Read Timugon Murut TINGGANAI RU BANSA' 3 Bible Online

TINGGANAI RU BANSA' 3 - Timugon Murut bible

TINGGANAI RU BANSA' 3

¹Nompoloso TUHAN ra kukula' bansa' minayan giu' ra pagun Kanaan koson mangkinam ra ulun ru Israil ondo' kalo igondo' nakaili' ra pangayawan giu' ra Kanaan.

²Masaga' Io mangila' ra moonong sukor bagu ru ulun ru Israil koson mangayou, mulu' poyo ilo ondo' kalo igondo' baya' ra mangayou.

³Ngaangai' bansa' ondo' lakat poyo mayan giu' ra Kanaan iono bansa' ondo' mayan giu' ra limo bandar ru Palistin, ngaangai' bansa' ru Kanaan, bansa' ru Sidon am bansa' ru Giwi ondo' mayan giu' ra Kagunungan Libanon, tumalimpuun intor ra Gunung Baal-Girmon saboi ra Ginting Gamat.

⁴Bansa'-bansa' no nasauk ra pangkinaman tayar ru ulun ru Israil, koson makapandai ru gumagaya' ilo kapoam kalo ra susuban ondo' pinataak ru TUHAN ra kinamatuaan nilo ondo' pinabala' galing ri Musa.

⁵Ginio sabap ra ulun ru Kanaan, Git, Amori, Piris, Giwi am Jibusi nagulayun mayan giu' ra pagun no nabaya' ra ulun ru Israil.

⁶Naguot ulun ru Israil ra bansa'-bansa' raginio am maya' niayuk samba ra dewa-dewa nilo.

⁷Nalianan ru ulun ru Israil TUHAN i Aki Kapuuno' nilo. Makatula ilo ra TUHAN am siminamba ra sinungkalalaing Baal am Asyira.

⁸Ginio ra siminangit kaga' TUHAN risilo, am nopoloso ra Raja' Kusian-Risyataim intor ra Misopotamia nangala risilo. Kinuasa' ilo ru raja' no saboi balu' ngambilor.

⁹Ulun ru Israil pana nampiau makiindangan ra TUHAN, am nanusub Io ra sangulun ungkuyon makainggalan ri Otniil anak ri Kinas nampalabus risilo. I Kinas iono boborok ungkuyon ri Kalib.

¹⁰Kinuasa' i Otniil ru Ambiluo ru TUHAN, am nasauk io ra tingganai ru ulun ru Israil. Minongoi i Otniil pangayou, am nanaak TUHAN riso ra kamanangan ra raja' Misopotamia.

¹¹Namimio pagun no buoi apat ngoopor ngambilor, am i Otniil pana minatoi.

¹²Makatula poyo ulun ru Israil ra TUHAN. Ginio sabap ra tuhan napasauk ra Raja' Iglon intor ra Moab, maikang poyo intor ra Israil.

¹³Nagamung Raja' Iglon ra ulun ru Amori am ulun ru Amalik am nangala ra ulun ru Israil, tauli no ginaau Jiriko, bandar ru puun kurma.

¹⁴Ulun ru Israil pinarinta ru Raja' Iglon buoi mopor am balu' ngambilor.

¹⁵Ulun ru Israil pana nampiau nakiindangan ra TUHAN, am nanusub Io ri Igud anak ri Gira koson mampalabus risilo; Igud ti sangulun ondo' kipang, intor ra bansa' ru Binjamin. Nanusub ulun ru Israil ri Igud nangator ra taak upiti ra Raja' Iglon intor ra Moab.

¹⁶Nambaal i Igud ra rondo' ilang ondo' ruo larom, ondo' gawar no maar limo ngoopor ngasintimito. Inabil no ilang no ra awak nano tampilon ra pamiris, pinaralalom ra bayang nano.

¹⁷Io pana minongoi pangator ra taak upiti ra Raja' Iglon. Molomok kaga' raja' no.

¹⁸Pakataak ri Igud taak upiti no, nanusub io ra ngaangai' ondo' nagibit ra taak upiti no minuli'.

¹⁹Kaa' i Igud galama' siminaguli' paat io nakasaboi ra batu-batu inukir maar ra Gilgal, am saguli' ra Raja' Iglon. Indagu i Igud ra raja', “Raja' kuno, mokoondo' inopot ondo' masaga' kuno posoboyon rirun.” Indagu raja' ra ulipon-ulipon nano, “Iruani' min akai ruo!” Ngaangai' ulipon ru raja' no pana miningkual intor ra giu'.

²⁰Paat raginio nanturung raja' no sangulun giu' ralalom ru lamin ondo' masalui giu' ra taap ru istana nano. I Igud pana mininggaar ra raja' am indagu, “Mokoondo' aku ra tanou intor ri Aki Kapuuno' rirun.” Pokorongog ra ragu no, bigor raja'.

²¹Kopongo raginio ra kalindu' ra kait nano, binutus ri Igud ilang intor ra awak nano ra pamiris am toboko' no ra tinai' ru raja' no.

²²Ilang no narabut ra ralalom tinai' ru raja', nokoosol tanggayan ru ilang ralalom ru lomok ru tinai' ru raja', saboi nakaujak ra bakulung, nangkilolot ra kalayam nano. Kalo binutus ri Igud ilang no intor ra tinai' ru raja'.

²³Ingkual boo i Igud. Inangaban no kulobon ru lamin no am kaputi' no,

²⁴am iruani' no intok raginio. Paat ra ulipon-ulipon ru raja' matong am nakito ra kulobon no kinaput, am indos nilo lakat poyo raja' no giu' ra ralalom am tatanga' sumabu.

²⁵Kopongo ra nabuoi naginaa, am kalo niayuk nangukab raja' no ra kulobon, inalap nilo kunsi' am ukabi' kulobon. Giu' ra ralalom ru lamin no nakito nilo raja' nilo minatoi nakalangan ra sulig.

²⁶Liliwa' lakat poyo ulipon-ulipon ru raja' no maginaa, pagiru' i Igud. Nansail io ra batu ondo' inukir am pagiru' ra Siira.

²⁷Paat i Igud nakasaboi giu' ra intok kabuluran Ipraim, nanamput io ra bujung koson mampiau ra ulun ru Israil mangayou. Ratong ilo, am naningganai io risilo timinuun intor ra intok kabuluran no.

²⁸Indagu i Igud, “Baya' noyo raki'! Nanaak noyo TUHAN ramuyun ra kamanangan ra ulun ru Moab, pantula' min.” Ginio ra baya' ilo ri Igud timinuun intor ra kabuluran no. Ginaau nilo intok laupan ru ulun ru Moab giu' ra Sungoi Jordan. Kalo nopoloso ilo ra sangulun pantula' pana minongoi ra sandaup.

²⁹Paat raginio namatoi ilo olo'-olo' mopor ngaribu ngaulun saujor ru Moab ondo' moonsoi kaga'; kolondo' sangulun pana nakapagiru'.

³⁰Paat orou raginio ulun ru Israil nangala ra ulun ru Moab, am pagun Israil namimio buoi balu' ngoopor ngambilor.

³¹Tingganai ra sumunu' ti iono i Samgar anak ri Anat. Io niayuk nangayou am nampalabus ra ulun ru Israil. Namatoi io ra onom ngaatus ulun ru Palistin ra jujuga' gugunjau ra sapi'.