itakau ngai' inimpasau intor ra tula am ginio sama' ra sabuoi-buoi no. Giminagaya' Io ra kasagaan ri Aki Kapuuno'.

¹¹Tukir-tukir orou, moonong imam Jaudi ruli'-ruli' ayuk mampaugar ra kandoi nilono, ioginio magibit ra taak simbalui ondo' ginio am ginio ayuk. Kaa' ginio kalo noyo makapangampun ra tula ru ulun.

¹²Kaa' i Kristus igondo' ayuk nampataak ra painawo Nano koson pangampunan ra tula, am ginio makakuasa' ra mantilayun. Kopongo raginio, nanturung Io ra tampilon pamiris ri Aki Kapuuno'.

¹³Raino maginaa Io ayuk saboi saukon ri Aki Kapuuno' pantula' Nano gumagaya' Riso.

¹⁴Sabap ra Io nampataak ra painawo Nano ra igondo' ayuk, tandaan No ra mantilayun ulun ondo' kinapasau noyo intor ra tula.

¹⁵Ambiluo ri Aki Kapuuno' niayuk mangani' ritakau ra kaintutunan, ragu Nano:

¹⁶“Gitio noyo nabantuan ondo' baalon Kuno risilo paat ra orou matong no, ragu ru Tuhan: ‘Pakaraan Ku ukum Kuno risilo am tulisin Ku poyo ra guang nilono.’ ”

¹⁷Mindagu Io niayuk, “Kalo boo karaan Ku tula kapoam kalaatan nilono.”

¹⁸Ginio ra amon ru tula am kalaatan inampun noyo, kalo pana boo magibit ra taak simbalui koson mangampun ra tula.

¹⁹Pabukat kau ngai', ragili malaa' ilo rumampus ra tabir am mumpos ra Intok Matulai Kaga', kaa' raino, mansail ra pinatayan ri Jisus, nangukab Io ra ralan nakabagu am makakau' takau ngai' magindagu ri Aki Kapuuno'.

²¹Am i Jisus ti noyo imam maayo kuasa' ondo' maningganai ra ulun ri Aki Kapuuno'.

²²Intor raginio, pagindagu takau no ri Aki Kapuuno' mabaya' ra guang mabanis am pangintapatan maikang; mabaya' ra guang kolondo' sala am pampariwan ondo' mampakito ra itakau mapasau noyo.

²³Ginio ra pirot takano mampaguut ra kalansanan takau, sabap ra totopot suguton ri Aki Kapuuno' atan ondo' binantu' Nali.

²⁴Guango' takau, ati koson mangindangan ra ulun montotogom ra rondo' am bokon am poyo mambaal ra moonsoi.

²⁵Pai' takano impayi' mantitimung koson ra kaindalaman ru santayaran ulun. Pampakara' takano ra rondo' am bokon intor ra baal raginio, sabap ra mapandayan takau noyo ra kalo boo mabuoi ratangan saguli' ru Tuhan.

²⁶Sabap ra amon ru nakatutun takau noyo toojo ra katapatan ri Kristus, kaa' sumingon takau poyo ruli'-ruli' ayuk mambaal ra tula, kolondo' noyo taak simbalui koson mangampun ra tula raginio.

²⁷Ondo' ayuk inaanin takau ioginio pangakiman ri Aki Kapuuno' am apui ra makalalaa' ondo' mampaluus ra pantula' Nano.

²⁸Ra galing i, osoi ayuk kalo giminagaya' ra Ukum ri Musa am mokoondo' ruo kapoam talu ngaulun sasi' ra makasala io, ulun no pinatoi ra kalo asiin.

²⁹Mumpara' boo bagat paukumin ra ulun ondo' magasab ra Anak ri Aki Kapuuno' am mangkara' ra kolondo' noyo onong ru raraa' nabantuan ri Aki Kapuuno' ondo' mangampun ra tula nano, am magasab poyo ra Ambiluo ri Aki Kapuuno' ondo' mangasi' riso.

³⁰Sabap ra napandayan takau noyo osoi minindagu, “Aku no mambalos risilo am mangukum risilo.” Mindagu Io niayuk, “Mangakim Tuhan no ra ulun Nano.”

³¹Aibui boo risilo ondo' akimin ri Aki Kapuuno' ondo' maayag no!

³²Karaa' min noyo ati kulaan min paat ragili ra akau kasaa' nakarati' ra Tanou Moonsoi. Kabalu' pana inimbolo' kau, kaa' timinaan kau.

³³Gili tinauyu' kau niayuk am inimbolo' kau ra tatanga' ru ulun masuang. Sanganuan poyo minaya' kau niayuk ra rangan mino paat ra ilo inimbolo' koson raginio.

³⁴Nakaasi' kau risilo ondo' inaput ra lamin pangaputan, am paat ra rapu' mini kinai' gaawo' ru ulun, inapu min ginio mabaya' ra kaansukan niayuk, sabap ra napandayan min ra mokoondo' kau ra rapu' moonsoi poyo ondo' soroi ra sabuoi-buoi no.

³⁵Intor raginio, pai' polosoo' pangintapatan mino lumawo, sabap ra maayo ampos nano.

³⁶Musiti' pantataan ayuk guang min, maa' raginio makapampagagaya' kau ra kasagaan ri Aki Kapuuno' am makaalap kau ra atan ondo' binantu' Nali.

³⁷Sabap ra mokoondo' tinulisan noyo ra Buuk Kitab: “Kalo boo mabuoi am sumuku' Io; kalo kabuoyon No ratangan Nano.

³⁸Ulun Kuno ondo' gumagaya' ra kasagaan Kuno, mangintopot am maayag ilo, kaa' osoi ayuk lumugut, kalo maansayan Aku riso.”

³⁹Kaa' itakau ti sala' ka ulun ondo' lumugut am makalayau. Itakau ti makapangintapatan am bayagon.