Read Timugon Murut PINAINTALANG 10 Bible Online

PINAINTALANG 10 - Timugon Murut bible

PINAINTALANG 10

¹Kakito ku boo rondo' poyo malaikat maikang tumuun intor ra suruga'. Kinulumput io ru gaun no am liminiput bulintung no ra ulu nano. Bulos nano makabinusasal koson ra mato ru orou am kalayam nano koson ra sinimbula' ru apui.

²Mokoondo' io ra rondo' naskhah rinulun boborok nabingkal ra kalindu' nano. Kimininjang kalayam ra pamiris nano ra raat am kalayam ra kait nano ra lantur.

³Golok io ra bolos mosongou, koson ra kukula' ngainan singa' nansangal. Pokopompogolok io, taam tulu' timpalak no ra mapuor.

⁴Pakataam ilo ayuk am tulisin ku, kaa' korongog ku rondo' bolos intor ra limbowon minindagu ra, “Sibunio' noyo atan ondo' rinagu ru tulu' timpalak ni, am pai' tulisi'.”

⁵Malaikat ondo' nakito kuno boo minigor ra raat am lantur no nangakat ra kalindu' pamiris nano patuluon ra suruga'.

⁶Pagibot io ralalom inggalan ri Aki Kapuuno' ondo' maayag ra mantilayun, am ondo' nampasauk ra suruga', tana' ti, raat no am ngaangai' suang nilono. Kon ru malaikat no, “Orou ra inaanin i kalo noyo painjulon.

⁷Paat ra malaikat katulu' no manamput ra bujung, pasaukon ri Aki Kapuuno' inatangan ondo' sinibuni Nano, ondo' pinabala' noyo ra galing i ra nabi-nabi, ioginio ulipon-ulipon Nano.”

⁸Bolos intor ra suruga' ondo' minindagu raki' ni, nambala' poyo raki', kono, “Ongoyo' noyo alapo' naskhah rinulun boborok ondo' nabingkal intor ra kalindu' ru malaikat no ondo' migor ra raat am lantur no.”

⁹Ginio ra ongoi aku ra malaikat no am kitaako' ku naskhah rinulun boborok no. Indagu io raki', “Alapo' noyo am akano'. Ralalom ru kabang muno koson io ra kinatamis ru ruu' maningot, kaa' sumimpait io ra tinai' muno.”

¹⁰Alapo' ku boo naskhah rinulun boborok no intor ra kalindu' nano am akano' ku. Ralalom ru kabang kuno koson io ra kinatamis ru ruu' maningot, kaa' io notolon ku siminimpait io ra tinai' kuno.

¹¹Binalaan aku poyo, “Pabalaa' noyo saguli' tanou intor ri Aki Kapuuno' ti ra ngaangai' pagun, bansa', ragu am raja'.”