Read Timugon Murut RUT 4 Bible Online

RUT 4 - Timugon Murut bible

RUT 4

¹Ongoi i Boas ra baloi pantuuman giu' ra kulobon garabang ru bandar am panturung io. Paat ragili pansail ulun ondo' sabiton no ra pabukat mamaar ri Ilimilik no. Piawo' ri Boas ulun no. “Ibok no pabukat ku,” kono. “Panturung no.” Ratong pabukat no am panturung ra giu' no.

²I Boas pana nakitaak ra mopor ngaulun tingganai ru bandar no koson maya' panturung ra giu' no. Ilo pana nanturung,

³indagu i Boas ra pabukat nano, “Nakasaguli' noyo i Naomi intor ra Moab, am mantalan io ra tana' longgom ru pabukat takau i Ilimilik.

⁴Kara' ru guang kuno akau musiti' balain pagulu. Amon moogot kau mambali ra tana' no moonsoi balion min ra saang ru masuang ulun nanturung ragiti. Kaa' amon ru kalo masaga' kau mambali ra tana' no, pambala' no; sabap ra akau noyo maatang mambali am bagu no aku.” Indagu ulun no, “Balion ku tana' no.”

⁵Indagu poyo i Boas, “Iou noyo. Amon ru balion min tana' no intor ri Naomi, arati' no alapon min niayuk i Rut,[8] ruandu' napuor ru bansa' ru Moab no. Koon raginio tana' no lakat poyo longgom ru ulun minatoi.”

⁶Taam ulun no, “Koon poyo ragino kalo masaga' aku mambali ra tana' no. Balion ku pana tana' no, lalaing-lalaing kuno kalo makatungkus raginio. Okou noyo mambali ra tana' no, kalo boo masaga' aku.”

⁷Bulintok ragili, koson mangiou ra pantalanan kapoam pangaligan ra rapu', kaubasan no paguson ru mantalan no kasut nano am taakin ra ulun mambali. Sumugut ra kaulayan ru Israil, koon raginio napatas noyo nantalanan ra tana' no.

⁸Ginio ra, paat ra ulun no minindagu ri Boas, “Okou noyo mambali ra tana' no,” paguso' no kasut nano am taaki' no ri Boas.[9]

⁹Kopongo raginio indagu i Boas ra tingganai-tingganai no am ngaangai' ru ulun ondo' soroi ra giu', “Akau noyo sasi' ra orou raiti', ra intor ri Naomi binali ku ngaangai' longgom ri Ilimilik am anak-anak nano, i Kilion am i Maglon.

¹⁰Ra am poyo i Rut ruandu' ru Moab no, napuor ri Maglon no, andu' ku raino ti. Raginio noyo, tana' longgom ru ulun minatoi masauk ra longgom mantilayun ru papag nano. Papag nano pana magulayun soroi ra pabukat-pabukat nano am mayan ra bandar nano. Akau noyo sasi' ru ginio ra orou raiti'.”

¹¹Ngaangai' tingganai ru bandar am niayuk ngaangai' ru ulun soroi ra giu' i, mindagu, “Ba iou, akai no sasi'. Gama' ru TUHAN mapasauk ra andu' muno koson ri Ragil am i Liya, ondo' naganak ra masuang anak ri Jakub. Gama' ru masauk kau langkaya' ra popolos ru bansa' ru Iprata am mauligan kaga' giu' ra Bitligim.

¹²Gama' ru anak-anak ondo' taakin ru TUHAN rirun intor ra ruandu' mamulok ti mapasauk ra sasambaloi muno koson sasambaloi ri Piris, anak ri Jiuda am i Tamar.”

¹³I Boas pana nagibit boo ri Rut minuli' koson andu' no. Binarakat ru TUHAN i Rut am kaapang io, am paganak io sangulun anak ungkuyon.

¹⁴Ruandu'-ruandu' ra giu' no mindagu ri Naomi, “Koompor noyo TUHAN! Orou raiti', nanaak io rirun sangulun akupu ondo' nagalung rirun. Gama' ru mauligan kaga' anak no giu' ra Israil ra tauli no.

¹⁵Motogom mangiwan muno rirun nanguyumo rirun moonsoi poyo intor ra tulu' ngaulun anak ungkuyon. Raino nanaak io rirun ra sangulun akupu ondo' mangulau suku' masauk ra kaayagan bagu rirun, am magalung rirun ra okou matutuo.”

¹⁶Alapo' ri Naomi anak no, kubibilo' no am talanaako' no.

¹⁷Ruandu'-ruandu' ondo' pasambalayan ri Naomi nanginggalan ra anak no i Obid. Mindagu ilo ra moonong ulun, “I Noami makaanak sangulun ungkuyon!” I Obid ti noyo masauk ra ama' ri Isai ra tauli no, am i Isai masauk ra ama' ri Daut.

¹⁸Papag ri Piris polos ri Daut koson ragitio: Piris, Gijron, Ram, Aminadab, Nagason, Salmon,[10] Boas, Obid, Isai, am Daut.