Read Timugon Murut TINGGANAI RU BANSA' 2 Bible Online

TINGGANAI RU BANSA' 2 - Timugon Murut bible

TINGGANAI RU BANSA' 2

¹Intor Malaikat ru TUHAN ra Gilgal minongoi ra Bokim, am indagu ra ulun ru Israil, “Nagibit Aku ramuyun miningkual intor ra Misir am naningganai ramuyun minongoi ra tana' ondo' binantu' Kuno ra kinamatuaan min. Indagu Aku, ‘Totopot kalo sulangon Ku nabantuan Kuno ramuyun.

²Ginio ra kalo pambaalon kau ra nabantuan ra atan pana ra mamagun ru pagun no. Musiti' puuton min altar nilono.’ Kaa' kalo binaal min atan ondo' nanusuban Kuno. Binaal min poyo ondo' suai raginio!

³Ginio ra, raino rongogo' noyo! Kalo pagiruon Ku mamagun ru pagun ti paat akau mamulunsar risilo. Masauk ilo ra pantula' min, am malandak kau saboi maya' kau niayuk sumamba ra dewa-dewa nilo.”

⁴Kopongo minindagu malaikat no, ngaangai' ulun ru Israil nantangi' ra mosongou.

⁵Ginio sabap ra intok no ininggalanan ra Bokim.[6] Giu' no nampataak ilo ra taak simbalui ra TUHAN.

⁶Kopongo i Josua nanusub ra ulun ru Israil minugar, ilo pana minugar minongoi ra tana' ondo' tayar nilo sigagama' ra ayanin.

⁷Buoi i Josua naayag, nangandoi ulun ru Israil ra TUHAN. Kopongo i Josua minatoi, nagulayun ulun ru Israil nangandoi ra TUHAN buoi ilo tiningganai ru tingganai-tingganai Israil ondo' nakakito ra binaal maayo ru TUHAN ra ulun ru Israil.

⁸I Josua anak ri Nun, ulipon ru TUHAN no minatoi paat umur nano maatus am mopor ngambilor.

⁹Linobong io ra tana' nano galama', giu' ra Timnat-Sira, giu' ra kabuluran ru Ipraim, tampilon ralayo ru Gunung Gaas.

¹⁰Kopongo raginio ngaangai' ulun ru Israil intor ra sukor raginio minatoi. Sukor bagu kalo nakaulig ra TUHAN sabap kalo nakaili' ilo ra atan ondo' binaal ru TUHAN tayar ru Israil.

¹¹Ulun ru Israil pana makatula ra TUHAN. Kalo boo sumamba ilo ra TUHAN i Aki Kapuuno' ru kinamatuaan nilo, iono i Aki Kapuuno' ondo' nagibit risilo miningkual intor ra Misir. Tumalimpuun ilo sumamba ra Baal am Asyitorit am niayuk dewa-dewa ondo' sinamba ru ngaangai' bansa' giu' ra libung nilo. Ginio ra siminangit TUHAN risilo am nopoloso ra mantatakou namulunsar am nantakou risilo. Kalo makalulu' ilo manggal ra pantula' ra libung nilo.

¹⁵Moonong ra ilo mongoi pangayou, manggal TUHAN risilo, koson ra ondo' pinakara' Nano risilo. Natiu' ilo ra kapaganan ondo' maayo kaga'.

¹⁶Ruruli' TUHAN manaak ra ulun ru Israil ra tingganai koson mapalabus risilo intor ra pulalai ru ulun mantatakou.

¹⁷Kaa' kalo lioon ru ulun ru Israil tingganai-tingganai no. Kalo giminagaya' ilo ra TUHAN; siminamba ilo ra tuhan ra bokon. Giminagaya' kinamatuaan nilai ra susuban ru TUHAN, kaa' sukor bagu kalo nambaal koson raginio.

¹⁸Paat ra TUHAN manaak risilo ra sangulun tingganai, mangindangan TUHAN ra tingganai no am mamayag risilo intor ra pantula' buoi ru tingganai no maayag. Makaasi' TUHAN risilo paat ra ilo maguros sabap inimbolo' am inulipon.

¹⁹Kaa' kopongo tingganai no matoi, manampaliso ulun ru Israil ra malaat poyo intor ra sukor ra kalo poyo raginio. Siminamba am nangandoi ilo ayuk ra ngaangai' tuhan ra bokon. Siminaguli' ilo ra kaindalaman nilo ondo' malaat am kalo masaga' mangulau ra paliso nilo.

²⁰Ginio ra siminangit kaga' TUHAN ra ulun ru Israil am mindagu, “Liminungkang noyo bansa' ragitio ra nabantuan ondo' binaal Kuno ra kinamatuaan nilo. Giminuor ilo Raki'.

²¹Ginio ra raino kalo boo pagiruon Ku bansa' ra ati pana ondo' lakat poyo minayan ra pagun ti paat i Josua minatoi.

²²Pakayon Ku bansa'-bansa' raginio koson mangkinam ra ulun ru Israil, maa' raginio makapandai Aku ru sumugut kia ulun ru Israil ra susuban Kuno koson ra kinamatuaan nilo kapoam kalo.”

²³Ginio sabap ra kalo nanaak TUHAN ri Josua ra kamanangan ra bansa'-bansa' raginio. Kaa' nopoloso TUHAN risilo mayan ra pagun no am kalo mataki' napagiru' risilo.