Read Timugon Murut TINGGANAI RU BANSA' 11 Bible Online

TINGGANAI RU BANSA' 11 - Timugon Murut bible

TINGGANAI RU BANSA' 11

¹I Jipta, ulun ru Giliad, iono sangulun saujor ondo' baani. Inggalan ru ama' nano i Giliad, kaa' ina' nano sangulun ruandu' mantalan ra inan.

²Makaanak i Giliad ra bokon intor ra andu' nano ra motopot. Kasukor anak-anak nano, pinagiru' nilo i Jipta intor ra baloi. Konilo, “Kalo makapanungkus kou ra atan-atan intor ra ama' mai, sabap okou anak intor ra ruandu' ra bokon.”

³Ginio ra nagiru' i Jipta intor ra pabukat-pabukat nano am minayan giu' ra wilayah Tob. Giu' no naningganai io ra santimungan ulun malaat am minongoi ilo pantakou.

⁴Kalo nabuoi raginio ulun ru Israil binulunsar ru ulun ru Amon.

⁵Paat nasauk ginio, tingganai-tingganai ru Giliad namujak ri Jipta intor ra wilayah Tob.

⁶Indagu ilo riso, “Sauk noyo ra panglima mai maa' raginio makagula' akai ra ulun ru Amon.”

⁷Kaa' kon ri Jipta, “Kalo kia masisang kau raki'? Pinagiru' min aku intor ra baloi ru ama' kuno. Kua kia raino, paat ra kapaganan, matong kau raki'?”

⁸Konilo ri Jipta, “Raino matong akai rirun sabap ra masaga' akai ra maya' kou ramon, am maningganai ra ngaangai' ulun ru Giliad koson mamulunsar ra ulun ru Amon.”

⁹Kon ri Jipta risilo, “Amon ibiton min aku muli' koson mamulunsar ra ulun ru Amon, am amon ru pataakon ilo ru TUHAN raki', ama' kuno pana masauk boo ra mangnguasa' min.”

¹⁰Taam ilo, “Mangiou akai. TUHAN sasi' mai.”

¹¹Ginio ra minugar i Jipta nabaya' ra tingganai-tingganai ru Giliad. Io pana nasauk ra mangnguasa' am panglima. Pinabala' ri Jipta kitaak-kitaak nano ra saang ru TUHAN giu' ra Mijpa.

¹²Kopongo raginio nanusub i Jipta ra ulun mongoi ra raja' Amon koson mindagu ragitio, “Atan kia kasalaan mai? Kua pamulunsar kou ra pagun mai?”

¹³Taam raja' ru Amon ra ulun sinusub ri Jipta, “Paat ra ulun ru Israil miningkual intor ra Misir, ginaau nilo pagun kutu, intor ra Sungoi Arnon saboi ra Sungoi Jabok am Sungoi Jordan. Raino pasagulio' noyo bobonsoi wilayah no.”

¹⁴Nanusub poyo i Jipta ra ulun sinusub mongoi ra raja' ru Amon

¹⁵koson tumaam koson ragitio, “Kalo ginaau ru ulun ru Israil pagun Moab kapoam pagun Amon.

¹⁶Paat ra ulun ru Israil miningkual intor ra Misir, siminaboi ilo ra Teluk Akaba nansail ra tana' kaagisan, am nakasaboi ra Kadis.

¹⁷Intor ra giu' nanusub ilo ra ulun muma' ra raja' ru Idom, am nakitaak koson pasailon ra pagun no, kaa' inimpayan ru raja' ru Idom kitaak nilo. Nakitaak ilo niayuk ra pangiawan intor ra raja' ru Moab, kaa' inimpayan niayuk ru raja' ru Moab kitaak nilo. Ginio sabap ra ulun ru Israil minayan giu' ra Kadis.

¹⁸Ilo pana namparayus ra pangkiralanan mansail ra tana' kaagisan, kaa' kalo nansail ra pagun ru Idom am Moab, kaa' minaya' ra ralan lumiput polos ilo nakasaboi ra tampilon sirangon ru Moab, giu' ra sandaup ru Sungoi Arnon. Nangkim ilo ra giu', kaa' kalo liminaup ra sungoi no sabap nakasimpung sungoi no ra pagun ru Moab.

¹⁹Kopongo raginio nanusub Israil ra ulun minongoi ra Raja' Sigon, mangnguasa' ru ulun ru Amori giu' ra Gisybon. Nakitaak ilo koson pasailon ra pagun nano, sabap nangkiralan ilo mongoi ra tana' nilo galama'.

²⁰Kaa' inimpayan niayuk ru Raja' Sigon kitaak nilo. Nanimung io ra ngaangai' pulalai ru saujor nano am nangkim giu' ra Jagas. Ilo pana namulunsar ra ulun ru Israil.

²¹Kaa' TUHAN i Aki Kapuuno' ru Israil napataak ra Raja' Sigon am pulalai ru saujor nano ra ulun ru Israil. Koson raginio noyo naalapan ru ulun ru Israil ra ngaangai' tana' ru ulun ru Amori ondo' minayan ra pagun ti.

²²Minayan ilo ra titikop wilayah ru ulun ru Amori, tumalimpuun intor ra Arnon giu' ra tampilon rabugus saboi ra Jabok giu' ra tampilon ralayo am intor ra tana' kaagisan giu' ra tampilon sirangon saboi ra Sungoi Jordan giu' ra tampilon kalasaan.

²³TUHAN, i Aki Kapuuno' ru Israil noyo ondo' napagiru' ra ulun ru Amori tayar ru ulun Nano, ulun ru Israil.

²⁴Masaga' kou kia gaawon saguli'? Alapo' noyo atan ondo' tinaakan ri Kamos, dewa muno. Kaa' akai mampaguut ra ngaangai' ondo' tinaakan ramon ru TUHAN, i Aki Kapuuno' mai.

²⁵Guang muno kia ra moonsoi kou poyo intor ra Raja' Balak anak ri Jipor, mangnguasa' ru Moab? Raja' Balak galama' kalo igondo' namulunsar ra Israil kapoam minanggal ra Israil!

²⁶Ulun ru Israil minayan ra Gisybon, Aroir am pekan-pekan ra libung no, am niayuk ngaangai' bandar ra igig ru Sungoi Arnon buoi talu ngaatus ngambilor. Kua pai' mu gaawo' buoi ru ginio?

²⁷Kolondo' sala kuno rirun. Okou noyo ondo' makasala sabap mamulunsar ramon. TUHAN galama' noyo ondo' masauk ra akim. Mangakim Io ra baal ragitio ra ulun ru Israil am ulun ru Amon.”

²⁸Kaa' kalo linio ru raja' Amon tanou intor ri Jipta no.

²⁹Paat raginio Ambiluo ru TUHAN nanguasa' ri Jipta. I Jipta pana liniput ra titikop Giliad am Manasi, am saguli' ra Mijpa giu' ra Giliad. Intor ra giu' ongoi io ra Amon.

³⁰Nabantu' i Jipta ra TUHAN, kono, “Amon mangiou TUHAN raki' mangala ra ulun ru Amon,

³¹mampataak aku ra ulun kasaa' toojo mingkual intor ra baloi kuno koson manguma' raki', ra aku makasaguli' intor ra pangayawan. Mampataak aku ra ulun no ra TUHAN koson ra taak simbalui koson mapabansuk ra guang ru TUHAN.”[19]

³²Ginio ra liminaup i Jipta ra sungoi koson mamulunsar ra ulun ru Amon am nangani' TUHAN riso ra kamanangan.

³³Nangayou toojo i Jipta risilo, intor ra Aroir saboi ra intok giu' ra liput ru Minit, ngaangai' no ruo ngoopor bandar, am saboi ra Abil-Kiramim. Masuang kaga' ulun ru Amon minatoi, saboi kinala ilo ru ulun ru Israil.

³⁴Paat i Jipta sumaguli' ra Mijpa, ratong anak ruandu' nano manguma' riso, liliwa' mansayau am mangkuli ra tamburing. Io anak langkuir ri Jipta.

³⁵Paat nakito ri Jipta anak nano, rinilak-rilak no bayang nano sabap mangiluk guang. Kono, “Alii ra anak kuno, natutuk guang kutu! Kua kia ra anak kutu ondo' maparuol ra guang kutu? Nagibot aku noyo ra TUHAN am kalo malugut ku bantu' kuno!”

³⁶Taam anak nano, “Amon nagibot kou noyo ra TUHAN, baalo' noyo atan ayuk pamakuan muno raki' koson manugut ra bantu' muno. Iniou ru TUHAN ra okou nansuli' ra ulun ru Amon, pantula'-pantula' muno.”

³⁷Indagu io poyo ra ama' nano, “Rondo' ayuk kitaakon kuno: Anii' aku buoi ruo ngansila', maa' raginio tumanggau aku giu' ra kagunungan mababaya' ra rangan-rangan kuno. Giu' no aku mangiluk guang sabap ra musiti' aku matoi paat ra lakat poyo ralaa.”

³⁸Nangiou ama' nano ra io mugar buoi ruo ngansila'. Nababaya' io ra rangan-rangan nano minongoi ra kagunungan koson mangiluk guang ra giu' no sabap matoi io ra kalo poyo uoton am makaanak.

³⁹Kopongo ruo ngansila', saguli' io ra ama' nano, am baalo' ru ama' nano atan ondo' binantu' no ra TUHAN. Ginio ra anak ruandu' nano minatoi paat lakat poyo ralaa. Ginio puun ru kaulayan giu' ra Israil, ra

⁴⁰anak-anak ralaa mugar buoi apat ngoorou ra moonong bilor koson mangiluk guang mangkara' ra anak ruandu' ri Jipta intor ra Giliad.