Read Timugon Murut 1 PITRUS 1 Bible Online

1 PITRUS 1 - Timugon Murut bible

1 PITRUS 1

¹Aku i Pitrus, sangulun rasul ri Jisus Kristus. Posoboyon ku gitio ra ulun Kristian ondo' nakapansusuai giu' ra libung ru Pontus, Galatia, Kapadokia, Asia am Bitinia!

²Pinili' kau ri Aki Kapuuno', Ama' takau, sumugut ra pangatangan Nano, am pinasauk kau ru Ambiluo Nano ra ulun matulai, maa' raginio gumagaya' kau boo ri Jisus Kristus am maimpasawan kau ru raraa' Nano. Gama' ru ruangin poyo ri Aki Kapuuno' no barakat am pabansayan Nano ramuyun.

³Paringkuanang takau no ri Aki Kapuuno', Ama' ru Tuhan takau i Jisus Kristus! Sabap ra intor ra asi' Nano ondo' maayo kaga', nangani' Io ritakau ra kaayagan nakabagu am Io namayag saguli' ri Jisus Kristus intor ra kapatayan. Gitio noyo mangani' ritakau ra kalansanan maayo ondo' mantilayun.

⁴Ginio noyo puun ru barakat maayo ondo' pinatampos kalalair ritakau giu' ra suruga'. Am taak ragitio kalo maalap kalunsai, kapuso kapoam kairu'.

⁵Sabap ra pangintapatan minti noyo akau maalungan ru kuasa' ri Aki Kapuuno'. Ginio boo ra mokoowot kau boo ra pamayagan ondo' pinatampos noyo kalalair i, kaa' ondo' paintalangon ayuk ra Orou Pupus no.

⁶Sabap ra paintalangan nano pakaansuk kano, iou pana raino ti mangiluk guang min ra buoi, sabap ra makaliman kau ra nansalinut pangkinaman.

⁷Sotopot no, ginio rondo' pangkinaman ayuk ru toojo kau kia mangintopot ri Aki Kapuuno' kapoam kalo. Mas pana, ondo' maalap kalunsai, solobon niayuk ra apui. Atan poyo ra pangintapatan mino ondo' mologo poyo intor ra mas, maaru' kinamin niayuk, maa' raginio maikang boo. Am intor raginio maaya' kau koompor am kaurumat ra Orou Papaintalangan ri Jisus Kristus.

⁸Motogom kau Riso, iou pana kalo poyo nakakito kau Riso. Mangintopot kau Riso, kabalu' ra kalo makakito kau Riso raino. Am maansukan kau kaga' mabaya' ra bansuk ondo' kalo noyo maalap karagu.

⁹Sabap ra noowot min noyo ampos ru pangintapatan mino, ioginio pamayagan min.

¹⁰Pamayagan ragitio noyo ondo' inintutunan am inimumuyan toojo ru nabi-nabi, am nambala' ilo poyo ra ati kulaan kataawan ri Aki Kapuuno' no ramuyun.

¹¹Nangimumuyan nilo ra ati kulaan am sanggilan ginio masauk,[1] sumugut ra bolos ru Ambiluo ri Kristus ralalom ru guang nilo. Io no nambala' risilo intor ra kaimbalaan ondo' inaru' matuum ri Kristus am poyo intor ra katulayan ra tauli no.

¹²Pinaintalang noyo ra nabi-nabi ra atan ondo' kinandoi nilai i, sala' ka kaatangan nilo galama' ayuk, kaa' sotopot no akau. Am ondo' pinabala' nilo ragili, mogondo' niayuk ra atan ondo' pinabala' toojo ramuyun ra raino ti ru ilo ondo' mampasaboi ra Tanou Moonsoi intor ri Jisus Kristus. Kandoi nilo ragitio mansail ra kuasa' ru Ambiluo ri Aki Kapuuno'[2] ondo' inataran intor ra suruga'. Am malaikat-malaikat pana mompogogot niayuk toojo mintutun ra baal-baal ragitio.

¹³Sabap ra ngaangai' ondo' binaal ri Aki Kapuuno' no ramuyun, kasalok pororoo' pangkaraan min. Pagilalai' min noyo am poyo lansan kano toojo ra kataawan ri Aki Kapuuno' ramuyun paat ra papaintalangan ri Jisus Kristus.

¹⁴Gagaya' kano ri Aki Kapuuno' am pai' min polosoo' kinibit ru guang malaat no manguasa' ramuyun koson ragili ra akau kalo poyo nakaulig ri Aki Kapuuno'.

¹⁵Sotopot no, kaayag kano ra mapasau ralalom ngaangai' baalon mino, koson i Aki Kapuuno' ondo' nampiau ramuyun no mapasau.

¹⁶Sabap ra mokoondo' tinulisan ra Buuk Kitab, “Kaayag kano ra mapasau, sabap ra Aku noyo mapasau.”

¹⁷Makiama' kau ri Aki Kapuuno' ralalom ru pakiasian min. Io no niayuk ondo' mangakim ra ulun maya' ra binaal nilono, am kalo mampili' ra ulun. Ginio ra urumato' noyo i Aki Kapuuno' buoi ra akau lakat ayuk poyo soroi ra tana' ti.

¹⁸Nakapandai kano ra logo ondo' binayaran nampalabus ramuyun intor ra kaulayan ra kolondo' onong ondo' sinugul min intor ra kinamatuaan min i. Pai' ru koson ra pirok kapoam mas ra maalap kalunsai no ondo' nakapampalabus ramuyun;

¹⁹kaa' ondo' mologo toojo no, ioginio raraa' ri Kristus. Io sinauk ra rondo' taak, mogondo' ra anak domba simbaluyon ondo' kolondo' noyo kalaatan kapoam sala.

²⁰I Kristus ti pinili' noyo ri Aki Kapuuno' ra tana' ti kalo poyo biningkal, kaa' raino boo ra io mamaar noyo Orou Pupus, pinaintalang Io noyo ramuyun.

²¹Mansail Riso ti noyo makapangintopot kau ri Aki Kapuuno'. Io no ondo' namayag saguli' ri Kristus intor ra kapatayan am nangurumat boo Riso. Ginio ri Aki Kapuuno' ti boo puun ru pangintapatan am kalansanan min.

²²Sabap ra gumagaya' kau ra pangilaan ri Aki Kapuuno' ti noyo, migimpasau kano, saboi mokoponogom kau boo ra pabukat min ra Kristian. Intor raginio, tagami' noyo rondo' am bokon mabaya' ra guang mapasau.[3]

²³Sabap ra mansail ra bala' ri Aki Kapuuno' ondo' maayag am mantilayun, akau sinauk ra ulun nakabagu ondo' sala' ka sayat ru ulun, kaa' sotopot no sayat kau ri Ama' ondo' mantilayun.

²⁴Mokoondo' tinulisan ra Buuk Kitab; “Ngaangai' ulun koson ra sakot, kalo mabuoi maayag, am atan ayuk pana kinoonsoi nilo mogondo' niayuk ra busak. Sakot no lumonot, am busak no mapasa',

²⁵kaa' bala' ru Tuhan kalo makulau am mantilayun.” Bala' ragitio noyo Tanou Moonsoi ondo' pinasaboi mai ramuyun.