Read Timugon Murut IBRANI 11 Bible Online

IBRANI 11 - Timugon Murut bible

IBRANI 11

¹Pangintapatan ti makaarati' ra mangintopot toojo atan ondo' kalansanin am niayuk mangintopot ra atan ondo' kalo makito.

²Sabap ra intor ra pangintapatan noyo kinamatuaan takali iniou ri Aki Kapuuno'.

³Sabap ra pangintapatan noyo, itakau makaintutun ra limbowon am tana' ti pinasauk ru bala' ri Aki Kapuuno'. Ginio ra ngaangai' ondo' makito nasauk intor ra atan ondo' kalo makito.

⁴Sabap ra pangintapatan noyo, i Abil nampataak ri Aki Kapuuno' ra taak simbalui ondo' moonsoi poyo intor ra taak ri Kain. Sabap ra pangintapatan nali iniou io ri Aki Kapuuno' koson sangulun motopot, sabap ra taak nali napabansuk ra guang ri Aki Kapuuno'. Kabalu' pana lair noyo io minatoi, kaa' lakat poyo migigila' takau ra tiluan ru pangintapatan nali.

⁵Sabap ra pangintapatan noyo i Ginok kalo minatoi, kaa' kalo boo nakito io ru ulun, sabap ra kinayang io ri Aki Kapuuno' ra suruga'. Tinulisan noyo ra Buuk Kitab ra napabansuk io ra guang ri Aki Kapuuno' ra io kalo poyo kinayang ra suruga'.

⁶Kolondo' sangulun pana makapapabansuk ra guang ri Aki Kapuuno' amon ru kalo mangintopot io Riso. Osoi ayuk masaga' mulig ri Aki Kapuuno', musiti' mangintopot galing ra i Aki Kapuuno' totopot soroi am mambalos ra ulun ondo' toojo masaga' mulig Riso.

⁷Sabap ra pangintapatan noyo, i Nuu binalaan ri Aki Kapuuno' intor ra sauk ondo' matong no, ondo' kalo poyo nakito nali. Ginio boo ra io giminagaya' ra ragu ri Aki Kapuuno' am nambaal ra kapal maayo, am mansail raginio noyo ilo ngaangai' sambaloi binayag. Nampakito i Nuu ra ulun ru tana' ti ra ukumin ilo ri Aki Kapuuno', am sabap ra pangintapatan nali, iniou io ri Aki Kapuuno' koson sangulun motopot.

⁸Sabap ra pangintapatan noyo, i Abragam giminagaya' ra susuban ri Aki Kapuuno' mongoi ra sampagunan ondo' binantu' Nano riso. Iniruanan no pagun nali galama' kabalu' pana kalo nakatutun io ra ati angayan nano.

⁹Sabap ra pangintapatan poyo, minayan io koson ra sangulun bansa' ru bokon giu' ra sampagunan ondo' binantu' riso i. Minayan io ra kim ayuk mogondo' ra anak nali i Isak am akupu nali i Jakub. Ilo pana nakaapu ra bantu' nogondo' naapu ri Abragam i.

¹⁰Io ti naginaa ra bandar ondo' mantilayun, ioginio intok ondo' inaru' am saukon ri Aki Kapuuno'.

¹¹Sabap ra pangintapatan noyo, i Abragam nasauk ra ama', kabalu' pana matutuo io toojo am i Sara galama' tabanang, sabap ra nangintopot io[11] ra suguton ri Aki Kapuuno' bantu' Nano.

¹²Intor ra sangulun ayuk, ioginio i Abragam ondo' sotopot no kalo boo makapangani' ra sayat, masuang boo toojo sayat. Suang nilo koson ra suang ru butitin giu' ra limbowon am koson ra suang ru agis giu' ra kiing ru raat ra kalo maalap kauntob.

¹³Ngaangai' ulun raginio nampaguut ra pangintapatan saboi ra ilo minatoi, kabalu' ra kalo nokoowot ra atan ondo' binantu' ri Aki Kapuuno' risilo. Nakito ilo intor ayuk ra maalur am apuo' nilo. Ginio ra nangiou ilo ra giti ra tana' ti, ilo ti ulun bansa' ru bokon ondo' kolondo' intok karandanan galama'.

¹⁴Sabap ra ulun ondo' mindagu koson raginio, mampaintutun toojo ra maguyum ilo poyo ra pagun galama'.

¹⁵Amon ru pagun ondo' iniruanan nilai i ondo' guangon nilai ti, maaru' makauli' ilo noyo ra intok raginio.

¹⁶Kaa' sotopot no, mompogogot ilo ra pagun ondo' moonsoi poyo ka inayanan nilo i, iono suruga'. Ginio sabap ri Aki Kapuuno' pana kalo mauyu' ra Io no piawon i Aki Kapuuno' nilo, sabap ra nokopomongo Io noyo ra rondo' bandar risilo.

¹⁷Sabap ra pangintapatan noyo, i Abragam nampataak ra anak nali i Isak koson ra rondo' taak simbalui paat ri Aki Kapuuno' nangkinam riso. Nanaak io niayuk ra anak langkuir nano, kabalu' pana binantuan io ri Aki Kapuuno' ra:

¹⁸“Mansail ri Isak ti noyo okou makaalap ra sayat ondo' binantu' Kuli rirun.”

¹⁹Sabap ra makakalansanan i Abragam ra i Aki Kapuuno' makapamayag ra ulun ondo' minatoi noyo. Ginio ra maaya' raguon ra io ti nangapu noyo ri Isak saguli' intor ra kapatayan.

²⁰Sabap ra pangintapatan noyo, i Isak nambala' ri Jakub am i Isau, anak-anak nano, ra barakaton ilo ri Aki Kapuuno' ra orou matong no.

²¹Sabap ra pangintapatan noyo, i Jakub nakapambarakat ra ruo anak ri Jusup ra io kalo poyo minatoi. Liliwa' nambarakat, sungka' io ra jujuga' nano am samba io ri Aki Kapuuno'.

²²Sabap ra pangintapatan noyo, paat ri Jusup mamaar matoi minindagu io ra paingkualon ulun ru Israil intor ra pagun ru Misir, am nambilin poyo risilo ra bungul nano pana paayaan ibito'.

²³Sabap ra pangintapatan noyo, matuo ri Musa nampasibuni riso buoi talu ngambulan ra io naanak, sabap ra ilai' nilo ra moonsoi kaga' lalagang no. Am kalo nalaa' ilo gumula' ra susuban ru raja'.

²⁴Sabap ra pangintapatan noyo, ra i Musa nasukor, marara' io piawon ra anak ru anak ruandu' ru raja' Misir.

²⁵Sabap ra masaga' io ayuk ra imboloon mabaya' ra ulun ri Aki Kapuuno' intor ra mampagagaya' ayuk ra kalaayan ru guang makatula ondo' sangkinolor ayuk moonsoi.

²⁶Nangkara' io ra moonsoi poyo matiu' ra kaimbalaan mogondo' ra Mamamayag ondo' sinusub ri Aki Kapuuno',[12] intor ra mokoowot ra ngaangai' rapu' ru pagun ru Misir. Sabap ragitio noyo kalansanan nano ra makaampos io ra tauli no.

²⁷Sabap ra pangintapatan noyo, i Musa nagiru' intor ra pagun ru Misir am kalo nalaa' io ra sangit ru raja' Misir. Inorot no ayuk, koson ayuk ra nakito no noyo i Aki Kapuuno', Io ondo' kalo maalap kakito ru ulun.

²⁸Sabap ra pangintapatan noyo, nangimpuun io ra pangiantakan ra Paska. Sinusub no ulun ru Israil nampatakis ra raraa' ra kulobon ru baloi nilai, maa' raginio malaikat ondo' inanian ra kuasa' mamatoi, kalo makapamatoi ra anak katuaan nilai ra ungkuyon.

²⁹Sabap ra pangintapatan noyo, ulun ru Israil nakalaup ra Raat Malia' koson mantana' ayuk ra ralan mapua'. Kaa' ulun ru Misir nongolosor ngai' paat ra ilo liminaup siminunu' ra ulun ru Israil.

³⁰Sabap ra pangintapatan noyo, timbok ru bandar Jiriko nalunsai, nalupus ulun ru Israil liminiput ra intok ti buoi natuluan.

³¹Sabap ra pangintapatan noyo, i Ragab, ondo' ragili nantalan ra inan nali, kalo minatoi nabaya' ra mamagun ru bandar Jiriko ondo' kalo giminagaya' ri Aki Kapuuno', sabap ra nangapu io ra ulun ru Israil ondo' minongoi pansigo ra bandar i.

³²Tunggulin ku poyo kia? Kaa' kalo niayuk makai' ku katunung baal ru ulun-ulun ru Israil, koson i Gidion, Barak, Simson, Jipta, raja' Daut, Samuil am poyo nabi-nabi ra bokon.

³³Sabap ra pangintapatan noyo kinala nilo pagun-pagun ra bokon am namanang ilo. Nambaal ilo ra motopot am nokoowot ra atan ondo' binantu' ri Aki Kapuuno' risilo. Kinuasa' nilo singa' saboi kalo nansaam risilo.

³⁴Mokoondo' niayuk nampalasa' ra apui makalalaa', mokoondo' nakapagiru' paat ra inuupan ru ulun makakinandoi. Malawo ilo kaa' nasauk ilo ra maikang, am makakau' ilo saboi nangala ilo ra saujor ru pagun ra bokon.

³⁵Sabap ra pangintapatan noyo, mokoondo' ruandu' napulian ra pabukat nilo ondo' minatoi noyo, sabap ra binayag saguli' ri Aki Kapuuno'. Kaa' mokoondo' poyo nangintopot ondo' inimbolo' saboi minatoi, sabap ra marara' ilo palabuson, maa' raginio bayagon ilo saguli' ra kaayagan ondo' moonsoi poyo.

³⁶Mokoondo' poyo inasaban am linapos, am mokoondo' binangkil am inaput.

³⁷Mokoondo' poyo pinatoi bobolo' ra batu am niayuk piniruo garagajio' kapoam tinobok saboi minatoi. Am poyo mokoondo' jajawot ayuk ra kolondo' intok randanan nilai; kungkung ru domba kapoam kambing ayuk bayang nilai sabap ra musikin ilo toojo. Nansalinut kapaganan am imbolo' ondo' natuum nilo.

³⁸Ulun ru tana' ti kalo maaya' lumatok risilo. Kolondo' intok randanan nilai, giu' ilo ayuk ra kabuluran am intok masiluk am minayan ra luang batu am luang ru tana'.

³⁹Mumpara' boo gayo ru pangintapatan nilai ngaangai', kaa' kabalu' raginio, i Aki Kapuuno' kalo nangani' risilo ra atan ondo' binantu' Nali,

⁴⁰sabap ra nangaru' Io noyo ra rondo' baal moonsoi poyo ritakau ngai', ioginio, ra mabaya' ayuk ritakau, ilo no saukon ra matanda'.