Read Timugon Murut TINGGANAI RU BANSA' 14 Bible Online

TINGGANAI RU BANSA' 14 - Timugon Murut bible

TINGGANAI RU BANSA' 14

¹Paat ra sangarawan minongoi i Simson ra Timna, am giu' no nakakito io sangulun ralaa ru Palistin.

²Uli' i Simson ra baloi am pambala' ra matuo nano. Kono, “Malaai aku ra sangulun ralaa ru Palistin. Tamungi' io raki'. Masaga' aku manangandu' riso.”

³Kaa' kon ru matuo ri Simson riso, “Kua kia pampili' kou ra andu' ra gino ngai' ru ulun ru Palistin, kaa' ilo kalo nakasimpung ra ulun ri Aki Kapuuno'? Kalo kia makauyum kou ra sangulun ralaa intor ra bansa' takau galama', kapoam ra gino ngai' ru bansa' takau?” Taam i Simson, “Ralaa ru Palistin raginio kalaayan kuno. Masaga' aku ra tamungin mu io raki'.”

⁴Kalo nakapandai matuo ri Simson ra TUHAN nambaal ri Simson mambaal raginio, sabap ra tatanga' TUHAN maguyum ra kaluagan mamulunsar ra ulun ru Palistin. Paat raginio ulun ru Palistin nanguasa' ra ulun ru Israil.

⁵I Simson pana minongoi ra Timna nababaya' ra matuo nano. Paat ilo mansail ra umo ru anggur ra giu' no, norongog ri Simson bolos ru sanginan singa' mamulok.

⁶Namulali' i Simson maikang ru kuasa' ru TUHAN. Bibinsango' boo ri Simson singa' no ra kalindu' nano, koson ayuk bibiag no ra sanginan anak kambing. Kalo nambala' i Simson ra matuo nano ra baal raginio.

⁷Kopongo raginio tuumo' ri Simson ralaa no am makimansunur riso. Malaai i Simson riso.

⁸Kopongo kukula' buoi, saguli' i Simson ra intok raginio koson maguot ra ralaa no. Giu' ra tanga' ralan, lisang i Simson ra masaga' magilong ra singa' ondo' pinatoi nali. Paat nakasaboi ra giu' no nakito no sampanon maningot am niayuk ruu' maningot ralalom ru baangkai ru singa' no.

⁹Nangalap io ra ruu' maningot no ra kalindu' nano, am narayus minugar liliwa' nangakan ra ruu' maningot no. Nangani' io sanganu ruu' maningot ra matuo nano, am ilo pana nangakan raginio. Kaa' kalo nambala' i Simson risilo ra inalap no ruu' maningot no intor ra ralalom baangkai ru sanginan singa'.

¹⁰Minongoi ama' ri Simson ra baloi ru ralaa no, am nambaal i Simson ra bunsag ra giu' no. Gitio noyo kaulayan ru ungkuyon mamulok paat raginio.

¹¹Paat ra ulun ru Palistin nakakito ri Simson, nanusub ilo ra talu ngoopor ngaulun ungkuyon mamulok mamparangan riso.

¹²Kon ri Simson ra ungkuyon-ungkuyon mamulok no, “Rongogo' sundait ragitio. Amon ru makataam kau ra motopot ra kalo poyo makai' tulu' ngoorou bunsag ru paguatan ti, mangani' aku ra moonong ulun rondo' konoon linon malumis am sapasang bayang ondo' moonsoi.

¹³Kaa' amon ru kalo makataam kau, moonong ulun musiti' mangani' raki' ra konoon linon malumis am sapasang bayang ondo' moonsoi.” Kon ru ungkuyon-ungkuyon mamulok no, “Sabito' noyo sundait muno. Rumongog akai.”

¹⁴Kon boo ri Simson, “Intor ra ondo' mangakan, mokoondo' ra akanon; intor ra ondo' maikang, mokoondo' ra matamis.” Kopongo talu ngoorou, lakat poyo kalo nakataam ilo ra sundait no.

¹⁵Paat ra orou kaapat,[28] indagu ilo ra andu' ri Simson, “Labati' ralaki muno maa' raginio mambala' io ra arati' ru sundait no. Amon ru kalo, solobon mai okou am baloi ru ama' muno.[29] Gitio nai ra akau ruo nangkimait ramon ra kuayan min mantakou ramon!”

¹⁶Ginio ra nantangi' andu' ri Simson am indagu ri Simson, “Kalo motogom kou raki'. Nangani' kou ra sundait ra rangan-rangan kuno, kaa' kalo nambala' kou raki' ra arati' no. Masisang kou raki'.” Kon ri Simson, “Rongogo' galing! Matuo kuno pana kalo binalaan ku ra arati' no. Kua balai' tokou?”

¹⁷Narayus nantangi' andu' ri Simson buoi tulu' ngoorou ru bunsag no. Paat orou ra katulu', nambala' i Simson ra arati' ru sundait no riso sabap ra narayus andu' nano sisingi'. Kopongo raginio nambala' andu' nano ra arati' no ra ulun ru Palistin.

¹⁸Ginio sabap ra paat orou ra katulu' no niayuk, ra kalo poyo minumpos i Simson ra lamin pambalangan nano,[30] indagu ungkuyon-ungkuyon mamulok ru bandar no riso, “Atan kia ondo' matamis intor ra ruu' maningot? Atan kia ondo' maikang poyo intor ra singa'?” Taam i Simson, “Amon ru kalo linolob min andu' kuno, maaru' kalo poyo makataam kau raginio.”

¹⁹Namulali' i Simson maikang ru kuasa' ru TUHAN, am ongoi io ra Askilon am namatoi ra talu ngoopor ngaulun ungkuyon ra giu'. Nangalap io ra bayang moonsoi ondo' binayang nilo am pataako' no ginio ra talu ngoopor ngaulun ondo' nakataam ra sundait no. Kopongo raginio, minuli' io ra baloi ra guang pansagulian am siminangit.

²⁰Andu' ri Simson pana pinataak boo ra ulun ondo' nasauk ra mamaya' ri Simson paat ra paguatan.