Read Timugon Murut JAKUBUS 3 Bible Online

JAKUBUS 3 - Timugon Murut bible

JAKUBUS 3

¹Pabukat kau ngai'! Moonsoi ru kalo niayuk masuang intor ramuyun makaguang masauk ra mangingila'. Sabap ra kalo kia nakapandai kau ra itakau ondo' mangila' ra bokon, maagat poyo paukumin ri Aki Kapuuno' ritakau.

²Itakau ngai' kalo noyo makapagiru' intor ra mansalinut kasalaan. Kaa' ulun ondo' kalo igondo' pakasala sabap ra kinibit ru raguon nano, io sangulun matanda' am makapagalung io ra ngaangai' sauk ru kaayagan nano.

³Patakino' takau noyo kakang ra kabang ru kuda no, maa' raginio gumagaya' io boo am maalap takau kaibit io maya' ra kasagaan ru guang takau.

⁴Koson niayuk ra rondo' kapal. Iou pana kapal no maayo am maibit niayuk ru bagiu' mapuor, kaa' maya' io ayuk ra ati kabuiran ru kamudi' ondo' boborok kaga'. Gitio noyo magibit ra kapal ti mugar, maya' ra kasagaan ru ulun mampaugar no.

⁵Kon niayuk ra rila' takati. Kabalu' pana ra io boborok ayuk, kaa' lumimbau io. Karaa' noyo kula' gayo ru kataunan, kaa' maalap niayuk kosolob ru apui boborok pana.

⁶Rila' ti mogondo' ra apui. Ralalom ru inan takau, io no puun ru laat am mampakasalula' ra kalaatan nano ra ngaangai' ru kaayagan takau. Kinalaat nano intor noyo ra naraka, am makapampakalaat io poyo ra ngaangai' ru kaayagan takau.

⁷Ngaangai' ru bibiag, koson ra bibiag masigo am ondo' mamuntana', susuit am poyo papait, ilo ti ngai' maalap niayuk kakaup am kinaup noyo ru ulun.

⁸Kaa' rila' takati kalo noyo maalap kakaup ru osoi ayuk pana. Kinalaat nati mailo kuasaan, am mapanu' io ra tuwo ondo' makapatoi toojo.

⁹Rila' takati noyo ondo' mongompor ra Tuhan, i Ama' takau, kaa' magasab niayuk poyo ra ulun, ondo' sinauk mansalu ri Aki Kapuuno' galama'.

¹⁰Mokoondo' pangamparan am poyo pagasaban mingkual intor ra kabang takati. Pabukat kau ngai', ginio kalo noyo moonsoi masauk!

¹¹Mokoondo' kia mingkual ra timug mapasau am timug maasin intor ra rondo' ak taur?

¹²Pabukat kau ngai', puun ru ara kalo noyo mangkawa' ra jaitun; kapoam puun ru anggur kalo noyo mangkawa' ra ara. Am poyo kalo noyo lair taur makatimug maasin mapaingkual ra timug mapasau.

¹³Osoi ak intor ramuyun ondo' mangkara' ra makaintutun am mapintar io, moonsoi ru pakitonon no ginio mansail ra kaayagan am baal moonsoi nano, mabaya' ra guang minggana' am kapintaran.

¹⁴Kaa' amon ru lakat kau poyo magusolon, maruol guang am maguyum ak ra kaatangan galama', pai' noyo limbau ra kapintaran minti sabap ra ngaangai' ti abau ayuk.

¹⁵Ginio sala' ka kapintaran intor suruga'. Kaa' intor io ayuk ra tana' ti, intor ayuk ra paliso ru ulun am intor poyo ra riwato.

¹⁶Ati ayuk mokoondo' ra ulun magusolon kapoam maguyum ra kaatangan galama' ayuk, giu' no niayuk mokoondo' boo pagugulaan am poyo nansalinut sauk malaat.

¹⁷Kaa' kapintaran ondo' intor ra suruga', kasaa' no io mapasau am kolondo' sala; am poyo masaga' ra pabansayan, masamba, minsugut; mapanu' ra asi' am baal moonsoi; kalo mainggi' io am mabanis ayuk guang.

¹⁸Amon ru unor ru pabansayan tonomon ru ulun ondo' motogom ra pabansayan, kaansayan niayuk kumoson no.