Read Timugon Murut TINGGANAI RU BANSA' 10 Bible Online

TINGGANAI RU BANSA' 10 - Timugon Murut bible

TINGGANAI RU BANSA' 10

¹Kopongo i Abimilik minatoi, i Tola anak ri Pua, nasauk ra tingganai koson mampalabus ra Israil. I Tola akupu ri Dodo intor ra bansa' ru Isakar. Minayan i Tola ra Samir, giu' ra kabuluran Ipraim.

²Naningganai io ra ulun ru Israil buoi ruo ngoopor am talu ngambilor. Kopongo raginio minatoi io am linobong giu' ra Samir.

³Kopongo i Tola, ulun ru Israil tiningganai ri Jair. Naningganai io ra Israil buoi ruo ngoopor am ruo ngambilor. Intor i Jair ra Giliad.

⁴Mokoondo' io ra talu ngoopor ngaulun anak ungkuyon ondo' nangura' ra talu ngoopor ngainan kaladai. Mokoondo' anak-anak nano ra talu ngoopor pekan giu' ra wilayah Giliad. Pekan-pekan raginio lakat poyo sabiton ra pekan-pekan Jair saboi raino.

⁵Kopongo raginio minatoi i Jair am linobong giu' ra Kamon.

⁶Igondo' poyo ulun ru Israil makatula ra TUHAN. Sinamba nilo Baal am Asyitorit am niayuk dewa ru bansa' ru Siria, Sidon, Moab, Amon am Palistin. Nangiruan ilo ra TUHAN am kalo boo sumamba Riso.

⁷Ginio ra siminangit TUHAN ra ulun ru Israil. Nompoloso Io ra ulun ru Palistin am ulun ru Amon nangala risilo.

⁸Buoi mopor am balu' ngambilor ilo nangimbolo' am nangulipon ra ulun ru Israil ondo' minayan giu' ra Giliad, iono giu' ra wilayah ru ulun ru Amori giu' ra tampilon sirangon ru Sungoi Jordan.

⁹Ulun ru Amon liminaup niayuk ra Sungoi Jordan koson namulunsar ra bansa' ru Jiuda, Binjamin am Ipraim saboi naimbolo' kaga' ulun ru Israil.

¹⁰Ulun ru Israil pana nampiau ra TUHAN. Konilo, “Makatula akai noyo Rirun, iou Aki Kapuuno', sabap nangiruan akai Rirun am samba ra dewa-dewa Baal.”

¹¹Taam TUHAN ra ulun ru Israil, “Ulun ru Misir, Amori, Amon, Palistin,

¹²Sidon, Amalik am Maon nangimbolo' noyo ramuyun paat ragili, am nampiau kau Raki'. Kalo kia namayag Aku ramuyun intor ra kuasa' nilo?

¹³Kaa' kabalu' pana koson raginio, lakat poyo nangiruan kau Raki' am samba ra dewa-dewa. Raino kalo boo masaga' Aku mamayag ramuyun.

¹⁴Ongoi kano pakiindangan ra dewa-dewa ondo' pinili' mino. Polosoon noyo dewa-dewa mamayag ramuyun paat ra makakapaganan kau.”

¹⁵Kaa' indagu ulun ru Israil ra TUHAN, “Makatula akai noyo. Baalo' noyo atan ayuk pamakuan ramon, kaa' indanganon Mu akai ra orou raiti'.”

¹⁶Ilo pana namatir ra ngaangai' sinungkalalaing, am samba ra TUHAN. Io pana mangiluk nakakito ra kapaganan ondo' mailian ru ulun ru Israil.

¹⁷Paat raginio saujor ru Amon tatanga' tumampos koson mangayou am tatanga' nangkim giu' ra Giliad. Timung ulun ru Israil am nangkim giu' ra Mijpa, giu' ra Giliad.

¹⁸Giu' no mindagu mamagun am tingganai ru bansa' ru Israil ra rondo' am bokon, “Ulun ondo' baani maningganai ra saujor koson gumula' ra ulun ru Amon masauk ra mangnguasa' ru ngaangai' mamagun giu' ra Giliad.”