Read Timugon Murut TINGGANAI RU BANSA' 19 Bible Online

TINGGANAI RU BANSA' 19 - Timugon Murut bible

TINGGANAI RU BANSA' 19

¹Paat ra Israil kolondo' poyo raja', mokoondo' sangulun Liwi ondo' minayan giu' ra asak ru kabuluran Ipraim. Mokoondo' io sangulun ruandu' parulug intor ra Bitligim giu' ra Jiuda.

²Kaa' sangit boo ruandu' parulug nano riso, am saguli' ra baloi ru ama' nano giu' ra Bitligim. Kopongo ruandu' no minayan ra giu' buoi apat ngansila',

³sunuo' ru ulun ru Liwi no ruandu' parulug nano am kinam manimayo riso ra sumaguli' riso. Nagibit ulun ru Liwi no ra sangulun ulipon am ruo ngainan kaladai nabaya' riso. Pakasaboi ra giu' no, ibito' io ru ruandu' parulug nano ra ama' nano. Paat ama' ru ruandu' no nakakito ra ulun ru Liwi no, inuma' no io ra kaansukan,

⁴am nanginga' riso maa' raginio ra kalo muli'. Minayan ulun ru Liwi no ra giu' buoi talu ngoorou am nangakan nanginum am nombolong ra giu' no nabaya' ra ruandu' parulug nano.

⁵Paat ra iosusuab ru orou kaapat, riminondom ilo karat ra masaga' mugar. Kaa' indagu ama' ru ruandu' no ra ulun ru Liwi no, “Akan galing ra akau kalo poyo mugar. Malimanan min ra maikang kau poyo. Mopongo raginio paugaron kau.”

⁶Ginio ra panturung ulun ru Liwi no, am pangakan am panginum nabaya' ra ama' ru ruandu' no. Indagu boo ama' ru ruandu' no, “Ayan poyo sorondom am katasu'-tasu' no.”

⁷Ingkakat ulun ru Liwi no ra masaga' mugar, kaa' panginga' ama' ru ruandu' no maa' raginio sumoroi io. Ginio ra ayan ulun ru Liwi no sorondom poyo.

⁸Paat ra kalimo ra orou, riminondom toojo ulun ru Liwi no karat ra masaga' mugar. Kaa' indagu ama' ru ruandu' no, “Akan galing. Maagu no mugar.” Ginio ra ilo ruo nabaya' nangakan am totoi-totoi saboi tumolop galing mato ru orou.

⁹Paat ra ulun ru Liwi no, ruandu' parulug nano, am ulipon nano masaga' mugar, indagu ama' ru ruandu' no, “Ilai', lumondom galing noyo. Moonsoi poyo mombolong kau ragiti am katasu'-tasu'. Susuab no rumondom kau karat am muli'.”

¹⁰Kaa' kalo boo masaga' ulun ru Liwi no mayan. Ugar io am ruandu' parulug nano, nabaya' ra ulipon nano am ruo ngainan kaladai ondo' makapalana. Paat lumondom galing noyo, nakasaboi ilo maar ra Jibus (iono Jirusalim). Ginio ra indagu ulipon nano riso, “Tuan, uog takau am pombolong ra bandar ru ulun ru Jibusi ti.”

¹²Kaa' taam tuan nano, “Kalo! Kalo muog takau ra bandar ru ulun sala' ka Israil. Rayuson takau pangkiralanan sanganu poyo am mombolong giu' ra Gibia kapoam Rama.”

¹⁴Ginio ra nansail ilo ra Jibus am naparayus ra pangkiralanan. Nokotolop noyo mato ru orou paat ilo nakasaboi giu' ra Gibia, giu' ra wilayah ru bansa' ru Binjamin.

¹⁵Minapit ilo ra bandar no sabap masaga' mayan ra giu' no. Nanturung ilo giu' ra padang ru bandar, kaa' kolondo' sangulun pana ondo' nangkimait risilo mombolong ra baloi.

¹⁶Liliwa' ilo nanturung giu' ra padang ru bandar, ratong sangulun matutuo ondo' bagu ayuk muli' intor ra kandoi nano ra umo. Ulun matutuo no intor ra kabuluran Ipraim kaa' raino minayan io giu' ra Gibia. (Kasuangan mamagun ra giu' no ulun ru bansa' ru Binjamin.)

¹⁷Pakakito ulun matutuo no ra ulun ru Liwi no giu' ra padang ru bandar, kuati' no io, “Ati intor min am ati angayan min?”

¹⁸Taam ulun ru Liwi no, “Bagu akai ayuk intor ra Bitligim giu' ra Jiuda am mangkiralan muli' ra baloi[41] giu' ra kabuluran Ipraim. Intor aku ra giu' no. Kolondo' sangulun pana masaga' mopoolong ramon ra bandar ti.

¹⁹Naukop linutu' mai. Mokoondo' akai ra rami am akanon ru kaladai mai, am niayuk ruti' am niayuk wain tayar ru ruandu' parulug am ulipon kuno.”

²⁰Indagu ulun matutuo no, “Ongoi ra baloi kuno! Ukopon ku ngaangai' lutu' mino. Pai' pombolong ra padang ru bandar.”

²¹Io pana nagibit boo risilo ra baloi nano am nampakan ra kaladai nilo. Kopongo tambului nano nambagu' ra kalayam, pangakan am panginum ilo.

²²Tatanga' ilo maansukan, pulusat ru kukula' ngaulun ondo' jajajou paliso intor ra bandar no nagawang ra baloi no, am tumalimpuun maningkag ra kulobon. Indagu ilo ra ulun matutuo no, “Pataako' ungkuyon ondo' giu' ra baloi muno. Masaga' akai rumulug riso!”

²³Ingkual ulun matutuo no am indagu risilo, “Pai' rangan kau. Pai' baalo' baal malaat no! Ulun ti tambului ku.

²⁴Pataakon ku ayuk ruandu' parulug nano am anak ralaa kuno galama'. Alapo' ayuk ilo. Guguang min ayuk mambaal saboi kau majala' risilo. Kaa' pai' baalo' baal malaat ti ra tambului kutu!”

²⁵Kaa' gino ilo jajajal, juuli' ru ulun ru Liwi no ruandu' parulug nano mingkual tayar nilo. Ilo pana namparulug ra ruandu' no ra kalo liminonggo' saboi nasuaban.

²⁶Paat ra tumawang orou, saguli' ruandu' no, kaa' tuma' ra kulobon ru baloi ru ulun matutuo no, intok nambalangan ru ralaki nano, naratu' io. Lakat io poyo ra giu' no paat sumirang mato ru orou.

²⁷Iosusuab raginio, paat nakarat ralaki nano am nangukab ra kulobon ra mugar, kakito no ruandu' parulug nano nakalangan ra tuma' ru kulobon am kalindu' nano giminuut ra kulobon.

²⁸Indagu io riso, “Sukal no, ugar takau.” Kaa' kalo timinaam ruandu' no ra minatoi noyo. Kayango' no boo ruandu' no am posokoyo' ra kaladai am uli' ra baloi nano.

²⁹Pakasaboi io ra baloi, umpos io am nangalap ra pais, am puputulo' no baangkai ru ruandu' parulug nano, nasauk mopor am ruo ngaputul. Pinaator no putul-putul no ra mopor am ruo bansa' ru Israil, sigagama' saputul.

³⁰Moonong ulun ondo' nakakito ra putul ru baangkai no mindagu, “Kalo igondo' akai pokorongog ra baal koson ragitio! Baal ragitio kalo poyo igondo' kasauk intor ra ulun ru Israil nangiruan ra Misir! Musiti' takau mansusunur koson tumimbalos!”