Read Timugon Murut PINAINTALANG 12 Bible Online

PINAINTALANG 12 - Timugon Murut bible

PINAINTALANG 12

¹Giu' boo ra limbowon no makito ra rondo' tatandu' makaimuag. Sangulun ruandu' nambayang ra mato ru orou am koson kimininjang io ra bulan. Nanasampak io ra karaun ondo' binaal ra mopor am ruo butitin.

²Ruandu' no maapang am mompogolok sabap ra matipaganak noyo.

³Giu' boo ra limbowon no makito rondo' poyo tatandu' makaimuag. Mokoondo' sanginan tambuakal malia' ondo' maayo kaga', makaulu tulu' am makasangau mopor. Rorondo' ra ulu nano makakaraun.

⁴Sampitalu ru butitin ra limbowon no angkuyuron ru iku' nano am papatiron no ra tana' ti. Tambuakal no minigor ra saang ru ruandu' ondo' matipaganak no koson maginaa monolon ra anak no ra io anakon.

⁵Paganak boo ruandu' no ra sangulun anak ungkuyon ondo' inaru' mamarinta ra ngaangai' bansa' ra kuasa' kalo makaasi'. Kaa' anak no ginaau intor ra ruandu' no am inibit mongoi ri Aki Kapuuno' ra saang ru takhta Nano.

⁶Pagiru' ruandu' no ra tana' kaagisan, ioginio intok ondo' pinatampos noyo ri Aki Kapuuno' no riso. Giu' no alungin ruandu' no buoi 1,260 ngoorou.

⁷Mangayou boo giu' ra suruga' no. I Maikol am malaikat-malaikat nano mangayou ra tambuakal no. Tambuakal no inindangan ru malaikat-malaikat nano galama',

⁸kaa' kinala ilo. Tambuakal am malaikat-malaikat nano kalo boo paayanon ra suruga' no.

⁹Ginio nai ra tambuakal maayo no pinatiran ra liwar! Io ti kukuo intor ra galing i ondo' ininggalanan ra “Tingganai ru riwato”, kapoam “Ambiluo Malaat”, ondo' nampakalayau ra ngaangai' ulun ru tana' ti. Pinatiran io ra tana' ti nabaya' ra ngaangai' malaikat nano.

¹⁰Korongog ku boo bolos mapuor giu' ra suruga' minindagu, “Raino noyo i Aki Kapuuno' mamayag ra ulun Nano. Raino i Aki Kapuuno' mampakito ra kuasa' Nano koson ra raja'. Raino Mamamayag ondo' sinusub Nano mampakito niayuk ra kuasa' maayo Nano. Sabap ra io ondo' orou-rondom nanguu' ra pabukat-pabukat takau ra saang ri Aki Kapuuno', pinatiran noyo intor ra suruga'.

¹¹Pabukat-pabukat takau nangala noyo riso sabap ra Anak Domba nampasasar ra raraa' Nano, am sabap ra katapatan intor ri Aki Kapuuno' ondo' pinatanou nilo: am nakatampos ilo pampataak ra painawo nilono ra potoyon.

¹²Sabap raginio, pakaansuk noyo suruga' am ngaangai' ondo' minayan no. Kaa' aibui boo ra tana' ti am raat, sabap ra Tingganai ru riwato no timinuun ra giu' am sumangit io toojo, sabap ra nakatutun io ra kaluagan nano kalo mabuoi.”

¹³Paat ru tambuakal no nakaliman ra pinatiran io noyo ra tana' ti, timinalimpuun io boo mangilou ra ruandu' ondo' naganak ra lalagang ungkuyon no.

¹⁴Kaa' ruandu' no inanian ruo kawo ru kanui maayo, pansiab io boo mongoi ra intok inaru' i riso, giu' ra tana' kaagisan. Alungin io ra giu' no koson minggalur ra kalaatan ru tambuakal no buoi talu ngambilor maintanga'.

¹⁵Luaa' boo ru tambuakal no liur timparang intor ra kabang nano ra ruandu' no koson mangabas riso.

¹⁶Kaa' pangindangan tana' no ra ruandu' no koson ukabon kabang nano am tolono' no timug ondo' miningkual ra kabang ru tambuakal no.

¹⁷Tambuakal no siminangit kaga' ra ruandu' no, saboi ongoyo' no tulaa' papag ra bokon intor ra ruandu' no; ioginio ngaangai' ulun ondo' gumagaya' ra panusuban ri Aki Kapuuno' am ondo' mangani' ra kaintutunan intor ri Jisus.

¹⁸Bigor boo tambuakal no[6] giu' ra nagas ru raat.