Read Timugon Murut TINGGANAI RU BANSA' 21 Bible Online

TINGGANAI RU BANSA' 21 - Timugon Murut bible

TINGGANAI RU BANSA' 21

¹Paat ra ulun ru Israil natimung giu' ra Mijpa, Nagibot ilo. Konilo, “Kolondo' sangulun pana intor ramon ti mangiou ra anak ruandu' mai pawatin ra ulun ru Binjamin.”

²Raino minongoi ulun ru Israil ra Bitil am panturung ra saang ri Aki Kapuuno' saboi ra rondom. Nantangi' ilo am nampiau,

³“Iou TUHAN, i Aki Kapuuno' ru Israil, kua kia baal ragitio nasauk? Kua kia Israil matatakan ra bansa' ru Binjamin?”

⁴Suabon no ra iosusuab, nambaal ilo ra rondo' altar ra giu' no. Napataak ilo ra taak simbalui koson mapabansuk ra guang ru TUHAN[49] am taak simbalui koson makibarakat ra TUHAN.[50]

⁵Pangkuot ilo boo, “Mokoondo' kia bansa'-bansa' ra gino ngai' ru ulun ru Israil ondo' kalo maya' sambayang ra TUHAN giu' ra Mijpa ragili?” (Nakapagibot noyo ulun ru Israil ra osoi kalo mongoi ra Mijpa paat raginio musiti' ukumin ra potoyon).

⁶Makaasi' ilo ra bansa' ru Binjamin am indagu, “Paat ra raiti' natatakan ulun ru Israil ra rondo' intor ra bansa' nano.

⁷Atan kia musiti' baalon takau koson mokoowot ra andu' ru tayar ru bansa' ru Binjamin ondo' soroi no? Nakapagibot takau noyo ra TUHAN ra kalo iowon takau anak ruandu' takau pawatin risilo.”

⁸Paat ilo nangkuot ru lakat poyo mokoondo' bansa' ra gino ngai' ru ulun ru Israil ondo' kalo minaya' sambayang ra TUHAN giu' ra Mijpa, katutuni' nilo ra kolondo' sangulun pana intor ra bansa' ru Jabis giu' ra Giliad minongoi ra Mijpa.

⁹Paat inilayan nanulisan ra inggalan, natutun ra kolondo' sangulun pana intor ra Jabis ondo' siminaang.

¹⁰Ginio sabap ra ulun ondo' timinimung ra Bitil no nangator ra 12,000 ngaulun ondo' baani kaga' ra Jabis, nabaya' ra susuban, “Potoyo' moonong ulun giu' ra Jabis, makaaya' ruandu' am lalaing.

¹¹Potoyo' ngaangai' ungkuyon am moonong ruandu' ondo' sala' ka ralaa.”

¹²Intor ra bansa' ondo' minayan ra Jabis no, natutun nilo ra 400 ngaulun ralaa ondo' lakat poyo mamulok. Nagibit ilo ra ngaangai' ralaa no ra pangkiman giu' ra Silo, giu' ra tana' ru Kanaan.

¹³Kopongo raginio ngaangai' ulun ru Israil nangator ra ulun sinusub ra bansa' ru Binjamin ondo' giu' ra gunung batu giu' ra Rimon koson makimobonsoi.

¹⁴Ginio ra bansa' ru Binjamin pana siminaguli', am pataako' ru ulun ru Israil risilo ralaa intor ra Jabis ondo' kalo pinatoi ra paanduin risilo. Kaa' suang no kalo naukop.

¹⁵Makaasi' ulun ru Israil ra bansa' ru Binjamin sabap jinajou ru TUHAN pasimpungan ru bansa'-bansa' ru Israil.

¹⁶Ginio sabap ra indagu tingganai-tingganai giu' ra pantimungan no, “Kolondo' boo kia ruandu' ru bansa' ru Binjamin. Atan musiti' takau baalon maa' raginio bala ru ungkuyon ondo' lakat poyo soroi ti mokoowot ra andu'?

¹⁷Pai' masaboi ra Israil ti matatakan ra rondo' pana intor ra mopor am ruo bansa' nano. Musiti' takau maguyum ra ralan maa' raginio bansa' ru Binjamin mokoowot ra papag am magulayun manungkus ra titikop ru tana' nilo;

¹⁸kaa' kalo mangiou takau ra anak ruandu' takau pawatin risilo, sabap ra nakapagulas takau noyo ra osoi ayuk ondo' mangiou ra ulun ru Binjamin maguot ra anak ruandu' takau.”

¹⁹Kakara' nilo boo pangiantakan kabilaran tayar ru TUHAN ondo' paugaron giu' ra Silo maar noyo. (Silo ti giu' tampilon ralayo ru Bitil, giu' ra tampilon rabugus ru Libona am giu' ra tampilon sirangon ru ralan pangkilolot ru Bitil am Sikgim).

²⁰Indagu boo tingganai-tingganai ra ulun ru Binjamin ondo' lakat poyo soroi, “Pansibuni giu' ra umo ru anggur giu' ra Silo

²¹am paginaa ra giu'. Paat ralaa ru Silo matong mansayau paat ra pangiantakan no, ingkual intor ra umo ru anggur no, am sigagama' jumajal mangalap ra ralaa-ralaa no. Saukon ilo ra andu' min am ibiton ilo muli' ra wilayah ru Binjamin.

²²Amon ama' kapoam pabukat ungkuyon nilo matong am mansang, paraguon min,[51] ‘Iowo' akai no manangandu' ra ralaa mino, sabap kalo tinalingaau mai ilo ralalom ru pangayawan. Mulu' poyo ra kalo pinataak min ilo ramon. Ginio ra kolondo' sala min sabap kalo liminungkang kau ra ibot.’ ”

²³Bansa' ru Binjamin pana nambaal boo raginio. Sigagama' nampili' ra andu' intor ra ralaa ondo' nansayau giu' ra Silo, am nagibit risilo minuli'. Kopongo raginio siminaguli' ilo ra wilayah ru sigagama' am nambaal saguli' ra bandar nilo am niayuk minayan ra giu' no.

²⁴Ulun ru Israil ra bokon pana minuli' ra bansa' am niayuk sasambaloi ru sigagama', am ra tana' longgom nilo.

²⁵Paat raginio kolondo' poyo raja' ru Israil. Moonong ulun mambaal ra atan ondo' karaan ra motopot.