Read Timugon Murut TINGGANAI RU BANSA' 6 Bible Online

TINGGANAI RU BANSA' 6 - Timugon Murut bible

TINGGANAI RU BANSA' 6

¹Igondo' poyo ulun ru Israil makatula ra TUHAN. Ginio ra nopoloso TUHAN ra ulun ru Midian nanguasa' risilo buoi tulu' ngambilor.

²Maikang poyo ulun ru Midian intor ra ulun ru Israil. Ginio sabap ra nansibuni ulun ru Israil giu' ralalom ru luang batu am intok ra bokon ondo' mamayag giu' ra bulur-bulur.

³Moonong ra ulun ru Israil mantanom, matong ulun ru Midian mababaya' ra ulun ru Amalik am bansa' ra bokon intor ra tana' kaagisan, am mamulunsar ra ulun ru Israil.

⁴Nangkim ilo giu' ra pagun ru Israil am nampaluyak ra ngaangai' tatanom ra giu' saboi ra libung giu' ra liliut ru Gaja tampilon rabugus. Ginaau nilo ngaangai' bibiag tinambiag ru ulun ru Israil — domba, sapi' am kaladai. Kolondo' rondo' pana tinatang saboi kolondo' toojo akanon ru ulun ru Israil.

⁵Guguluyur ilo minatong ra bibiag tinambiag am kim nilo ondo' masuang kaga', koson ra sampanon ru gapu' ondo' maayo. Ilo am unta nilo masuang kaga' saboi kalo mauntob. Minatong ilo mamuso ra pagun no,

⁶am kalo makalulu' ulun ru Israil manggal risilo.

⁷Ulun ru Israil pana nampiau ra TUHAN makiindangan ilo gumula' ra ulun ru Midian.

⁸Ginio ra nanusub TUHAN ra sangulun nabi risilo. Indagu nabi no, “Koson ragitio ragu ru TUHAN i Aki Kapuuno' ru Israil, ‘Namayag Aku ramuyun intor inulipon giu' ra Misir.

⁹Namayag Aku ramuyun intor ra ulun ru Misir am mamagun ru pagun ti minanggal ramuyun. Napagiru' Aku risilo paat akau namulunsar risilo, am nanaak Aku ramuyun ra pagun nilo.

¹⁰Nambala' Aku ramuyun ra Aku noyo TUHAN i Aki Kapuuno' min, am ra akau kalo iowon sumamba ra dewa ru ulun ru Amori, ondo' pagun nilo inayanan min raino. Kaa' kalo ginagaya' min ragu Kuno.’ ”

¹¹Kopongo raginio paat ra rondo' orou minatong malaikat ru TUHAN ra pekan Opra am nanturung ra saau ru puun oak longgom ri Joas, sangulun intor ra bansa' ru Abiijir. Anak ungkuyon ri Joas ondo' makainggalan ri Gidion tatanga' mangagik ra gandum giu' ra intok pamagaan ra anggur. Nambaal io ra kandoi no ra sininok maa' raginio kalo makito io ru ulun ru Midian.

¹²Minintalang malaikat ru TUHAN ri Gidion ra giu' no am indagu, “TUHAN mabaya' rirun, okou buayoi mapanggol am baani!”

¹³Indagu i Gidion riso, “Iowo' noyo aku mangkuot. Amon ru topot TUHAN mabaya' ramon, kua kia ngaangai' ti nasauk ramon? Ati kia ngaangai' baal makaimuag ondo' igondo' binaal ru TUHAN ragili, ondo' tinunung ru kinamatuaan mai intor ra TUHAN napaingkual risilo intor ra Misir? Raino nangiruan TUHAN ramon am nopoloso ramon ra kuasaan ru ulun ru Midian.”

¹⁴TUHAN pana nanaak ri Gidion ra susuban ragitio, “Ra ngaangai' ru ikang muno, ongoyo' noyo palabuso' ulun ru Israil intor ra ulun ru Midian. Aku noyo ondo' nanusub rirun.”

¹⁵Taam i Gidion, “Kaa' Tuhan atan lair kulaan aku mamayag ra ulun ru Israil? Bansa' kutu ondo' malawo kaga' ra popolos ru bansa' ru Manasi. Mulu' poyo ra aku noyo ondo' kalo maatang kaga' ra sasambaloi kuno.”

¹⁶Indagu TUHAN riso, “Mangindangan Aku rirun, sabap raginio maaru' makasugut kou. Kalaan mu ulun ru Midian ra ilain koson nantaluma' kou ra sangulun ayuk.”

¹⁷Indagu i Gidion, “Amon ru totopot iniou aku ru TUHAN, anii' aku ra inono' ra TUHAN ondo' nanaak raki' ra susuban ti.

¹⁸Pai' ugar ra kalo poyo magibit aku ra taak tayar ru Tuhan.” Taam Io, “Maginaa Aku saboi ra okou sumaguli'.”

¹⁹Ginio ra uli' i Gidion ra baloi am pangansak ra sanginan kambing mamulok. Alap io niayuk ra mopor ngakilogram tapung, am pambaal ra ruti' kalo linatakan ra ragi. Pasuango' no kual no ra ralalom ru bakul am ruu' no ralalom ru pagangan, am nagibit ra ngaangai' no am pasulungo' ra malaikat ondo' tatanga' naginaa ra saau ru puun oak.

²⁰Indagu malaikat ru TUHAN riso, “Patampako' noyo kual am ruti' no ra batu ti am pawaso' ruu' ru kual no ra rasawat ru ngaangai' no.” Binaal ri Gidion koson raginio.

²¹Malaikat ru TUHAN pana nampatutui ra tataun ondo' ginuut nano, am pinakambong pompor ru tataun no ra kual am ruti' no. Napaangan batu no am nangumpo ra kual am ruti' no. Kopongo raginio liot ru malaikat no intor ra pagilangan.

²²Nakaliman i Gidion ra ondo' minatong riso no malaikat ru TUHAN. Ra nalaa' indagu i Gidion, “Iou TUHAN Raja', nakakito aku toojo ra malaikat Muno!”

²³Kaa' indagu TUHAN riso, “Pai' kalaa'. Roro' noyo. Kalo matoi kou.”

²⁴Nambaal i Gidion rondo' altar tayar ru TUHAN ra giu' no am inggalani' no ra “TUHAN Puun ru Kaansayan”. Saboi raino altar no lakat poyo soroi giu' ra Opra, bandar longgom ru bansa' ru Abiijir.

²⁵Paat rondom raginio indagu TUHAN ri Gidion, “Alap ra sanginan sapi' gawayan ru ama' muno, iono sapi' gawayan ondo' moonsoi kaga'[16] ondo' umur no tulu' ngambilor. Lunsayo' noyo altar ondo' binaal ru ama' muno tayar ru Baal, am gabaa' noyo lugu' ru tatandu' ru Dewi Asyira ondo' giu' ra sapapa' ru altar no.

²⁶Baalo' noyo rondo' altar ondo' batu no pinatampas ra matanda' giu' ra rasawat ru tinuntur no; altar no tayar ru TUHAN i Aki Kapuuno' muno. Alapo' boo sapi' no[17] am solobon ngaangai' no koson ra taak simbalui. Alapo' ra luton lugu' tatandu' ru Dewi Asyira ondo' ginaba' muno.”

²⁷I Gidion pana nampili' mopor ngaulun ulipon nano, am ongoi pambaal ra atan ondo' nanusuban ru TUHAN. Sabap ra malaa' io ra sasambaloi nano am mamagun ru bandar no, kalo makakau' io mambaal raginio paat ra matawang. Nambaal io raginio paat ra rondom.

²⁸Paat ra mamagun ru bandar no siminukal ra iosusuab ru suabon no, kakito nilo altar ru Baal am lugu' tatandu' ru Dewi Asyira ginaba'. Nakito nilo niayuk giu' ra intok raginio binaal rondo' altar am sapi' gawayan sinolob noyo koson ra taak simbalui.

²⁹Pasakuot ilo ra rondo' am bokon, “Osoi kia nua' nambaal ragitio?” Inimumuyan nilo am kapandayi' ra binaal ri Gidion anak ri Joas.

³⁰Indagu ilo boo ri Joas, “Ibito' noyo anak muno ragiti maa' raginio mapatoi mai io! Linunsai no altar ru Baal am namuut ra lugu' tatandu' ru Dewi Asyira ondo' giu' ra sapapa' ru altar no.”

³¹Kaa' indagu i Joas ra ngaangai' ulun ondo' minanggal riso, “Bala kau kia ri Baal? Masaga' kau kia manaung riso? Osoi ondo' manaung ri Baal potoyon ra orou raiti'. Amon ru topot Baal no tuhan, polosoon io magisaung galama', sabap ra altar nano ondo' linunsai no.”

³²Intor raginio nanginggalan ulun ri Gidion ri “Jirubaal”,[18] sabap ra mindagu i Joas, “Polosoon noyo i Baal magisaung galama' sabap ra altar nano ondo' linunsai no.”

³³Kopongo raginio ngaangai' ulun ru Midian, ulun ru Amalik am bansa'-bansa' ra bokon timinimung giu' ra tana' kaagisan. Liminaup ilo ra Sungoi Jordan am nangkim giu' ra Limayak Jijriil.

³⁴Kinuasa' i Gidion ru Ambiluo ru TUHAN, am nanamput io ra bujung koson mampiau ra ulun intor ra bansa' ru Abiijir maa' raginio maya' riso.

³⁵Nangator i Gidion niayuk ra ulun-ulun sinusub ra karuo-ruo wilayah ru bansa' ru Manasi koson mampiau risilo maya' riso. Nangator i Gidion niayuk ra ulun sinusub ra bansa' ru Asyir, Jibulon am Naptali. Kopongo raginio minatong ilo niayuk minamung ri Gidion.

³⁶Indagu boo i Gidion ri Aki Kapuuno', “Minindagu Kou noyo ra mamakai Kou raki' koson mapalabus ra ulun ru Israil.

³⁷Raino pabantaan ku bulu ru domba ginunting ti giu' ra tana' intok mai mangagik ra gandum. Amon ru suabon no iosusuab bolobou mokoondo' ayuk ra bulu ru domba ginunting ti am kolondo' ra tana', am ginio noyo inono' no ra sotopot no masaga' Kou mamakai raki' koson mapalabus ra ulun ru Israil.”

³⁸Suabon no iosusuab, totopot baal raginio nasauk. Paat ri Gidion siminukal mataki', pinaga' no bulu ru domba ginunting no am nakaalap ra timug ru bolobou sasangkir suang no.

³⁹Indagu boo i Gidion ri Aki Kapuuno', “Pai' sangit raki'; iowo' noyo aku mindagu igondo' poyo. Iowo' noyo aku mambaal rondo' pangkinaman poyo ra bulu ginunting no. Raino ti polosoon noyo bulu ru domba no mapua', kaa' tana' maasa'.”

⁴⁰Paat ra rondom raginio nangiou i Aki Kapuuno' ra kitaak ri Gidion. Suabon no ra iosusuab mapua' bulu ru domba ginunting no kaa' tana' maasa' ra bolobou.