Read Timugon Murut 1 SAMUIL 14 Bible Online

1 SAMUIL 14 - Timugon Murut bible

1 SAMUIL 14

¹Sangarawan raginio, indagu i Jonatan ra buayoi magibit ra kinandoi nano, “Ibok ongoi to ra pangkiman ru ulun ru Palistin.” Kaa' kalo binalaan ri Jonatan ama' nano, Raja' Saul no.

²Paat raginio soroi Raja' Saul ra saau ru puun dalima' giu' ra Migron, kalo maalur intor ra Gibia; mokoondo' ra olo'-olo' onom ngaatus ngaulun nababaya' ra Raja' Saul.

³(Imam ondo' nagibit ra efod paat raginio iono i Agiya anak ri Agitub, akupu ri Pinigas anak ri Ili; i Ili ti iono imam ru TUHAN giu' ra Silo. I Agitub ti iono pabukat ri Ikabod.) Kolondo' sangulun ra giu' no naala' ra minugar noyo i Jonatan intor ra intok raginio.

⁴Koson mongoi ra pangkiman ru Palistin, musiti' i Jonatan mansail ra ginting ru gunung ondo' nakatatanga' ra ruo batu maayo ondo' manius, ondo' ininggalanan ra Bojis am Sini.

⁵Batu maayo ondo' tampilon ra ralayo tumingkuang ra Mikmas, am batu maayo ondo' rondo' poyo, ondo' tampilon ra rabugus tumingkuang ra Giba.

⁶Kon ri Jonatan ra buayoi no, “Ibok ongoi to ra pangkiman ru ulun ru Palistin ondo' kalo nakaulig ri Aki Kapuuno'. Maaru' lair ru mangindangan TUHAN no rito, sabap ra makapangani' Io ra kamanangan, iou ra masuang ulun kapoam ra sanganu ulun.”

⁷Taam buayoi no, “Atan ayuk ondo' masaga' mu baalon,[35] mangiou aku.”

⁸Kon ri Jonatan, “Iou noyo, Paat ra ito mongoi ra sandaup, tumalang to ra ulun ru Palistin.

⁹Amon ru manusub ilo rito muog am maginaa risilo matong rito, sumoroi to ra giu' no am kalo pana mongoi ra sandaup.

¹⁰Kaa' amon ru manusub ilo rito mongoi risilo, mongoi to ra giu' no, sabap ginio noyo tatandu' no ra pataakon ilo ru TUHAN no rito.”

¹¹Ginio ra pinoloso nilo ulun ru Palistin nakakito risilo. Indagu boo ulun ru Palistin, “Ilai' kon! Mokoondo' ulun ru Ibrani miningkual intor ra luang nansibunian nilono!”

¹²Pampiau ilo boo ri Jonatan am ulipon nano, “Ibok kau ragiti! Mokoondo' ondo' masaga' mai pakitonon[36] ramuyun!” Kon ri Jonatan ra buayoi no, “Baya' no raki'. Napataak noyo TUHAN no risilo ra Israil.”

¹³Binaya' ru buayoi no nanungkama' i Jonatan ra rasawat ru ginting no saboi nakasail raginio. Namulunsar i Jonatan ra ulun ru Palistin am nangaratu' ilo sabap ra linamba' no, am buayoi no namatoi risilo.

¹⁴Ralalom ru pangayawan kasaa' no, i Jonatan am buayoi no namatoi ra olo'-olo' ruo ngoopor ngaulun giu' ra intok ra langka' no sampiapat hektar.[37]

¹⁵Kasaukan raginio napakalaa' kaga' ra ngaangai' ulun ru Palistin giu' ra tampilon ru liwar bandar; pulalai ru mantakou am saujor ru Palistin giu' ra pangkiman nonontol ra nalaa'; am poyo nogonggon tana' ti, am nasauk kajajawan.

¹⁶Liliwa' raginio saujor ru Raja' Saul ondo' nagalung giu' ra Gibia, giu' ra wilayah Binjamin nakakito ra ulun ru Palistin nagigiru' ra nangaubong.

¹⁷Ginio ra indagu Raja' Saul ra saujor-saujor nano, “Untobo' min kon saujor takati am tutuno' min osoi ondo' kalio.” Paat ilo nambaal raginio, katutuni' nilo ra i Jonatan am buayoi magibit ra kinandoi nano kalio ra giu' no.

¹⁸Indagu Raja' Saul ra Imam Agia, “Ibito' noyo efod[38] no ragiti.” (Paat ra orou raginio inibit ru Imam Agia no efod ra saang ru ulun ru Israil).[39]

¹⁹Paat ra Raja' Saul lakat poyo mindagu ra imam no, baal ru giu' ra pangkiman ru ulun ru Palistin gumaai jajajou. Ginio ra indagu Raja' Saul riso, “Kalo boo makarampot takau koson makitulu' intor ra TUHAN!”

²⁰Raja' Saul am saujor-saujor nano pana minongoi boo ra intok pangayawan. Giu' no nakakito ilo ra ulun ru Palistin ondo' najajajou; ilono magagabu' am mampatoi ra rondo' am bokon.

²¹Kukula' ngaulun Ibrani ondo' minayan giu' ra libung ru ulun ru Palistin am ondo' minaya' noyo ra saujor nilono, nangulau saguli' ra binayaan[40] am ongoi simpung ra Raja' Saul am i Jonatan.

²²Ulun ru Israil ondo' nansibuni giu' ra kabuluran Ipraim niayuk nokorongog ra nagigiru' noyo ulun ru Palistin, ongoi ilo boo simpung ra Raja' Saul am namulunsar ra ulun ru Palistin.

²³Giminula' ulun ru Israil ra galur ru ralan saboi nakasail ra Bit-Awin. Namayag TUHAN ra ulun ru Israil ra orou raginio.

²⁴Paat orou raginio mangalawo ulun ru Israil ra nangaitilan sabap ra Raja' Saul nagibot koson ragitio, “Kaulas noyo ulun ondo' mangakan ra atan pana ra orou raiti', ra kalo poyo mansuli' aku ra pantula'.” Ginio ra kolondo' sangulun pana ondo' nangakan buoi ru orou raginio.

²⁵Kopongo raginio ilo ngaangai'[41] nakasaboi giu' ra rondo' kataunan am nakatuum ra masuang kaga' ruu' maningot,

²⁶kaa' kolondo' sangulun pana ondo' nangakan ra ruu' maningot no. Malaa' ilo matiu' ra ulas ondo' rinagu ru Raja' Saul.

²⁷Kaa' kalo nakapandai i Jonatan ra ama' nano nopololob noyo ra mamagun ra ulas raginio; ingkualo' no boo jujuga' ondo' inibit nano, am patujoko' ra ralalom ru tambaloi ru maningot no, am niayuk nangalap ra ruu' maingot no am inakan no. Pulali' no nakaliman ra moonsoi am gumaai maikang.

²⁸Kopongo raginio indagu sangulun intor ra saujor no riso, “Akai ngaangai' kalo boo makalulu' ra naitilan. Kaa' nopololob i ama' muno ramon am minindagu, ‘Kaulas noyo ulun ondo' mangakan ra atan pana ra orou raiti'.’ ”

²⁹Taam i Jonatan, “Mapara' boo najanjayan binaal ru ama' kuno ra bansa' takati! Ilai' noyo, baal ku raino ti moonsoi poyo nalupus ra aku nangakan ra sanganu ruu' maningot.

³⁰Amon ru pinaakan mamagun ra akanon ondo' ginaau paat nangala ra pantula' ra orou raiti', maaru' masuang poyo ulun ru Palistin mapatoi nilo.”

³¹Paat orou raginio ulun ru Israil nangala ra ulun ru Palistin nalupus nangayou ra galur ru ralan intor ra Mikmas saboi ra Ayalon. Paat raginio malawo ilo kaga' sabap ra naitilan,

³²saboi nagagaau ilo nangalap ra kuliamos ondo' bagu tinalingaau intor ra pantula'; nangalap ilo ra domba am sapi', am niayuk nanimbalui ra ngaangai' no ra intok raginio niayuk, am rayus nanginta' ra kual ondo' lakat poyo makararaa'.

³³Kopongo raginio binalaan Raja' Saul ra baal raginio, “Raja' mai, makatula mamagun ra TUHAN sabap ra nanginta' ra kual ondo' lakat poyo makararaa'.” Golok Raja' Saul, “Totopot kano ra najanjayan! Luiro' kon rondo' batu maayo ragiti!”[42]

³⁴Kopongo raginio rondo' poyo susuban ru Raja' Saul, “Ongoi kano ra mamagun am susubo' noyo ilo magibit ra ngaangai' sapi' am domba ragiti. Moonsoi simbaluyon nilo bibiag no ra tampak ru batu ti am mangakan raginio ragiti. Ilo kalo sotopot no makatula ra TUHAN ra manginta' ra kual ondo' lakat poyo makararaa'.” Rondom raginio niayuk inibit nilo ngaangai' bibiag ra ginaau am sinimbalui ngaangai' no ra giu' no.

³⁵Raja' Saul pana nambaal boo ra rondo' altar ra tayar ru TUHAN. Ginio noyo altar kasaa' ondo' binaal ru Raja' Saul.

³⁶Indagu boo Raja' Saul ra ulun-ulun nano, “Ibok ongoi takau bulunsaro' ulun ru Palistin ra rondom no, am takawin ilo saboi matawangan, am niayuk mamatoi risilo ngaangai'.”

³⁷Ginio ra nangkuot Raja' Saul ri Aki Kapuuno', “Ongoyon ku kia bulunsaro' ulun ru Palistin? Mangani' Kou kia ra ulun ru Israil ra kamanangan?” Kaa' kalo timinaam i Aki Kapuuno' ra orou raginio.

³⁸Raja' Saul pana mindagu boo ra tingganai-tingganai ru mamagun, “Ibok kau ragiti am tutuno' min noyo atan ra tula ondo' binaal ra orou raiti'.

³⁹Nambantu' aku ralalom inggalan ru TUHAN ondo' naayag, ondo' mangani' ra kamanangan ra Israil, ra ulun ondo' makasala ukumin ra matoi, inda' pana ru io i Jonatan anak ungkuyon kuno galama'.” Kaa' kolondo' sangulun pana naguta'.

⁴⁰Raja' Saul pana mindagu boo risilo ngaangai', “Akau ngaangai' no bigor kau tampilon ra giu' no; i Jonatan am aku migor tampilon ragiti.” Taam ilo, “Baalo' noyo atan ayuk ondo' moonsoi kaga' sumugut ra karaan muno, raja' mai.”

⁴¹Indagu Raja' Saul ra TUHAN, i Aki Kapuuno' ru Israil, “Iou TUHAN, i Aki Kapuuno' ru Israil, kua kinua' kalo tumaam Kou raki' ra orou raiti'? Iou TUHAN, taamo' aku ra pulanui' batu-batu ondo' mapasau ti. Amon ru i Jonatan kapoam aku ondo' makatula, taamo' ra ralalom ru batu Urim; kaa' amon ru ulun ru Israil ondo' makatula, taamo' ra ralalom ru batu Tumim.”[43] Taaman ru TUHAN no nanulu' ri Jonatan am Raja' Saul; am kon raginio kolondo' sala ru mamagun.

⁴²Kon boo ru Raja' Saul, “Raino tuluo', ru i Jonatan kapoam aku ondo' makasala.” I Jonatan tinulu' ra makasala.

⁴³Nangkuot Raja' Saul ri Jonatan, “Atan kia boo binaal muni?” Taam i Jonatan, “Inakan ku sanganu ruu' maningot ondo' inalap ku ra pompor ru jujuga' kuni. Nakatampos aku ra matoi.”

⁴⁴Kon ru Raja' Saul riso, “Polosoo' noyo ra aku ukumin ri Aki Kapuuno' amon ru okou kalo ukumin ra matoi, Jonatan!”

⁴⁵Kaa' indagu mamagun ra Raja' Saul, “Musiti' kia ukumin i Jonatan ra matoi? Sala' ka kia io nokoowot ra kamanangan ondo' maayo ti? Binantu' mai ralalom inggalan ru TUHAN ondo' naayag, santiis ra abuk ri Jonatan no pana kalo kulawon! Mabaya' ra indangan ru TUHAN, nokoowot io ra kamanangan ra orou raiti'.” Koon raginio noyo mamagun namayag ri Jonatan intor ra ukuman matoi.

⁴⁶Kopongo raginio, Raja' Saul liminonggo' nangilou ra ulun ru Palistin. Ulun ru Palistin pana minuli' ra namagunan nilono.

⁴⁷Kopongo raginio Raja' Saul nasauk ra raja' ru ulun ru Israil, nangayou io ra ngaangai' pantula' nano ra ati-ati intok: Ulun ru Moab, Amon am Idom; raja' ru pagun Joba am ulun ru Palistin. Ati ayuk intok ru Raja' Saul mangayou, masalok io mamanang.[44]

⁴⁸Nangayou Raja' Saul ra baani toojo, ulun ru Amalik pana kinala no; napalabus Raja' Saul ra Israil intor ra ulun mantakou.

⁴⁹Anak ungkuyon ru Raja' Saul iono i Jonatan, i Jiswi am i Malkisua. Anak ruandu' ra katuaan ru Raja' Saul makainggalan ri Mirab, am anak ruandu' ra karuo no makainggalan ri Mikgal.

⁵⁰Andu' ru Raja' Saul iono i Aginoam anak ri Agimaas; panglima saujor ru Raja' Saul iono pantukir nano, i Abnir anak ri Nir. I Nir no kamaman ru Raja' Saul.

⁵¹I Kis, ama' ru Raja' Saul am i Nir, ama' ri Abnir, iono anak ilo ri Abiil.

⁵²Buoi ra bayag ru Raja' Saul, nangayou io toojo ra ulun ru Palistin. Ginio ra paat ayuk makakito io ra ulun ondo' maikang kapoam baani, pulali' no mapasauk ra ulun no ra saujor nano.