Read Timugon Murut PINAINTALANG 15 Bible Online

PINAINTALANG 15 - Timugon Murut bible

PINAINTALANG 15

¹Giu' ra limbowon no makito ku boo rondo' poyo tatandu' ondo' makaimuag am maayo. Mokoondo' tulu' malaikat nabaya' ra tulu' sauk malaat ra pupus. Gitio noyo pamupusan ri Aki Kapuuno' mapaingkual ra sangit am ukum Nano.

²Kopongo raginio, kakito ku poyo rondo' baal koson ra raat asilan naratok ra apui. Nakito ku niayuk ilo ondo' nangala ra bibiag masigo, sinungkalalaing nano am ra ulun ondo' inggalan nano tinatanduan ra numbur. Minigor ilo ra kiing ru raat asilan liliwa' nampaguut ra jitor ondo' pinataak ri Aki Kapuuno' risilo.

³Narimbai ilo ra rimbai ru nabi Musa, ulipon ri Aki Kapuuno' no, ondo' mongompor ra Anak Domba no, “Tuhan, i Aki Kapuuno' Maayo Kaga' Kuasa', mumpara' boo gayo am bonsoi ru binaal Muno! Raja' ru ngaangai' bansa',[8] mumpara' boo banis am topot ru binaal Muno!

⁴Osoi kia ondo' kalo malaa' Rirun, Tuhan? Osoi kia ondo' kalo masaga' mampatanou ra urumat Muno. Okou ayuk mapasau kaga'. Ngaangai' bansa' rumatong samba Rirun, sabap ra binaal Muno ondo' matimpok nakito ru ngaangai' ulun.”

⁵Kopongo raginio, kakito ku Baloi Tuhan giu' ra suruga', naukab am Kim Sambayangan nokosoroi ra ralalom no.

⁶Ingkual tulu' malaikat nagibit ra tulu' kapaganan malaat. Binayang nilo konoon linon kopoyo am manguliat am kubab nilono inangkupan ra mas.

⁷Rondo' boo intor ra apat baal ru ilo ondo' maayag no nangani' ra tulu' malaikat no ra tulu' sangkir mas ondo' nototop ra sangit am ukum ri Aki Kapuuno' ondo' maayag ra matilayun.

⁸Baloi Tuhan no nalimpot ra lisun ru katulayan am kuasa' ri Aki Kapuuno'. Kolondo' sangulun pana makasubol ra Baloi Tuhan no buoi ru katulu' kapaganan malaat ondo' inibit ru tulu' malaikat no kalo poyo makai'.