Read Timugon Murut PINAINTALANG 9 Bible Online

PINAINTALANG 9 - Timugon Murut bible

PINAINTALANG 9

¹Malaikat kalimo no boo nanamput ra bujung. Kakito ku boo rondo' butitin ondo' riminatu' ra tana' i am butitin no inanian ra kunsi' ru intok ru ulun namagatoi.[5]

²Ginio ra ukabo' ru butitin no intok no am buun ru lisun intor ra ralalom no koson ra lisun ru kataunan mosolob. Mato ru orou am limbowon no liminondom sabap ra suang ru lisun intor ra giu' i.

³Intor boo ra lisun no kumuliampun gapu'-gapu' ra tana' ti am ilo ti inanian ra kuasa' koson ra lingait.

⁴Ilo ti binalaan ra kalo mampalunsai ra sakot, puun tataun kapoam tutuu' ra tinanom no. Mampasinduol ilo ayuk ra ulun ondo' kolondo' tatandu' ri Aki Kapuuno' ra rabas nilono.

⁵Gapu'-gapu' kalo pomotoyon ra ulun kolondo' tatandu' no, kaa' nangimbolo' ilo risilo ayuk buoi limo ngambulan. Maruol ru pangimbalaan ru gapu'-gapu' koson ra ruol ru singot ru lingait.

⁶Buoi ru limo ngambulan no maguyum ulun-ulun ra patayan, kaa' kalo matoi ilo; moogot ilo matoi kaa' kapatayan maalur intor risilo.

⁷Gapu'-gapu' koson ra kuda ondo' nakatampos noyo mongoi pantula'. Ulu nilono mokoondo' koson ra karaun mas. Bulos nilono koson ra bulos ru ulun.

⁸Abuk nilono maawar koson ra abuk ru ruandu' am ripon nilono malarom koson ra ripon ru singa'.

⁹Kubab nilono inangkupan koson ra bayang basi' ru saujor, am bolos ru kawo nilono koson ra kinasuang ru kurita' kuda ondo' magiribok mongoi ra pangayawan.

¹⁰Ilo ti makaiku' am makasisingot koson ra lingait. Iku' nilono mampasinduol ra ulun buoi limo ngambulan.

¹¹Ilo ti mokoondo' ra sangulun raja' ondo' mamarinta risilo, am raja' ti noyo malaikat ondo' makakunsi' ra intok ru ulun namagatoi. Inggalan nati ralalom ragu ru Ibrani iono Abadon, am ralalom ragu ru Junani iono Apolion (ondo' arati' no “i Mampalunsai”).

¹²Sauk malaat kasaa' nakasail noyo. Mopongo raginio ruo poyo sauk malaat rumatong.

¹³Malaikat koonom no boo nanamput ra bujung. Korongog ku boo bolos intor ra kaapat sangau ru panalaban ra kaminyan ondo' binaal intor ra mas no giu' ra saang ri Aki Kapuuno'.

¹⁴Indagu bolos ti ra malaikat koonom no, “Labusi' noyo apat malaikat ondo' nabangkil giu' ra sungoi ru Iprat no!”

¹⁵Kaapat-apat malaikat no pana linabusan. Pinatampos ilo noyo ra jam, orou, bulan am bilor raginio koson mamatoi ra sampitalu ru ngaangai' ulun ru tana' ti.

¹⁶Binalaan aku ra suang ru sampulalai ondo' nanangkuda mokoondo' 200 ngajuta'.

¹⁷Ralalom pagilangan kuno, nakito ku kuda-kuda am ulun-ulun nangura' no: kubab nilo inangkupan ra bayang basi' koson ra kinalia' ru baa ru apui, kinotomou ru batu nilam, am kinasilou ru balirang. Ulu ru kuda-kuda koson ra ulu ru singa' am intor ra kabang nilono miningkual apui, lisun am niayuk balirang.

¹⁸Sampitalu ru ngaangai' ulun no minatoi ra talu kapaganan malaat no: intor ra apui, lisun am balirang ondo' miningkual ra kabang ru kuda-kuda.

¹⁹Kuasa' ru kuda-kuda soroi ra kabang am niayuk ra iku' nilono. Iku' ru kuda koson ra kukuo makaulu ondo' mampasinduol ra ulun.

²⁰Kaa' ulun-ulun ra bokon ondo' kalo napatoi ra talu kapaganan malaat no, kalo niayuk timinalikur intor ra ondo' binaal ru kalindu' nilo galama'. Kalo liminonggo' ilo sumamba ra riwato am sinungkalalaing ondo' binaal nilo ra mas, pirok, gangsa', batu am tataun. Ginilo kalo makakito, mokorongog kapoam makaugar.

²¹Ilo kalo niayuk lumonggo' mamatoi, mangimaya' ra kapandayan ru sihir, mansasawa' am mantatakou.