Read Timugon Murut 1 PITRUS 4 Bible Online

1 PITRUS 4 - Timugon Murut bible

1 PITRUS 4

¹Sabap ri Kristus naimbolo', akau pana musiti' mangikang noyo ra pamaguangan min am tumilu kau Riso. Sabap ra ulun ondo' naimbolo' noyo, mininggalur io boo ra tula.

²Gagaya' kano ra kasagaan ri Aki Kapuuno' buoi ru kaayagan min am pai' noyo bayaa' kinibit ru guang min.

³Paat ragili, kaayagan min koson niayuk ra ulun ondo' kalo poyo makaulig ra Tuhan. Kalo noyo moonsoi kiralan ru kaayagan min: Minaya' kau ra guang mansasawa', mangagauk, magiginum ra majanjayan saboi mokoondo' baal makauyuyu' masauk am poyo siminamba kau ra sinungkalalaing ondo' kasisangin ru Tuhan.

⁴Kaa' raino maliangan boo ulun ondo' kalo mangintopot ra Tuhan ra kalo boo maya' kau ra jajou nilo. Ginio nai puun ra ilo magasab boo ramuyun.

⁵Kaa' tauli no, ilo galama' mampataam ri Aki Kapuuno' intor ra binaal nilai, ondo' nakatampos Io noyo mangakim ra ulun naayag am poyo ulun-ulun namagatoi.

⁶Ginio sabap ra Tanou Moonsoi ti pinabala' ra ulun-ulun namagatoi niayuk. Kabalu' pana ra inakim ilo ri Aki Kapuuno' paat ra ilo naayag koson itakau ngai', kaa' bayagon ilo niayuk ru Ambiluo ri Aki Kapuuno' sumugut ra kasagaan Nano.

⁷Pamupusan ru tana' ti mamaar noyo sumuku', pagilalai' am pantataan guang, maa' raginio makapakiasi' kau.

⁸Kaa' kasaa' toojo ti, tagami' noyo toojo rondo' am bokon, sabap ra intor raginio tula mino ra masuang ampunon noyo ri Aki Kapuuno'.

⁹Apuo' noyo rondo' am bokon giu' ra baloi mino ra kalo mambarui.

¹⁰Akau sigagama' inanian noyo ra nansalinut taak intor ri Aki Kapuuno'. Ginio ra alungi' toojo taak ti, am kondoyo' noyo ginio koson ra kaatangan min ra rondo' am bokon.

¹¹Osoi ayuk inanian ra kapandayan mindagu, moonsoi ru mampasaboi io ra bala' intor ri Aki Kapuuno'; am osoi ayuk mangindangan ra ulun bokon, musiti' io mangindangan mabaya' ra ikang intor ri Aki Kapuuno'. Maa' raginio, ralalom ngaangai' ondo' kondoyon min, i Aki Kapuuno' urumaton sabap ri Jisus Kristus. Io no makakuasa' am maaya' omporon ra sabuoi-buoi no. Amin.

¹²Pabukat ondo' tagamin ku, raino maimbolo' kau toojo am ginio mangkinam ra pangintapatan min. Kaa' pai' kau pakatigog sabap ra ginio maaru' masauk ramuyun.

¹³Kaa' sotopot no, pakaansuk kano sabap ra makaaya' kau kaimbolo' mogondo' ri Kristus. Koson raginio mulu' poyo kinaansuk min paat ra kuasa' ri Kristus paintalangon.

¹⁴Pakaansuk kano kabalu' pana ra asabin kau sabap ra maamaya' kau ri Kristus. Arati' no, mokoondo' noyo Ambiluo Maayo Kaga' Kuasa', ioginio Ambiluo ri Aki Kapuuno' rumondon ramuyun.

¹⁵Amon ru mokoondo' intor ramuyun mampatoi, mantakou, mangkalaat, kapoam sumombot ra atan ondo' baalon ru bokon, am imboloon io boo, ginio noyo balos no.

¹⁶Kaa' amon ru maimbolo' kau sabap ra akau ulun Kristian, pai' kau kauyu' raginio. Paringkuanang kano ri Aki Kapuuno' ra akau inggalanin ra ulun Kristian.

¹⁷Maar noyo masuku' paat ri Aki Kapuuno' mangakim ra ulun ru tana' ti, am Ulun Nano akimin No galing. Amon ru itakau noyo talimpuunan Nano, atan masauk ra tauli no risilo ondo' kalo nangintopot ra Tanou Moonsoi intor ri Aki Kapuuno' i?

¹⁸Koson tinulisan noyo ra Buuk Kitab; “Amon ru mapagon ra ulun moonsoi bayagon, mulu' poyo mapagon ra ulun makatula ondo' kalo makaulig ra Tuhan!”

¹⁹Ginio nai ra osoi ayuk maimbolo' sabap ra gitio noyo inatang ri Aki Kapuuno', rayusin nilo ayuk mambaal ra moonsoi am pataakon nilo boo kaayagan nilo galama' Riso ondo' nampasauk risilo am Io maalap kalansani'.