Read Timugon Murut IBRANI 7 Bible Online

IBRANI 7 - Timugon Murut bible

IBRANI 7

¹Ra galing i, i Milkisidik ti raja' ru bandar Salim am poyo sangulun imam ri Aki Kapuuno' Ondo' Masawat Kaga'. Pakauli' noyo i Abragam intor ra pangayawan ra io nangala ra apat ngaulun raja', inuma' am barakato' io ri Milkisidik ti.

²Tatayaro' ri Abragam rapu' ginaau no am mopor piatus pinataak no ri Milkisidik. (Arati' ru inggalan ri Milkisidik no ra kasaa', “Raja' ru Katimpakan”. Am poyo, sabap ra io raja' ru bandar Salim, ondo' arati' no ‘pabansayan ’, ginio ra arati' karuo ru inggalan nano, “Raja' magibit ra pabansayan”.)

³Kolondo' tinulisan koson ra inggalan ru ama', ina' am kinamatuaan nali kapoam naganakan am niayuk pinatayan nali. Kaa' io ti koson ra Anak ri Aki Kapuuno', ra sumauk io ra imam ra mantilayun.

⁴Guango' min i Milkisidik ti. Io sangulun maatang kaga' saboi kinamatuaan takali i Abragam nantayar riso ra mopor piatus rapu' ginaau nali ra pangayawan i.

⁵Maya' ra Ukum ri Musa, imam-imam ru papag Liwi mangapu ra mopor piatus intor ra ampos ru kandoi ru ulun ru Israil, ioginio bansa' nilo galama', kabalu' pana mogondo' ilo ra papag ri Abragam.

⁶I Milkisidik ti sala' ka papag ru Liwi, kaa' inanian io mopor piatus intor ra rapu' ginaau ri Abragam, am io ti niayuk ondo' nambarakat ri Abragam ondo' nakaapu noyo ra bantu' ri Aki Kapuuno'.

⁷Motopot noyo ra ulun ondo' mambarakat maatang intor ra ulun ondo' barakaton no.

⁸Imam-imam ru papag Liwi ondo' makaapu ra mopor piatus no, ilo ti ulun mapandai matoi. Kaa' kon ru Buuk Kitab, i Milkisidik ondo' inanian niayuk ra mopor piatus i, maayag io poyo.

⁹Sama' raguon ra paat ri Abragam nambayar mopor piatus ru tayar raginio, i Liwi niayuk nambayar ra mopor piatus (kabalu' pana papag ru Liwi mampalulur ra mopor piatus intor ra ulun ru Israil).

¹⁰Sabap ra kabalu' pana i Liwi kalo poyo inanak, naratian poyo ra soroi io ra inan ri Abragam, kinamatuaan nali, paat ri Milkisidik nanguma' ri Abragam.

¹¹Mimpuun ra papag ru imam-imam Liwi ti Ukum ri Musa pinataak ra ulun ru Israil. Amon ru kandoi ru imam papag ri Liwi i mampakatanda' raan ra ulun, kalo pana pasalulaan sangulun imam ra bokon koson i Milkisidik, ondo' sala' ka papag ri Arun.

¹²Sabap ra amon ru kaulayan pangaruan ra imam aligin, Ukum ri Musa musiti' aligin niayuk.

¹³Itakau ngaangai' nakapandai noyo ra Tuhan takau papag ri Jiuda, am kalo igondo' sinabit ri Musa ra papag raginio masauk ra imam. Io sala' ka papag ri Liwi am kalo igondo' sangulun pana intor risilo siminauk ra imam.

¹⁵Ratangan ru sangulun imam ra bokon koson ri Milkisidik mampainono' ondo' paraguon kuno ramuyun.

¹⁶Nasaukan no ra sangulun imam, sala' ka sumugut ra kaulayan ru ulun kaa' sumugut ra kaayagan nano ondo' makakuasa' am mantilayun.

¹⁷Sabap ra tinulisan noyo ra Buuk Kitab: “Okou no masauk ra imam ra sabuoi-buoi no, koson i Milkisidik ra galing i.”

¹⁸Ragino kaulayan nakalair i inimpayan, sabap ra kolondo' kuasa' am kolondo' onong.

¹⁹Sabap ra Ukum ri Musa kalo mampakatanda' ra osoi ayuk pana. Ginio ra inanian takau ra kalansanan moonsoi poyo am mansail raginio makainggaar takau ri Aki Kapuuno'.

²⁰Mulu' poyo raginio, mokoondo' ibot i Aki Kapuuno'. Paat ra nangaruan ru imam ra galing i, naaru' kalo minindagu i Aki Kapuuno' risilo kon raginio.

²¹Kaa' i Jisus sinauk koson ra imam ra nagibot i Aki Kapuuno' Riso, kon Nano: “Aku noyo Tuhan bantu' Kuno Rirun, am kalo kulawon ragu Kuno, ‘Okou no imam ra mantilayun.’ ”

²²Intor raginio i Jisus noyo makapampasauk ra nabantuan ondo' moonsoi poyo.

²³Mokoondo' rondo' baal poyo: ra galing i masuang noyo imam, kaa' kalo nakapanunggul ilo ra kandoi nilono sabap ra minatoi ilo ngai'.

²⁴Kaa' i Jisus ti maayag ra mantilayun am kandoi Nano koson ra imam kalo palitin ru ulun ra bokon.

²⁵Intor raginio makapamayag Io ra mantilayun ra ulun ondo' matong ri Aki Kapuuno' mumbaya' Riso, sabap ra maayag Io ra mantilayun koson makitaak ri Aki Kapuuno' mangindangan risilo.

²⁶I Jisus ti noyo Tingganai Maayo Imam ondo' makapangindangan ritakau. Sala' ka Io koson ra ulun makatula, matulai Io, kolondo' sala kapoam tula, am kinayang Io giu' ra suruga'.

²⁷Moonong orou Tingganai Maayo Imam ra bokon mampataak ra taak simbalui sabap ra tula ru ulun am tula nilo galama', kaa' i Jisus sala' ka koson raginio. Igondo' ayuk nampataak Io ra kaayagan Nano galama' am ginio sama' ra sabuoi-buoi no.

²⁸Ukum ri Musa mangaru' ra ulun ondo' kalo matanda' masauk ra Tingganai Maayo Imam. Kaa' malupus Ukum ni, nambantu' am nagibot i Aki Kapuuno' ra mampili' Io ra Anak Nano ondo' pinasauk ra kolondo' sala, masauk ra Tingganai Maayo Imam ra sabuoi-buoi no.