Read Timugon Murut TINGGANAI RU BANSA' 4 Bible Online

TINGGANAI RU BANSA' 4 - Timugon Murut bible

TINGGANAI RU BANSA' 4

¹Kopongo i Igud minatoi, makatula poyo ulun ru Israil ra TUHAN.

²Ginio ra nopoloso TUHAN risilo kinala ru Raja' Jabin, raja' ru ulun ru Kanaan ondo' namarinta giu' ra bandar Gajor. Panglima saujor nano iono i Sisira, ondo' minayan giu' ra Garosit-Gagoyim.

³Raja' Jabin mokoondo' ra siam ngaatus kurita' kuda intor ra basi'. Namarinta io ra ulun ru Israil ra malaat am mamatoi buoi ruo ngoopor ngambilor. Ulun ru Israil pana nampiau boo nakiindangan ra TUHAN.

⁴Paat raginio tingganai ru Israil iono sangulun nabi ruandu' ondo' makainggalan ri Dibora, andu' ri Lapidot.

⁵Kaindalaman ri Dibora manturung ra saau ru sampuun kurma, nangkilolot ra Rama am Bitil, giu' ra kabuluran ru Ipraim. Giu' noyo ratangan ru ulun ru Israil koson makibilin riso.

⁶Sangarawan raginio, nanusub i Dibora ra ulun nampiau ri Barak anak ri Abinoam intor ra bandar Kidis giu' ra wilayah Naptali. Indagu i Dibora riso, “TUHAN i Aki Kapuuno' ru Israil nanaak noyo ra susuban ti rirun, ‘Timungo' mopor ngaribu ngaulun intor ra bansa' ru Naptali am bansa' ru Jibulon, am tingganayo' ilo mongoi ra Gunung Tabor.

⁷Mangkinibit Aku ri Sisira, panglima saujor ru Raja' Jabin, mangayou rirun giu' ra Sungoi Kison. Kabalu' pana mokoondo' io ra kurita' kuda am saujor, manaak Aku rirun ra kamanangan.’ ”

⁸Taam boo i Barak, “Mongoi aku amon ru mongoi kou mabaya' raki'. Kaa' amon ru kalo mongoi kou, aku pana kalo mongoi.”

⁹Indagu i Dibora, “Iou, mongoi aku mabaya' rirun, kaa' kalo makaalap kou ra kaurumatan intor ra kamanangan raginio, sabap pataakon ru TUHAN i Sisira ra sangulun ruandu'.” I Dibora pana minugar minongoi ra Kidis nabaya' ri Barak.

¹⁰Nanusub i Barak ra bansa' ru Jibulon am bansa' ru Naptali maa' raginio mongoi ra Kidis. Ulun ondo' minaya' ri Barak am i Dibora paat raginio suang no mopor ngaribu ngaulun.

¹¹Liliwa' raginio, i Gibir, ulun ru Kini ondo' namingkal ra kim nano mamaar ra Kidis, mamaar ra puun oak giu' ra Jaanaim. I Gibir iono papag ri Gobab, lango' ri Musa, kaa' siminuai i Gibir intor ra bansa' nano.

¹²Paat ra i Sisira nokorongog ra i Barak anak ri Abinoam minongoi noyo ra Gunung Tabor,

¹³nanimung io ra siam ngaatus kurita' kuda nano ondo' binaal intor ra basi', nabaya' ra ngaangai' saujor nano, am nagibit io risilo intor ra Garosit-Gagoyim minongoi ra Sungoi Kison.

¹⁴I Dibora pana mindagu ri Barak, “Jalai no! TUHAN mabaya' ramuyun! Paat orou raiti' nanaak noyo TUHAN ra kamanangan ramuyun ri Sisira.” Ginio ra tuun i Barak intor ra Gunung Tabor nabaya' ra mopor ngaribu ulun nano.

¹⁵Paat i Barak am saujor nano namulunsar ri Sisira, napaubong TUHAN ri Sisira nabaya' ra ngaangai' saujor am kurita' kuda nano. Tuun i Sisira intor ra kurita' kuda nano, am pagiru'.

¹⁶Inilou ri Barak kurita' kuda am saujor ru pantula' saboi ra Garosit-Gagoyim. Ngaangai' pulalai ru saujor ri Sisira pinatoi; kolondo' sangulun pana pinoloso naayag.

¹⁷Liliwa' raginio nagiru' i Sisira giu' ra kim ri Jail, andu' ri Gibir, ulun ru Kini no, sabap ra Raja' Jabin intor ra Gajor, nantutun ra sasambaloi ri Gibir.

¹⁸Pakasaboi i Sisira, nanguma' i Jail riso am indagu, “Tuan, umpos noyo ra ralalom ru kim kutu. Kalo pana malaa'.” Umpos i Sisira, am bunio' io ri Jail giu' ra talikuron ru tabir.[7]

¹⁹Indagu i Sisira ri Jail, “Anii' aku ra sanganu timug inumon. Pinaason aku.” Inukab ri Jail kantungan ru kungkung nano ondo' makagatas, am papainum ri Sisira. I Jail pana nambuni poyo ri Sisira.

²⁰Kopongo raginio, nambala' i Sisira ri Jail, “Bigor giu' ra kulobon ru kim. Amon ru makaulun matong am mangkuot ra amon ru mokoondo' osoi ragiti, raguo' ra kolondo'.”

²¹Naagui kaga' i Sisira saboi nokororot io. Nangalap i Jail ra rondo' amar am rondo' paku' makalu. Simininok io boo mininggaar ri Sisira, am ra amar pinapaku' no paku' makalu no ra pusisingo ri Sisira, saboi paku' no nakaujak ra tana'. Koson raginio noyo i Jail namatoi ri Sisira.

²²Pakaratong i Barak naguyum ri Sisira, uma' i Jail riso am indagu, “Ibok! Manulu' aku rirun ra ulun uyumon muli.” Umpos i Barak nabaya' ri Jail, am nakito no i Sisira minatoi nakalangan ra giu' no, ra paku' tataun nakatilayun ra pusisingo nano.

²³Paat orou raginio, nanaak i Aki Kapuuno' ra ulun ru Israil ra kamanangan ra Raja' Jabin, raja' ru Kanaan.

²⁴Buoi ka buoi boo tinipagon kaga' raja' no ru ulun ru Israil saboi pupus no pinuso nilo io.