Read Timugon Murut IBRANI 5 Bible Online

IBRANI 5 - Timugon Murut bible

IBRANI 5

¹Moonong Tingganai Maayo Imam pinili' ri Aki Kapuuno' intor ra ulun am inaru' io mangandoi ri Aki Kapuuno' ra ulun masuang: ioginio mampataak ra taak ru ulun am poyo taak simbalui koson pakiampunan ra tula.

²Molomoi io ra ulun ondo' kalo kukula' kaintutunan am ondo' palayawon boo ru ulun ra bokon, sabap ra io galama' masuang kalawaan.

³Ginio ra paat ra io mampataak ra taak simbalui, pai' ru pakiampunan ra tula ru ulun bokon ayuk, kaa' koson ra tula nano galama' niayuk.

⁴Kolondo' sangulun galama' mampili' sumauk ra Tingganai Maayo Imam, kaa' piawon io ri Aki Kapuuno', koson i Arun piniau ra galing i.

⁵Koson niayuk ri Kristus. Sala' ka Io galama' nampili' sumauk ra Tingganai Maayo Imam, kaa' i Aki Kapuuno' minindagu Riso: “Okou no Anak Kuno, orou raiti' ngaangai' balain ra Aku Ama' Mu.”

⁶Am mokoondo' poyo tinulisan ra Buuk Kitab: “Okou no masauk ra imam ra sabuoi-buoi no, koson imam Milkisidik ra galing i.”

⁷Paat ri Jisus soroi ra tana' ti, nakiasi' Io toojo ri Aki Kapuuno' nabaya' ra bolos mapuor liliwa' nantangi'. Nakiasi' Io ri Aki Kapuuno' ondo' makapamayag Riso intor ra kapatayan, am rinongog Io ri Aki Kapuuno' sabap ra pinainggana' No guang Nano Riso.

⁸Kabalu' pana Anak Io ri Aki Kapuuno', kaa' minigigila' Io niayuk gumagaya' mansail ra kaimbalaan.

⁹Ginio ra kalupus Io pinasauk ra mamamayag ra kolondo' sala, nasauk Io boo ra puun ru pamayagan mantilayun ra ngaangai' ulun ondo' gumagaya' Riso.

¹⁰Inaru' Io ri Aki Kapuuno' masauk ra Tingganai Maayo Imam, koson ra imam Milkisidik ra galing i.[5]

¹¹Masuang poyo raguon mai ramuyun intor ra baal raginio, kaa' mapagon toojo mampabala' ramuyun sabap ra mototoi kau makarati'.

¹²Sotopot no raino mangila' kano raan ra ulun bokon, kaa' kalo poyo makapandai kau. Lakat kau ayuk poyo musiti' ilaan ra puun ru pangilaan intor ri Aki Kapuuno'. Lakat kau ayuk poyo manginum ra susu' sabap ra kalo poyo maangkan.

¹³Akau ti koson ayuk poyo ra lalagang ondo' tumiti' ra gatas am kolondo' poyo katutunan no ra atan motopot am atan nasala.[6]

¹⁴Kaa' pangilaan malandom intor ri Aki Kapuuno' maratian ayuk ru ulun ondo' siminingkot ra pangintapatan, ginio mogondo' ra akanon ondo' sapaan ru ulun nasukor ayuk, ondo' nakaili' noyo am makaulig ra atan moonsoi am atan malaat.