Read Timugon Murut TINGGANAI RU BANSA' 16 Bible Online

TINGGANAI RU BANSA' 16 - Timugon Murut bible

TINGGANAI RU BANSA' 16

¹Sangarawan raginio minongoi i Simson ra Gaja. Giu' no nakatuum io ra sangulun ruandu' mantalan ra inan, am narulug ra ruandu' no.

²Norongog ru mamagun ru Gaja ra soroi i Simson ra giu' no. Ginio ra inawangan nilo intok raginio am naginaa riso giu' ra kulobon garabang ru bandar ra nosorondom. Kaa' kalo makapambaal ilo ra atan-atan sabap ra mangkara' ilo, “Paat makasirang mato ru orou ra maagu no, bagu no potoyon takau io.”

³Kaa' kalo nokororot i Simson saboi ra susuab. Paat tanga' ru rondom siminukal io am ongoi ra kulobon garabang ru bandar. Namubul io ra kulobon no ngaangai' am lugu'-lugu' am umpok-umpok. Kopongo raginio sinaanan no ngaangai' no am inibit no ra tampak ru bulur ondo' nantaluma' ra Gibron.

⁴Kopongo raginio malaai i Simson ra sangulun ruandu' makainggalan ri Dilila, ondo' minayan giu' ra Pipit Sorik.

⁵Ratong limo ngaulun raja' Palistin ri Dilila am indagu, “Labati' noyo i Simson koson mambala' rirun ra inopot ru kaikangan nano, am ralan mangiru' ra kaikangan nano maa' raginio makaratong akai mamangkil riso, am mangala riso. Maagu no moonong intor ramon mangani' rirun 1,100 ngampila' ruit pirok.”

⁶Ginio sabap ra indagu i Dilila ri Simson, “Simson, kua kia maikang kou kaga'? Atan kia pamangkil rirun maa' raginio mariu' kaikangan muno? Pambala' ra inopot no!”

⁷Taam i Simson, “Amon ru bangkilon aku ra tulu' kalat ru busur ondo' baguon am kalo poyo mapua', malawo aku koson ra ulun kaindalaman.”

⁸Ginio ra pangani' raja'-raja' ru Palistin ri Dilila ra tulu' kalat ru busur ondo' baguon am kalo poyo mapua'. Binangkil ri Dilila i Simson ra kalat ru busur no.

⁹Liliwa' raginio, nanusub i Dilila ra kukula' ngaulun Palistin maginaa giu' ra lamin ra bokon. Golok io boo, “Simson! Matong ulun ru Palistin!” Inukat rayuso' ri Simson kalat ru busur no koson ra banang natiu' ra apui. Lakat poyo kalo nakapandai ilo ra inopot ru kaikangan ri Simson.

¹⁰Indagu boo i Dilila ri Simson, “Nanganja' kou raki'. Nagabau kou raki'. Pambala' ga ati kulaan maalap kou ra bangkil.”

¹¹Indagu i Simson riso, “Amon ru bangkilon aku ra kalat baguon ondo' kalo poyo igondo' pinakai, malawo aku koson ra ulun kaindalaman.”

¹²Ginio ra bangkilo' io ri Dilila ra kukula' kalat baguon, am golok i Dilila, “Simson! Matong ulun ru Palistin!” Liliwa' raginio maginaa ulun ru Palistin giu' ra lamin ra bokon. Kaa' inukat ri Simson kalat ondo' pinabangkil ra kalindu' nano koson ra ulun mangukat ra banang.

¹³Kopongo raginio indagu i Dilila ri Simson, “Lakat poyo manganja' kou raki'. Nagabau kou raki'. Balai' aku ati kulaan maalap kou ra bangkil.” Indagu i Simson riso, “Amon ru pabaliton mu katulu'-tulu' sulampir ra abuk kutu ra kuliamos pambaal ra konoon no, am igoton ra paku' tataun, malawo aku koson ra ulun kaindalaman.”

¹⁴Pinororot ri Dilila i Simson. Pinambalit ri Dilila katulu'-tulu' sulampir ru abuk ri Simson ra kuliamos pambaal ra konoon no, am inigot no ra rondo' paku' tataun. Golok boo i Dilila, “Simson! Matong ulun ru Palistin!” Kaa' sukal i Simson am bunduko' abuk nano saboi nairu' intor ra kuliamos pambaal ra konoon no.

¹⁵Indagu boo i Dilila ri Simson, “Ai, kamu malaai raki', kaa' guang muno maalur intor raki'! Intalu kou noyo panganja' raki' am saboi raino pana kalo masaga' kou mambala' raki' ra sabap muno maikang kaga'.”

¹⁶Moonong orou marayus i Dilila sisingi' am mampajajal, saboi nasuraan i Simson mangkirongog raginio.

¹⁷Pupus no tunungo' ri Simson inopot nano. Kono, “Abuk kutu kalo poyo igondo' linompor. Intor ra tininai' pinataak aku noyo ri Aki Kapuuno' koson masauk ra ulun Nazir. Amon ru lomporon abuk kutu, ngaangai' kaikangan kuno mairu'. Malawo aku koson ra ulun kaindalaman.”

¹⁸Nalimanan ri Dilila ra nantunung noyo i Simson ra inopot nano. Ginio ra nanusub i Dilila ra ulun mambala' ra raja'-raja' ru bansa' ru Palistin, “Ratong noyo ra raino ti ayuk. Nantunung noyo i Simson ra inopot nano.” Ilo pana minatong liliwa' nagibit ra ruit ri Dilila.

¹⁹Pinororot ri Dilila i Simson ra paa nano, am nanusub ra ulun mopolompor ra tulu' sulampir ru abuk ri Simson. Tumalimpuun boo i Dilila mangimbolo' ri Simson, sabap ra nairuan noyo i Simson ra kaikangan nano.

²⁰Golok i Dilila, “Simson! Matong ulun ru Palistin!” Sukal i Simson am mangkara', “Makalabus aku koson ragili.” Kalo nalimanan ri Simson ra nangiruan noyo TUHAN riso.

²¹Ginio ra ulun ru Palistin namparakop ri Simson am kiulo' karuruo unor ru mato nano. Nagibit ilo riso giu' ra Gaja, am rinantai io ra rantai gangsa'. Giu' no pinasubol i Simson ra pangaputan am jinajalan manginsar ra gandum.

²²Kaa' abuk ri Simson tumalimpuun tumuu' saguli'.

²³Paat ra sangarawan, natitimung raja'-raja' ru Palistin koson munsag am mapataak ra taak simbalui ra maayo ri Dagon, dewa nilo. Kon ru raja'-raja' no, “Nangani' noyo dewa takau ra kamanangan ritakau ri Simson, pantula' takau!”

²⁴Liliwa' maansukan, indagu raja'-raja' no, “Piawo' i Simson am susubo' io mapabansuk ritakau!”[35] Inibit nilo i Simson mingkual intor ra pangaputan am nanusub riso mapabansuk risilo.[36] Nanusub ilo riso migor ra lolot ru ruo lugu' ondo' maayo. Paat ra ulun masuang nakakito ri Simson, pongompor ilo ra dewa nilo am parimbai, “Nangani' noyo dewa takau ra kamanangan ritakau ra pantula' ondo' napalunsai ra pagun takau am namatoi ra masuang kaga' ulun takau!”

²⁶Kon ri Simson ra lalaing ungkuyon ondo' nangitang riso no, “Pokopoo' kalindu' kutu ra lugu'-lugu' ondo' nanungka' ra bangunan ti. Masaga' aku sumandig ra giu' no.”

²⁷Bangunan no nososok ra ungkuyon am ruandu'. Kalimo-limo ngaulun raja' ru Palistin no soroi ra giu' no. Giu' ra taap ru bangunan no mokoondo' olo'-olo' talu ngaribu ngaulun ungkuyon am ruandu'. Ilo ngaangai' nagilong ri Simson ondo' mapabansuk risilo.[37]

²⁸Pakiasi' boo i Simson, “Iou TUHAN Raja', pakakara' noyo raki'. Indangano' aku ra raino ti ayuk, iou Aki Kapuuno'. Anii' aku ra kaikangan kuli saguli' maa' raginio ra timbalos ti makapansuli' aku ra bansa' ru Palistin ondo' nanguol ra karuruo unor ru mato kuno.”

²⁹Kopongo raginio guuto' ri Simson karuruo lugu' ondo' nanungka' ra bangunan no. Liliwa' io napakapo ra kalindu' kait nano ra saluguan am kalindu' pamiris nano ra saluguan ra bokon,

³⁰golok io, “Polosoon noyo aku matoi mababaya' ra bansa' ru Palistin ti!” Juuli' no lugu'-lugu' no ra nakai' ikang nano, am kapuut bangunan no am nakatiu' ra limo ngaulun raja' ru Palistin am ngaangai' ulun ra giu' no. I Simson pana minatoi, kaa' paat ra pinatayan nano namatoi io masuang poyo ulun intor ra paat io naayag.

³¹Ratong boo ngaangai' pabukat-pabukat ungkuyon nano am ngaangai' bala ru sasambaloi nano nangalap ra baangkai nano. Inibit nilo baangkai nano minuli' am linobong io giu' ra ralalom ru lobong ri Manoa, ama' nano. Lobong no giu' ra lolot ru Jora am Isytaol. Nasauk i Simson ra tingganai ru Israil buoi ruo ngoopor ngambilor.