Read Timugon Murut TINGGANAI RU BANSA' 13 Bible Online

TINGGANAI RU BANSA' 13 - Timugon Murut bible

TINGGANAI RU BANSA' 13

¹Makatula poyo ulun ru Israil ra TUHAN, am nompoloso TUHAN ra ulun ru Palistin nanguasa' risilo buoi apat ngoopor ngambilor.

²Paat raginio, mokoondo' sangulun ungkuyon makainggalan ri Manoa, intor ra bandar Jora. Intor io ra bansa' ru Dan. Tabanang andu' nano.

³Paat ra sangarawan, minintalang malaikat ru TUHAN ra andu' ri Manoa am indagu, “Buoi ti kolondo' anak muno, kaa' kalo boo mabuoi maapang kou am maganak ra sangulun anak ungkuyon.

⁴Ginio ra alungi' toojo inan muno. Pai' panginum ra wain kapoam inumon makagauk, am pai' pangakan ra akanon majamol.

⁵Mopongo ra anak muno anakon, pai' lampari' abuk nano sabap intor ra io inanak, patimpokon anak no ri Aki Kapuuno' koson ra ulun Nazir.[21] Tumalimpuun io mapalabus ra ulun ru Israil intor ra kuasa' ru Palistin.”

⁶Ruandu' no pana minongoi ra ralaki nano am indagu, “Sangulun sinusub ri Aki Kapuuno' minatong raki'. Baal nano koson ra malaikat ri Aki Kapuuno' saboi nalaa' aku. Kalo nangkuot aku ati intor nano, am io pana kalo nambala' ra inggalan nano.

⁷Kaa' minindagu io raki' ra maapang aku am maganak ra sangulun anak ungkuyon. Nanginggalar io raki' manginum ra wain kapoam inumon makagauk kapoam mangakan ra akanon majamol, sabap kono, patimpokon anak no ri Aki Kapuuno' koson ra ulun Nazir buoi ru bayag nano.”

⁸I Manoa pana nakiasi' ra TUHAN, “Iou TUHAN, gama' ru manusub kou ra ulipon Muno matong poyo ramon, am mambala' ramon ra atan musiti' baalon mai ra anak no malupus io anakon.”

⁹Iniou ri Aki Kapuuno' kitaakon ri Manoa. Minatong poyo malaikat ri Aki Kapuuno' ra andu' ri Manoa paat io giu' ra umo. Paat raginio kalo nabaya' i Manoa ra andu' nano.

¹⁰Nasimbul ruandu' no ra nagindibok am pambala' ra ralaki nano, “Ilai' noyo, ulun ondo' minatong raki' ragili minatong poyo.”

¹¹Nagindibok i Manoa minaya' ra andu' nano. Mininggaar io ra ulun no am pangkuot, “Okou kia ondo' nagibit ra tanou ra andu' kuno ragili?” Taam io, “Iou.”

¹²Pangkuot boo i Manoa, “Amon ru atan ondo' rinagu muno masauk ra maagu no, atan kia ondo' musiti' baalon ru anak raginio? Ati kulaan baal ru bayag nano ra maagu no?”

¹³Taam malaikat ru TUHAN no, “Andu' muno musiti' mangkara' toojo ra bilin kutu.

¹⁴Kalo makaakan io ra atan pana ondo' intor ra puun ru anggur; kalo makainum io ra wain kapoam inumon makagauk, kapoam mangakan ra akanon majamol. Musiti' io mambaal ra ngaangai' bilin kuno.”

¹⁵Kalo nakapandai i Manoa ra ondo' minindagu no malaikat ru TUHAN. Ginio ra kono riso, “Paginaa poyo sangkinolor. Ansakin mai okou ra kambing mamulok.” Kaa' kon ru malaikat no, “Kabalu' pana maginaa aku ragiti, kalo mangakan aku ra akanon pabatangon mino. Kaa' amon ru masaga' kou manampos raginio niayuk, pataako' akanon no koson ra taak simbalui koson mapabansuk ra guang ru TUHAN.”[22]

¹⁷Kon ri Manoa, “Osoi kia inggalan muno, maa' raginio makapangurumat akai rirun paat ra masauk baal ondo' rinagu muno.”

¹⁸Pangkuot malaikat ru TUHAN no, “Kua masaga' kou makapandai ra inggalan kuno? Inggalan kuno inggalan ondo' makaimuag.”[23]

¹⁹Ginio ra nangalap i Manoa sanginan anak kambing am taak simbalui koson paringkuanangan,[24] am pabantaa' no ra rasawat ru batu am pataako' ginio ra TUHAN, iono TUHAN ondo' nambaal ra baal makaimuag.[25]

²⁰Tatanga' simbula' ru apui minsawat intor ra altar no, nakito ri Manoa am andu' nano malaikat ru TUHAN sumaboi ra limbowon ralalom simbula' ru apui no. Bagu no nakaliman i Manoa ra ondo' nakito nano iono malaikat ru TUHAN. Io am andu' nano pana kiminubu samba. Kalo boo igondo' ilo pakakito ra malaikat no.

²²Kon ri Manoa ra andu' nano, “Maaru' matoi to, sabap ra nakakito to noyo ri Aki Kapuuno'!”

²³Kaa' taam andu' nano, “Amon masaga' TUHAN mamatoi rito, maaru' kalo masaga' io mangapu ra taak simbalui koson mapabansuk ra guang ru TUHAN[26] am taak simbalui koson paringkuanangan[27] intor rito. Kalo niayuk manulu' Io rito ra ngaangai' baal ragitio, kapoam mambala' raginio rito raino ti.”

²⁴Kukula' ngansila' raginio, naganak ruandu' no ra sangulun anak ungkuyon. Anak no ininggalanan ri Simson. Siminukor anak no am nambarakat TUHAN riso.

²⁵Tumalimpuun kuasa' ru TUHAN mangikang riso paat io giu' ra Pangkiman ru Dan, ondo' nangkilolot ra Jora am Isytaol.