Read Timugon Murut TINGGANAI RU BANSA' 7 Bible Online

TINGGANAI RU BANSA' 7 - Timugon Murut bible

TINGGANAI RU BANSA' 7

¹Sangarawan raiti, riminondom siminukal i Gidion no am ngaangai' ulun nano. Ugar io am pangkim maar ra taur ru timug Garod. Tatanga' ulun ru Midian mangkim giu' ra pipit tampilon ralayo nilo, maar ra Bulur Mori.

²Indagu TUHAN ri Gidion, “Masuang kaga' ulun muno. Kalo masaga' Aku manaak risilo ra kamanangan ra ulun ru Midian. Maaru' mangkara' ilo ra mamanang ilo sabap kaikangan nilo galama', saboi kalo mapatulai Raki'.

³Ginio ra potonowo' noyo ra ulun-ulun muno, ‘Osoi makaliman ra malaa', musiti' mataki' mangiruan ra Gunung Giliad am muli' ra baloi nano!’ ” Ginio ra ruo ngoopor am ruo ngaribu ngaulun minuli'; mopor ngaribu ngaulun ayuk soroi.

⁴Indagu boo TUHAN ri Gidion, “Lakat poyo masuang ulun muno. Ibito' ilo ra sungoi. Giu' no mampili' Aku risilo ra tayar muno. Amon mindagu Aku rirun, ‘Ulun ti musiti' mongoi mabaya' rirun,’ musiti' io mongoi. Kaa' amon ru mindagu Aku, ‘Ulun ti kalo poongoyon mabaya' rirun,’ kalo poongoyon io.”

⁵Inibit ri Gidion ngaangai' ulun nano ra sungoi, am indagu TUHAN ri Gidion, “Ulun ondo' mantila' ra timug koson ra uku' musiti' pasuayon mu intor ra ulun ondo' migulatur ra manginum.”

⁶Suang talu ngaatus ngaulun mantila' ra timug intor ra kalindu', liliwa' ondo' bokon migulatur ra manginum.

⁷Indagu boo TUHAN ri Gidion, “Mamayag Aku rirun am manaak rirun ra kamanangan ra ulun ru Midian ra talu ngaatus ngaulun ondo' mantila' ra timug. Susubo' noyo ngaangai' ulun ra bokon no muli'.”

⁸Ginio ra nanusub i Gidion ra ngaangai' ulun ru Israil ra bokon no minuli', ondo' ayuk am talu ngaatus ngaulun no. Ngaangai' linutu' am bujung inalap intor risilo ondo' minuli'. Paat ragili nangkim ulun ru Midian giu' ra pipit, ragana' ru intok nangkiman ru Israil.

⁹Paat rondom ragili minindagu TUHAN ri Gidion, “Sukal no! Ongoi noyo bulunsaro' nangkiman ru ulun ru Midian. Manaak Aku rirun ra kamanangan risilo.

¹⁰Amon malaa' kou mamulunsar risilo, ongoi noyo ra nangkiman nilo mabaya' ri Pura, ulipon muno.

¹¹Giu' no morongog mu atan ondo' tatanga' raguon ru pantula', am baani kou mamulunsar risilo.” Ginio ra minongoi i Gidion am ulipon nano i Pura giu' ra igig ru nangkiman ru pantula'.

¹²Ulun ru Midian, ulun ru Amalik am bansa'-bansa' ra bokon intor ra tana' kaagisan, soroi ra ati-ati giu' ra titikop ru pipit no koson ra sampanon ru gapu'. Masuang kaga' unta nilo, koson ra agis giu' ra nagas.

¹³Pakasaboi i Gidion ra giu' no, norongog no sasangulun tatanga' mantunung ra inupi nano ra sangulun rangan. Indagu ulun no, “Naginupi aku mokoondo' rondo' ruti' barli nakaluluir siminubol ra ralalom ru nangkiman takau. Napajunjung ruti' no ra rondo' kim, am naaba' toojo kim no.”

¹⁴Taam rangan nano, “Ginio ilang ri Gidion anak ri Joas, ulun ru Israil no. Arati' no nanaak noyo i Aki Kapuuno' riso ra kamanangan ra ulun ru Midian am ngaangai' pulalai ru saujor takau!”

¹⁵Pokorongog i Gidion ra inupi ru ulun no am arati' no, igulatur io samba ri Aki Kapuuno'. Saguli' io boo ra pangkiman ru Israil am indagu, “Tampos kano! Manaak TUHAN ramuyun ra kamanangan ra pulalai ru saujor Midian!”

¹⁶Tinayar ri Gidion ulun nano ra talu ngampulalai. Kopongo raginio nanaak io ra moonong ulun rondo' bujung am rondo' rarapu' sinuangan ra pilasut.

¹⁷Indagu i Gidion risilo, “Paat ra aku makasaboi ra saang ru nangkiman ru pantula', ilain min aku toojo. Baalo' min atan ondo' baalon kuno.

¹⁸Paat aku am pulalai kuno manamput ra bujung, musiti' akau pana manamput ra bujung min giu' ra liput ru nangkiman ru pantula' am niayuk gumolok, ‘Tayar ru TUHAN am tayar ri Gidion!’ ”

¹⁹Maar tanga' ru rondom, nakasaboi i Gidion am maatus ngaulun ra ulun nano giu' ra igig ru pangkiman ru pantula'. Paat raginio ulun ondo' nagalung ra pangkiman no bagu ayuk nampalit magalung. Samputi' boo ri Gidion am pulalai nano bujung am namabak ra rarapu' nilo.

²⁰Karuruo pulalai ra bokon no pana nambaal raginio. Kinayang nilo ngaangai' pilasut ra kalindu' ra kait, am bujung ra kalindu' ra pamiris, am golok, “Ilang ti tayar ru TUHAN am tayar ri Gidion!”

²¹Nagulayun ilo ngaangai' minigor ra intok ru sigagama' giu' ra liput ru pangkiman no. Kopongo raginio ngaangai' pulalai ru saujor ru pantula' nagiru' liliwa' giminolok-golok.

²²Liliwa' ulun ri Gidion nanamput ra bujung nilo, nangkinibit TUHAN ra pulalai ru pantula' minibulunsar ra ilo po galama' ra ilang. Nagiru' ilo minongoi ra Jirira saboi ra Bit-Sita am bandar Abil-Migola, maar ra Tabat.

²³Kopongo raginio ulun intor ra bansa' ru Naptali, Asyir am karuruo tayar ru bansa' ru Manasi piniau, am nangilou ilo ra ulun ru Midian.

²⁴Nanusub i Gidion ra ulun mongoi ra titikop kabuluran Ipraim koson mapasaboi ra bilin ragitio, “Ibok tuun koson mamulunsar ra ulun ru Midian. Alungi' sungoi Jordan am ngaangai' anak ru sungoi saboi ra Bit-Bara. Pai' polosoo' ulun ru Midian lumaup ra giu' no.” Bansa' ru Ipraim sinusub, am nagalung ilo ra Sungoi Jordan am ngaangai' anak ru sungoi saboi ra Bit-Bara.

²⁵Rinakop nilo ruo ngaulun panguasa' ru Midian, iono i Orib am i Jiib. Namatoi ilo ri Orib giu' ra Batu Orib, am namatoi ri Jiib giu' ra intok pamagaan ra anggur giu' ra Jiib. Narayus ulun ru Ipraim nangilou ra ulun ru Midian, am nagibit ra ulu ri Orib am i Jiib ri Gidion giu' ra tampilon sirangon ru Sungoi Jordan.