Read Timugon Murut JUDAS 1 Bible Online

JUDAS 1 - Timugon Murut bible

JUDAS 1

¹Aku i Judas, sangulun ulipon ri Jisus Kristus am pabukat niayuk ri Jakubus. Pabukat kau ondo' piniau am ondo' tagamin ri Aki Kapuuno', Ama' takau, am ondo' alungin ri Jisus Kristus:

²Gama' ru mauli' i Aki Kapuuno' manaak ramuyun ra asi', barakat[1] am pabansayan Nano.

³Pabukat kau ngai' ondo' tagamin ku! Mokoondo' noyo guang ku ra buoi ti koson manulis raan ramuyun intor ra pamayagan ti ondo' inapu takali. Kaa' raino ti malimanan ku ra moonsoi ru manulis aku noyo ramuyun ra surat ti koson anggalon min ilo ondo' tumula' ra pangilaan motopot intor ri Aki Kapuuno', ondo' pinataak ra igondo' ayuk ra ulun Nano ra sabuoi-buoi no.

⁴Sabap ra mokoondo' kukula' ngaulun mangapuka' suminok ayuk simpung ritakau. Ilo ti ulun malaat ondo' manumbalik ra togom tinaakan ri Aki Kapuuno', koson sumimbat ilo pambaal ra atan ayuk pansasawaan. Ilo ti kalo mangapu ri Jisus Kristus, ondo' Io ayuk rondo'-rondo' Nanguasa' am Tuhan takau. Intor ra galing i ukum pataakin risilo inala' noyo ru Buuk Kitab.

⁵Napandayan min noyo ngaangai' ru gitio. Kaa' masaga' aku poyo mampakara' ramuyun ati kulaan Tuhan[2] namayag ra bansa' ru Israil intor ra pagun ru Misir, kaa' nopongo raginio, pinuso No niayuk ulun intor risilo ondo' kalo nangintopot Riso i.

⁶Karaa' min niayuk ati kulaan sauk ru malaikat-malaikat ondo' nanguang ra kinaikang ru kuasa' ondo' tinaakan noyo risilo, saboi nangiruan boo ra inayanan nilo. Rinantai ilo ri Aki Kapuuno' ra mantilayun giu' ra intok molondom ra ragana' ru tana' ti. Giu' noyo nangaputan risilo suku' ra Pangukuman Maayo ra tauli no.

⁷Karaa' min niayuk mamagun ru bandar Sodom, Gomora am bandar ra naginggaar, ilo pana mogondo' ra malaikat ra raitii' ni. Nambaal ilo ra pansasawaan am baal makauyuyu'. Inukum ilo ra apui mantilayun koson ra rondo' pangkaraan ru ngaangai' ulun.

⁸Mogondo' niayuk ra mangingila' ra mangaabau-abau ondo' mokoondo' rokoon ra papaintalangan saboi mangkinibit risilo ra baal makauyuyu' raginio. Talaingon nilo kuasa' ri Aki Kapuuno' am poyo asabin nilo ondo' mangatulai giu' ra suruga'.

⁹Kaa' Tingganai ru malaikat, i Maikol galama', kalo noyo igondo' pakakau' nambaal koson raginio. Paat ra io am Tingganai ru riwato no nagaau ra baangkai ri nabi Musa i, kalo noyo nakakau' i Maikol ti nagibot riso ra ragu magasab. Minindagu io ayuk ra, “Tuhan galama' mangukum rirun!”

¹⁰Kaa' ulun koson raginio magasab ra ngaangai' ondo' kalo napandayan nilono. Ilo ti koson ayuk ra bibiag masigo ondo' maya' ayuk ra kinibit ru pamalimanan nilai no. Paliso ragitio noyo mangkinibit risilo ra kapusaan.

¹¹Mumpara' boo usung nilono! Sabap ra nakatilu ilo ra ralan malaat ri Kain am mogondo' ilo poyo ri Biliam, ra liminayau ra kaayagan matanda' sabap ra kinibit ru kalangkayaan. Pusoon ilo sabap ra makapaliso ilo ra maanggal-anggal, koson i Kora ragili.

¹²Paat ra pagakanan min ra Kristian, moroot ilo am mampakaatang ra kasagaan galama' ayuk. Ilo ti koson ra gaun ondo' siabin ayuk ru bagiu', kaa' kalo niayuk mamparasam. Mogondo' ilo niayuk ra puun tataun ondo' kalo mangkawa' paat ra pangkawaan nano. Koson ilo ra puun tataun ondo' binubul noyo ra bakat nano pana — minatoi boo toojo.

¹³Koson ra kinulun mapuor ru raat manamputa', ilo mampakito ra baal nilo ondo' makauyuyu'. Ilo ti koson ra butitin ondo' pabanding-banding, ilo inaru' noyo ri Aki Kapuuno' ra intok molondom kaga' suku' ra mantilayun.

¹⁴I Ginok, papag ri Adam ra katulu', ondo' ra galing i noyo nanala' raginio intor risilo, kono, “Ilai' noyo, makito Tuhan matong mabaya' ra kukula' ngaribu malaikat Nano.

¹⁵Mongoi Io pangukum ra ngaangai' ulun. Mangukum Io ra ulun-ulun makatula sabap ra baal malaat nilo am sabap ra ngaangai' asab nilai Riso!”

¹⁶Ngaangai' ulun raginio masalok ayuk butok-butok am mampasala poyo ra ulun bokon. Maya' ilo ayuk ra kasagaan malaat ru guang nilai ti. Migigiompor ilo ayuk am gamisin nilo ulun ra bokon koson ra kaatangan nilo ayuk galama'.

¹⁷Kaa' koson ramuyun, pabukat kau ngai', karaa' min niayuk atan ondo' naragu noyo ru rasul ru Tuhan takau i Jisus Kristus.

¹⁸Nakapambala' ilo noyo ramuyun ra masuku' paat ra pamupusan ru tana' ti, mokoondo' ulun sumalula' koson manauyu' ramuyun, sabap ra maya' ilo ayuk ra kasagaan malaat ru guang nilai no.

¹⁹Ilo ti noyo ulun ondo' mangkinibit ra pantutuliaran ra ulun Kristian. Ilo ti kalo kinuasa' ru Ambiluo ri Aki Kapuuno',[3] kaa' maingkinibitan ayuk ru guang malaat nilai no.

²⁰Kaa' koson ramuyun, pabukat kau ngai', kaikango' ayuk pangintapatan mino ri Jisus Kristus, ondo' gitio noyo rondo'-rondo' ayuk matulai. Pakiasi' kano ralalom kuasa' ru Ambiluo ri Aki Kapuuno'.[4]

²¹Porondon kano ra kinotogom ri Aki Kapuuno' buoi ra akau maginaa ra i Jisus Kristus Tuhan takau, mangani' ramuyun ra kaayagan motopot am mantilayun ralalom ru asi' Nano.

²²Paintopoto' noyo ulun Kristian ondo' maginduo guang nilai no.

²³Bayago' ilo ondo' makaili' ra baal makapatoi, koson mamayag ra ulun intor ra apui. Ra bokon poyo, pakaasi' kano risilo, kaa' ilalai' min niayuk kaayagan mino galama', koson minggalur kau poyo intor ra baal malaat nilai ondo' maya' ayuk ra kasagaan ru guang makatula nilai.

²⁴Gama' ru i Aki Kapuuno' ondo' makakuasa' magalung ramuyun intor ra kinibit ru tula, am poyo mompoongoi ramuyun ra katulayan Nano mabaya' ra kaansukan ru guang,

²⁵Io no i Aki Kapuuno' ondo' namayag ritakau, ralalom inggalan ri Jisus Kristus, Tuhan takau. Io no rorondo' ayuk i Aki Kapuuno', Io no matulai, maatang kaga' am Io no mangnguasa' ra ngaangai' no, intor ra puun i, paat ra raino am suku' ra sabuoi-buoi no. Amin.