Read Timugon Murut PINAINTALANG 18 Bible Online

PINAINTALANG 18 - Timugon Murut bible

PINAINTALANG 18

¹Kopongo raginio, kakito ku rondo' poyo malaikat ra bokon timinuun intor ra suruga'. Mokoondo' io ra kuasa' ra maayo am katulayan nano siminirang ra tana' ti.

²Pambala' io boo ra bolos mosongou, “Nalunsai noyo! Bandar Babil ondo' maayo nalunsai noyo! Raino nasauk io ra inayanan ru riwato, ambiluo malaat am ngaangai' susuit malaat ondo' kasisangin ru ulun.

³Sabap ra ngaangai' bansa' am raja'-raja' ru tana' ti nansasawa' ilo ra mamagun ru bandar i, koson ra ulun mangagauk ra wain. Intor raginio ulun-ulun mantatalan nano lumangkaya'.”

⁴Kopongo raginio, korongog ku poyo bolos ra bokon intor ra suruga', kono, “Ulun mangintopot Raki', ingkual no intor ra bandar Babil no. Pai' kano baya' ra tula nilo am pai' baya' risilo ra maukuman poyo.

⁵Sabap ra tula nilo natuntur noyo suku' ra limbowon, am kalaatan nilo makara' ri Aki Kapuuno'.

⁶Baalo' noyo risilo maya' ra binaal nilo ramuyun; balasi' noyo ra suang mainduaan ra ngaangai' binaal nilo. Suangi' noyo sangkir nilo ra inumon ondo' mainduaan bisa' intor ra inumon ondo' pinasulung nilo ramuyun.

⁷Imboloo' ilo saboi mangiluk guang nilo, saboi kangilukan nilo mogondo' ayuk ra kauligan am kalangkayaan nilai. Sabap ra masalok ilo mangkara': ‘Akai ti maayag koson ra raja'. Pai' ru makaliman akai ra guang mangiluk.’

⁸Sabap raginio, ralalom songorou ayuk matiu' ilo ra sauk malaat: maruol, guang mangiluk am bitilan. Bandar nilo umpoon ra apui, sabap ra i Aki Kapuuno', Tuhan ondo' Maayo Kaga' Kuasa', mangukum risilo.”

⁹Raja'-raja' ru tana' ondo' nansasawa' am liminangkaya' intor risilo, mantatangi' ilo ra bandar no paat makito nilo lisun ru apui ondo' mangumpo no.

¹⁰Migor ilo ra maalur sabap ra malaa' ilo maingkinibitan ra kaimbalaan no, konilo, “Aibui, bandar ondo' nauligan toojo ru ulun. Aibui, bandar Babil ondo' maayo. Ralalom sanjam ayuk pangukuman rirun!”

¹¹Ulun-ulun mantatalan mantangi' am mangiluk guang sabap ra bandar i, sabap ra kolondo' boo mambali ra kuliamos talanon nilono.

¹²Kolondo' boo mambali ra mas, pirok, parmata am sisigot mutiara nilono; niayuk konoon linon, konoon matanggilung, sutra' am konoon kasumba'; ngaangai' bansa' ru tataun maamis owou, kuliamos binaal intor ra ripon ru gaja am intor ra tataun ondo' mongologo; kuliamos binaal intor ra gangsa', basi' am pualam;

¹³am kaningau, apa' pampagamis ra akanon, salong, mur am kaminyan; wain am umau; tapung am gandum; sapi' am domba, kuda am kurita', am ulun pana tinalan, ioginio ulipon.

¹⁴Ulun-ulun mantatalan mindagu ra mamagun no, “Ngaangai' kuliamos ondo' ginogot mino naliom boo am kalangkayaan am kauligan mino matatak. Kalo boo matuum min ginio.”

¹⁵Ulun-ulun mantatalan ondo' nakalangkaya' sabap ra nantalan ra ralalom bandar raginio, migor ilo intor ra maalur, sabap ra malaa' ilo maingkinibitan ra kalunsayan nano. Mantatangi' am mangulir ilo.

¹⁶Konilo, “Aibui, bandar ondo' nauligan toojo ru ulun. Buoi ti mamagun no mambayang ra konoon linon kopoyo, konoon matanggilung am konoon kasumba'; am manakin ra mas, parmata am sisigot mutiara.

¹⁷Kaa' ralalom sanjam ayuk matatakan io ra kalangkayaan nano.” Ngaangai' tingganai ru kapal, ondo' siminakoi am ondo' mangandoi ra kapal am ngaangai' ru ulun ondo' kandoi nilono giu' ra raat no; migor ilo ra maalur.

¹⁸Paat ra nakito nilo lisun ru apui ondo' monolob ra bandar no, golok ilo, konilo, “Kolondo' bandar ra bokon koson ra bandar ondo' maayo ti!”

¹⁹Patauko' nilo boo kaau ra ulu nilai koson tatandu' ra ilo ti mangulir, pantangi' am pompogolok ilo, “Aibui, bandar ondo' nauligan toojo ru ulun. Akai tatangan ra kapal-kapal liminangkaya' intor ra kalangkayaan ru bandar ni. Kaa' ralalom sanjam ayuk matatakan mamagun ru bandar no ra ngaangai'.”

²⁰Pakaansuk mamagun ru suruga' ra kalunsayan ru bandar no. Pakaansuk ulun ri Aki Kapuuno', rasul am nabi, sabap ra linunsai noyo ri Aki Kapuuno' bandar no koson balos ra atan ondo' binaal ramuyun ru mamagun raginio.

²¹Rondo' malaikat ra maikang no boo nangkayang ra rondo' batu kinsaran maayo am patiri' no ra raat am indagu, “Koson noyo ragitio baal ru bandar Babil ondo' maayo, lunsayon saboi mapuso am kalo boo makito io.

²² Bolos ru jitor, rimbai, tulali am bujung kalo boo rongogon ra intok no. Kolondo' boo sangulun mangandoi ra giu' no am bolos ru batu kinsaran pana kalo boo rongogon.

²³Kalo boo makito sinda ru pilasut ra intok muno am kalo niayuk morongog bolos ru ungkuyon am ruandu' uoton ra giu' no. Ulun-ulun mantatalan ru bandar nauligan toojo ru ulun ra tana' ti; am intor ra kapandayan malaat ru mamagun no ngaangai' bansa' ra tana' ti rinuung.”

²⁴Bandar Babil no linunsai sabap ra mamagun no nampatoi ru nabi-nabi am ulun ri Aki Kapuuno' ra giu' no — ioginio nampatoi ilo ra ulun ra titikop ru tana' ti.