Read Timugon Murut TINGGANAI RU BANSA' 20 Bible Online

TINGGANAI RU BANSA' 20 - Timugon Murut bible

TINGGANAI RU BANSA' 20

¹Ngaangai' ulun ru Israil intor ra Dan ra tampilon ralayo, saboi ra Birsyiba ra tampilon rabugus, am niayuk intor ra Giliad ra tampilon sirangon, naninong ra piau no. Timinimung ilo koson santimungan ulun ra saang ru TUHAN ra Mijpa.

²Ngaangai' no 400,000 ngaulun saujor nanakinandoi mangayou ondo' nasauk ra pulalai mantana'. Tingganai-tingganai intor ra moonong bansa' ru Israil niayuk siminaang ra pantimungan ru ulun ri Aki Kapuuno' no.

³Liliwa' raginio norongog ru ulun ru bansa' ru Binjamin ra ngaangai' ulun ru Israil ra bokon timinimung noyo ra Mijpa. Indagu ulun ru Israil, “Tunungo' ati kulaan kalaatan no nasauk.”

⁴Taam ulun ru Liwi ondo' ruandu' parulug nano ra minatoi no, “Aku am ruandu' parulug kuno minapit am nombolong giu' ra Gibia, giu' ra wilayah Binjamin.

⁵Pulusat ru mamagun ru Gibia minatong naguyum raki' paat ra rondom. Pinagawangan nilo baloi no sabap masaga' mamatoi raki'. Kaa' rinulug nilo ruandu' parulug kuli saboi io minatoi.

⁶Alapo' ku baangkai no am puputulo', am atari' ra mopor am ruo bansa' ru Israil, sigagama' saputul. Binaal ku ginio sabap nambaal ulun ru Gibia ra baal malaat am makauyuyu' ra tatanga' ru ulun ru Israil.

⁷Ngaangai' ondo' siminaang ragiti ulun ru Israil. Raino, raguo' noyo atan ondo' musiti' takau baalon.”

⁸Ngaangai' ulun ondo' timinimung ra giu' no minigor, am nagampan ilo mindagu, “Kolondo' sangulun pana intor ritakau muli' ra kim kapoam ra baloi.

⁹Gitio noyo baalon takau: Mangundi' takau koson mangaru' ra ulun ondo' musiti' mamulunsar ra Gibia.[42]

¹⁰Mopor piatus intor ra suang ru ungkuyon ru Israil musiti' manampos ra akanon tayar ru saujor ondo' mongoi pamulunsar. Kaa' bokon no musiti' mangukum ra Gibia[43] sabap kalaatan ondo' binaal nilo ra gino ngai' ru ulun ru Israil.”

¹¹Koson raginio noyo ulun ru Israil natimung koson mamulunsar ra bandar no.

¹²Nanusub ulun ru Israil ra kukula' ngaulun mongoi ra titikop wilayah ru Binjamin koson mapasaboi ra tanou ragitio, “Atan kalaatan ondo' nasauk ramuyun?

¹³Pataako' ngaangai' ulun ondo' jajajou paliso intor ra Gibia no maa' raginio potoyon mai ilo am mairu' kalaatan no intor ra Israil.” Kaa' ulun ru Binjamin kalo nampalio ra ragu ru ulun ru Israil ra bokon no.

¹⁴Ulun ru Binjamin no poyo boo minatong ra Gibia intor ra ngaangai' bandar Binjamin koson mamulunsar ra ulun ru Israil ra bokon.

¹⁵Paat orou raginio nanimung ulun ru Binjamin ra suang 26,000 ngaulun saujor intor ra bandar-bandar nilo. Mamagun ru Gibia no nampili' ra 700 ngaulun ungkuyon[44] ondo' kipang. Moonong ulun no matasik momobol ra batu ra mamakai ra pombobol. Amon momobol ilo, kalo igondo' najajou kabalu' pana santiis abuk.

¹⁶

¹⁷Ra bala ru ulun ru Israil ra bokon, suang 400,000 ngaulun saujor ondo' naila' timinimung noyo.

¹⁸Ongoi ulun ru Israil ra intok sambayangan giu' ra Bitil am pangkuot ri Aki Kapuuno', “Ati ra bansa' ondo' musiti' no kasaa' mamulunsar ra ulun ru Binjamin?” Taam TUHAN, “Bansa' ru Jiuda.”

¹⁹Suabon no ra iosusuab ulun ru Israil minugar am nangkim maar ra bandar Gibia.

²⁰Minongoi ilo pamulunsar ra saujor ru Binjamin, napaayan ra pulalai mangayou nantuma' ra bandar no.

²¹Ingkual saujor ru Binjamin intor ra bandar Gibia, am namulunsar am namatoi ra 22,000 ngaulun saujor ru Israil paat orou raginio.

²²Sabap ra nakalaan raginio, minongoi poyo ulun ru Israil ra intok sambayangan am nantangi' ra saang ru TUHAN saboi ra rondom. Nangkuot ilo poyo ri Aki Kapuuno', “Musiti' kia akai mangayou poyo ra ulun ru Binjamin, pabukat mai no?” Indagu TUHAN, “Iou.” Ginio ra naantak saguli' ulun ru Israil am nangatang ilo ra barisan nilo koson ra orou kasaa'.

²³

²⁴Minongoi ilo bulunsar ra saujor ru Binjamin ra kainduo.

²⁵Kainduo ti poyo miningkual ulun ru Binjamin intor ra Gibia am namulunsar ra ulun ru Israil. Raino ti namatoi ilo ra 18,000 ngaulun saujor naila'.

²⁶Igondo' poyo ulun ru Israil minongoi ra Bitil am nantangi' ra saang ru TUHAN. Nampali ilo ra giu' no saboi ra rondom. Napataak ilo ra taak simbalui koson makibarakat ra TUHAN[45] am taak simbalui koson mapabansuk ra guang ru TUHAN.[46]

²⁷Paat raginio Kaban Nabantuan ri Aki Kapuuno' soroi giu' ra Bitil, am i Pinigas anak ri Iliajar, akupu ri Arun mangandoi koson imam. Nangkuot boo ulun ru Israil ra TUHAN, “Musiti' kia akai mangayou poyo ra bansa' ru Binjamin, pabukat mai no? Kapoam musiti' kia langgain mai pangayawan ti?” Taam TUHAN, “Pangayou kano! Susuab no mangani' Aku ramuyun ra kamanangan risilo.”

²⁸

²⁹Korongog taam raginio, ulun ru Israil napaayan ra saujor-saujor nilo giu' ra liliut ru Gibia koson suminok mamulunsar.

³⁰Paat ra orou ra katalu namulunsar ilo ra saujor ru Binjamin, liliwa' nangatur ra barisan manggal ra Gibia koson ondo' binaal paat ra orou-orou ra buoi ti.

³¹Ingkual ulun ru Binjamin ra mangayou am inakalan ilo maa' raginio minggalur ra bandar. Koson ragili, tumalimpuun ilo mamatoi ra saujor ru Israil giu' ra intok malimparang giu' ra liwar bandar ra ralan ondo' sumaboi ra Bitil am Gibia. Namatoi ilo olo'-olo' talu ngoopor ngaulun ru Israil.

³²Ginio ra indagu ulun ru Binjamin, “Kinala mai noyo ulun ru Israil koson ragili.” Kaa' ulun ru Israil siminingon liminugut koson magakal ra saujor ru Binjamin mongoi ra ralan-ralan giu' ra liwar bandar.

³³Paat ra saujor ru ulun ru Israil liminugut am timinimung saguli' giu' ra Baal-Tamar, saujor-saujor nilo ondo' pinaayan giu' ra liliut ru Gibia no namulali' miningkual intor ra nansibunian giu' ra intok makabatu ra liliut ru bandar.[47]

³⁴Ilo no saujor ondo' napili' intor ra titikop ru Israil; suang no 10,000 ngaulun. Kasauk boo pangayawan ondo' makalalaa' paat 10,000 ngaulun no namulunsar ra Gibia. Kalo toojo nangkara' ulun ru Binjamin ra maala ilo ra kalo boo mabuoi.

³⁵Nangani' TUHAN ra ulun ru Israil ra kamanangan ra saujor ru Binjamin. Paat orou raginio namatoi ulun ru Israil ra 25,100 ngaulun saujor ru Binjamin.

³⁶Bagu no nakaliman ulun ru Binjamin ra naala ilo. Santayaran maayo intor ra saujor ru Israil siminingon lugut intor ra saujor ru Binjamin. Malansan ilo ra saujor-saujor giu' ra intok-intok pansibunian giu' ra libung ru Gibia.

³⁷Saujor-saujor ondo' nansibuni no nagindibok siminubol ra bandar Gibia am namatoi ra ngaangai' ulun ondo' soroi ra bandar no.

³⁸Nampakat noyo ulu toojo ru saujor ra pulalai ondo' nansibuni, ra paat nilo makito lisun makapal minsawat intor ra bandar no,

³⁹ulu toojo ru saujor musiti' muli' am mamulunsar ra pantula'. Paat raginio saujor ru Binjamin namatoi noyo ra 30 ngaulun saujor ru Israil. Nangkara' ilo, “Kinala mai noyo ilo koson ragili.”

⁴⁰Kaa' pulali' ru lisun makapal mininsawat intor ra tatanga' ru bandar no. Nakatigog ulun ru Binjamin paat ilo nangkaili ra tinaulian am nakito titikop ru bandar nilo nosolob.

⁴¹Paat raginio niayuk riminuli' saujor ru Israil namulunsar risilo, am baal ru saujor ru Binjamin nataliajou. Nakaliman ilo ra maala ilo.

⁴²Liminugut ilo intor ra saujor ru Israil am nagiru' tampilon ra tana' kaagisan kaa' kalo nabayag ilo. Pinagawangan ilo ru ulu toojo ru saujor Israil am pulalai ru saujor ondo' paat raginio tatanga' mingkual intor ra bandar.[48] Ulun ru Binjamin naimbolo' ra naala ra najanjayan.

⁴³Saujor ru Israil nagawang am nangilou ra saujor ru Binjamin ra nararayus saboi ra rondo' intok tampilon ra sirangon ru Gibia. Liliwa' nangilou, namatoi ilo ra

⁴⁴18,000 ngaulun saujor ru Binjamin ondo' mapanggol.

⁴⁵Saujor ru Binjamin ra bokon minuli' am nagiru' tampilon ra tana' kaagisan, ra gunung-gunung batu giu' ra Rimon. Suang 5,000 ngaulun intor risilo pinatoi ra tanga' ralan. Saujor ru Israil lakat poyo mangilou ra saujor ru Binjamin saboi ra Gidom am 2,000 ngaulun intor risilo minatoi.

⁴⁶Suang 25,000 ngaulun saujor ru Binjamin pinatoi paat orou raginio, ngaangai' no mapanggol.

⁴⁷Kaa' 600 ngaulun nakapagiru' ra tana' kaagisan, giu' ra gunung-gunung batu ra Rimon. Minayan ilo ra giu' buoi apat ngansila'.

⁴⁸Saguli' poyo boo saujor ru Israil am namatoi ra ngaangai' ulun ru Binjamin ra bokon — ungkuyon, ruandu', lalaing am bibiag-bibiag. Sinolob nilo ngaangai' bandar giu' ra libung no.