Read Timugon Murut 1 SAMUIL 13 Bible Online

1 SAMUIL 13 - Timugon Murut bible

1 SAMUIL 13

¹Sangarawan raginio, paat ra Raja' Saul nasauk ra raja',[28]

²nampili' io ra talu ngaribu ngaulun ru Israil; intor ru suang ragitio, ruo ngaribu ngaulun minayan simpung riso giu' ra Mikmas am giu' ra kabuluran ru Bitil. Suang saribu ngaulun ra bokon minongoi nababaya' ri Jonatan, anak ungkuyon nano giu' ra Gibia, giu' ra wilayah ru bansa' ru Binjamin. Ulun ra suwo no sinusub ru Raja' Saul minuli' ra baloi ru sigagama'.

³Kopongo raginio namatoi i Jonatan ra panglima ru Palistin[29] giu' ra Giba, am ulun ru Palistin nokorongog ra namatayan no. Nanusub boo Raja' Saul ra ulun manamput ra bujung giu' ra titikop ru pagun koson mampiau ra ulun ru Ibrani maa' raginio jumalai ra mangayou.

⁴Ngaangai' ulun ru Israil binalaan ra Raja' Saul namatoi noyo ra panglima ru Palistin no, am ra ulun ru Palistin masisang kaga' ra ulun ru Israil. Ginio ra tininong ru mamagun piau koson mumung ra Raja' Saul giu' ra Gilgal.

⁵Liliwa' raginio ulun ru Palistin niayuk timinimung koson mamulunsar ra ulun ru Israil. Ulun ru Palistin mokoondo' talu ngoopor ngaribu[30] kurita' kuda, onom ngaribu ulun nangkuda am saujor ra kinasuang ru agis giu' ra nagas. Nangkim ilo giu' ra Mikmas tampilon ra sirangon ru Bit-Awin.

⁶Kopongo raginio namulunsar ilo ra masaran ra ulun ru Israil, saboi ulun ru Israil soroi ra makalalaa'. Kukula' ngaulun ru Israil nansibuni giu' ra ralalom ru luang batu am luang ru gunung, kapoam siminilot ra ralalom ru batu maayo, kapoam giu' ra ralalom ru tulubong am luang ru tana'.

⁷Mokoondo' niayuk kukula' ngaulun ondo' liminaup ra Sungoi Jordan, am minongoi ra wilayah ru Gad am Giliad. Lakat poyo Raja' Saul no soroi ra Gilgal, am ulun-ulun ondo' minaya' riso nonontol ra nalaa'.

⁸Naginaa Raja' Saul ri Samuil buoi tulu' ngoorou, koson ra bilin ri Samuil riso, kaa' i Samuil kalio poyo nakasaboi ra Gilgal. Kopongo raginio ulun ru Israil tumalimpuun mangiruan ra Raja' Saul.

⁹Indagu Raja' Saul risilo, “Ibito' min ragiti taak simbalui koson mapabansuk ra guang ru TUHAN[31] am taak simbalui koson makibarakat ra TUHAN.”[32] Raja' Saul galama' boo ondo' napataak ra taak simbalui no,

¹⁰kaa' kopongo ayuk Raja' Saul napataak raginio, nakasaboi i Samuil. Tuum Raja' Saul ri Samuil ra manguma' riso,

¹¹kaa' nangkuot i Samuil, “Atan kia binaal mu noyo?” Taam Raja' Saul, “Nakakito aku ra mamagun tumalimpuun noyo mangiruan raki', am okou kalio minatong ra paat ondo' inaru' muli. Mulu' poyo ra timinimung noyo ulun ru Palistin giu' ra Mikmas.

¹²Ginio ra nangkara' aku, ‘Ati lair ru saujor ru Palistin mataki' mamulunsar raki' ragiti, ra Gilgal, alika aku ti kalo poyo nakimasi' ra TUHAN.’ Ginio sabap ra namatas aku koson mapataak ra taak simbalui.”

¹³Taam i Samuil, “Sasambungon binaal muno. Kalo giminagaya' kou ra susuban ru TUHAN, i Aki Kapuuno' muno, rirun. Amon ru giminagaya' kou, maaru' mangiou TUHAN no rirun am papag muno mamarinta ra Israil ra mantilayun.

¹⁴Kaa' raino pamarintaan muno kalo mabuoi. Sabap ra okou kalo giminagaya' Riso, TUHAN no maguyum ra ulun bokon ondo' kasagain Nano koson pilion masauk ra raja' ru ulun Nano.”

¹⁵Kopongo raginio nangiruan i Samuil ra Gilgal am naparayus ra pangkiralanan nano. Ulun ra bokon no minaya' ra Raja' Saul koson mamung ra saujor nano. Kopongo raginio intor ilo ra Gilgal minongoi ra Gibia giu' ra wilayah Binjamin. Tinutun ru Raja' Saul pulalai nano am napandayan no ra suang no olo'-olo' onom ngaatus ngaulun.

¹⁶Raja' Saul, anak ungkuyon nano i Jonatan, am saujor nilono nangkim ra Giba giu' ra wilayah Binjamin, liliwa' ulun-ulun ru Palistin nangkim giu' ra Mikmas.

¹⁷Paat raginio niayuk talu ngampulalai saujor ru Palistin minugar intor ra pangkiman ru Palistin no koson mantakou; sampulalai ra kasaa' no minongoi ra tampilon Opra giu' ra wilayah Syual,

¹⁸sampulalai ra karuo no sumuku' ra Bit-Oron, am sampulalai ra rondo' poyo sumuku' ra balitan ondo' mongoi ra Limayak Jiboim am tana' kaagisan.

¹⁹Paat raginio giu' ra titikop ru Israil kolondo' ulun manukang ra basi', sabap ra ulun ru Palistin kalo mangiou ra ulun ru Ibrani mambaal ra ilang am tutura'.

²⁰Ginio ra ulun ru Israil minongoi kalalaat ra ulun ru Palistin amon ru masaga' mangasa' ra radu', sangkul, kapak am tantab[33] nilono.

²¹Pambayar no sampila' ruit boborok ra tayar mangasa' ra kapak kapoam mamuna' ra kusa ru sapi',[34] am ruo ngampila' ruit boborok ra tayar mangasa' ra radu' kapoam sangkul.

²²Ginio ra, paat ra pangayawan giu' ra Mikmas, kolondo' sangulun pana intor ra saujor ru Israil nanangilang kapoam nantutura', ondo' ayuk am Raja' Saul am i Jonatan, anak ungkuyon nano.

²³Ulun ru Palistin nampaayan ra sampulalai saujor koson magalung ra ginting ru gunung giu' ra Mikmas.