Read Timugon Murut PINAINTALANG 22 Bible Online

PINAINTALANG 22 - Timugon Murut bible

PINAINTALANG 22

¹ Malaikat no niayuk nanulu' raki' ra sungoi ondo' mampakaayag. Sungoi no manguliat koson ra kristal am mugar intor ra takhta ri Aki Kapuuno' am Anak Domba no ra tatanga' ralan ru bandar no. Sapapa'-mansapapa' ra kiing ru sungoi no, mokoondo' puun ru mampakaayag ondo' mangkawa' inggopor am ruo sambilor, ioginio igondo' sambulan. Raun nano alapon pamabas ra bansa'-bansa'.

³Giu' ra bandar no kolondo' rondo' pana ondo' inibatan ri Aki Kapuuno'. Takhta ri Aki Kapuuno' am Anak Domba no sumoroi ra bandar no am ulipon-ulipon Nano sumamba Riso ra giu' no.

⁴Makakito ilo ra bulos Nano am inggalan Nano tulisin ra rabas nilono.

⁵Kolondo' boo kalandaman ra giu' no. Pilasut am mato ru orou kalo boo makapakuan ilo, sabap ra i Aki Kapuuno', Tuhan galama', sumauk ra sinda nilo, am mamarinta ilo koson ra raja' ra sabuoi-buoi no.

⁶Indagu boo malaikat no raki', “Ragu ragitio motopot am malansanan. I Aki Kapuuno', Tuhan ondo' mansail ra Ambiluo Nano manguasa' ra nabi-nabi, nanusub ra malaikat no mampakito ra ulipon-ulipon Nano atan maaru' masauk ra maagu no.”

⁷Indagu i Jisus, “Rongogo' min gitio. Kalo boo mabuoi am matong Aku. Pakaansuk no ilo ondo' gumagaya' ra ondo' tinulisan ra kitab ti, ioginio ondo' masauk ra maagu no!”

⁸Aku i Juanis, nokorongog am nakakito aku noyo ra ngaangai' ragitio. Pokorongog am pakakito aku raginii, pakalaub aku ra kalayam ru malaikat ondo' nampakito noyo ra ngaangai' ti raki'. Sumamba aku raan riso

⁹kaa' indagu io raki', “Pai' aku sambaa'. Sambaa' noyo i Aki Kapuuno'. Sabap ra aku pana rangan mangngandoi muno, am koson ra pabukat-pabukat muno ioginio nabi-nabi no, am ngaangai' ondo' gumagaya' ra bala' tinulisan ra kitab ragitio.”

¹⁰Indagu io poyo raki', “Pai' noyo pasibunio' bala' ondo' pinaintalang ralalom kitab ti, sabap ra mamaar noyo orou ngaangai' baal ragitio masauk.

¹¹Maaru' ulun malaat marayus mambaal ra malaat; am maaru' makauyuyu' marayus mampakauyu'. Maaru' ulun motopot marayus mambaal ra motopot; am maaru' ulun mapasau marayus maayag ra mapasau.”

¹²Indagu poyo i Jisus, “Rongogo' min gitio, kalo boo mabuoi am matong Aku am balasin Ku moonong ulun maya' ra atan ondo' binaal nali.

¹³Aku noyo talimpuun am pupus; Aku noyo kasaa' am pangayaan.”

¹⁴Pakaansuk noyo ilo ondo' mampupu' ra sukub nilono suku' mapasau, bagu no makaakan ilo ra kawa' intor ra puun ru mampakaayag am maya' ra umpasan sumubol ra bandar no.

¹⁵Kaa' ulun mambaal ra makauyuyu' am majamol, ulun makakapandayan malaat, mansasawa', mamamatoi, ondo' sumamba ra sinungkalalaing, am ulun magagabau — iou pana maya' ra ragu kapoam binaal nano; ngaangai' ulun ragitio intok nilo ra liwar ru bandar no.

¹⁶“Aku, i Jisus, nakapanusub Aku no ra malaikat Kuno mongoi pampabala' ramuyun ra baal ragitio ra pasimpungan ulun Kristian no. Aku ti papag ru raja' Daut; Aku no butitin sirangon ondo' mapaang no.”

¹⁷Ambiluo ri Aki Kapuuno' am Ruandu' Uoton ru Anak Domba mindagu, “Ibok no.” Moonong ulun ondo' mangining ragitio musiti' mindagu, “Ibok no.” Osoi ayuk pinaason am osoi ayuk masaga', ibok am apuo' noyo timug ondo' mampakaayag ra kalo kilagain.

¹⁸Aku, i Juanis, mampakara' toojo ra moonong ulun ondo' mokorongog ra bala' ondo' tinulisan ra kitab ragitio; osoi ayuk mamparuang ra bala' ti, ruangin ri Aki Kapuuno' ukum ru ulun no ra kapaganan malaat ondo' pinabala' ralalom kitab ragitio.

¹⁹Amon ru osoi ayuk mangiruru' ra bala' ondo' tinulisan ra kitab ragitio; iruon niayuk ri Aki Kapuuno' tayar nano intor ra kawa' ru puun ru mampakaayag am intor ra Bandar Matulai no, ondo' pinabala' ralalom kitab ragitio.

²⁰Io ondo' mampasaboi ra ngaangai' kaintutunan ti mindagu, “Motopot, kalo boo mabuoi am matong Aku.” Amin! Ratong no, Tuhan Jisus!

²¹Gama' ru Tuhan Jisus mambarakat ra ngaangai' ulun.[13]