Read Timugon Murut 1 SAMUIL 15 Bible Online

1 SAMUIL 15 - Timugon Murut bible

1 SAMUIL 15

¹Sangarawan raginio indagu i Samuil ra Raja' Saul, “Nanusub noyo TUHAN no raki' koson mampili' rirun masauk ra raja' ru ulun Nano Israil. Raino rongogo' noyo ragu ru TUHAN Ondo' Maayo Kaga' Kuasa'.

²Mangukum Io ra ulun ru Amalik sabap ra kinamatuaan nilai minanggal ra ulun ru Israil paat ra ulun ru Israil minatong intor ra Misir.

³Ongoyo' min bulunsaro' ulun ru Amalik, pusoo' min ilo am umoko' min ngaangai' ondo' soroi risilo no. Pai' min tatango' rondo' pana. Potoyo' min ngaangai' ungkuyon, ruandu', lalaing borok, lalagang, sapi', domba, unta am kaladai.”

⁴Raja' Saul pana nanimung boo ra saujor nano am inuntob no ilo giu' ra Tilaim; mokoondo' ruo ngaatus ngaribu ngaulun saujor intor ra Israil am mopor ngaribu ngaulun saujor intor ra Jiuda.

⁵Kopongo raginio nagibit Raja' Saul ra saujor no minongoi ra bandar ru ulun ru Amalik, am nagawang ra pantula' giu' ra lonor ru sungoi ondo' mapua'.

⁶Nangirim Raja' Saul ra ragu papakaraan ra ulun ru Kini, “Ugar kano am iruani' min ulun ru Amalik, maa' raginio kalo mapatoi kau mababaya' risilo. Ragili kinamatuaan mini moonsoi ra ulun ru Israil, paat ra ulun ru Israil minatong intor ra Misir.” Ulun ru Kini pana nangiruan boo ra intok raginio.

⁷Kopongo raginio nangayou Raja' Saul ra ulun ru Amalik am nangala risilo. Nangayou io giu' ra galur ru ralan, intor ra Gawila saboi ra Syur giu' ra tampilon sirangon ru Misir.

⁸Rinakop ru Raja' Saul no Raja' Agag, raja' ru ulun ru Amalik, am namatoi ra ngaangai' ulun ru Amalik,

⁹kaa' Raja' Saul am ulun nano kalo namatoi ra Raja' Agag. Kalo niayuk pinatoi nilo domba am sapi' ondo' molomok kaga', anak ru sapi' am anak ru domba ondo' molomok kaga', am ngaangai' ru ondo' mokologo; pinuso nilo ayuk ondo' kolondo' onong am kolondo' logo.

¹⁰Indagu TUHAN ri Samuil,

¹¹“Pansagulian aku nampili' ri Saul nasauk ra raja'. Tinalikuran no Aku am kalo boo gumagaya' ra susuban Kuno.” Siminangit i Samuil, am nosorondom io nakimasi' ra TUHAN.

¹²Katawang ra suabon no ra iosusuab ayuk poyo, inuyum ri Samuil no Raja' Saul. Norongog ri Samuil ra minugar noyo Raja' Saul minongoi ra bandar Karmil koson manirong ra batu pangkaraan ra tayar nano galama' ra giu' no. Kopongo raginio narampus Raja' Saul minongoi ra Gilgal.

¹³Pakatuum i Samuil ra Raja' Saul, kon ru Raja' Saul riso, “Gama' ru mambarakat TUHAN ri Samuil. Sinugut ku noyo susuban ru TUHAN.”

¹⁴Nangkuot i Samuil riso, “Amon ru kon raginio, kua norongog ku bolos ru sapi' mampangaa' am domba mampagala'?”

¹⁵Taam Raja' Saul, “Ulun-ulun kuno nanalingaau ra bibiag tinambiag no intor ra ulun ru Amalik. Domba am sapi' ondo' molomok kaga' inalap noyo ru ulun-ulun kuno koson pataakon ra tayar ru taak simbalui ra TUHAN, i Aki Kapuuno' muno. Kaa' bibiag ra bokon no pinuso mai noyo lingono'.”[45]

¹⁶Korongog baal raginio indagu i Samuil, “Pai' poyo, rongogo' noyo ragu ru TUHAN ondo' pinasaboi Nano raki' ra rondom i.” Taam i Samuil, “Raguo' noyo.”

¹⁷Kon ri Samuil, “Sala' ka kia okou no nasauk ra tingganai ru ngaangai' bansa' ru Israil, kabalu' pana mangkara' kou ra kalo maatang kou? Nampili' noyo TUHAN no rirun nasauk ra raja' ru Israil,

¹⁸am nanusub Io noyo rirun koson namatoi ra ulun ru Amalik ondo' malaat. Okou sinusub No mangayou manggal risilo saboi pinatoi ilo ngaangai'.

¹⁹Kua kia boo rirun ti kalo giminagaya' Riso? Kua kia agou-agou kou nanalingaau ra rapu' nilono am nambaal ra ondo' kalo kasagain ru TUHAN?”

²⁰Taam Raja' Saul, “Ginagaya' ku noyo susuban ru TUHAN, am minongoi pangayou sumugut ra susuban Nano; Raja' Agag, raja' ru Amalik rinakop ku noyo am ngaangai' ulun ru Amalik pinatoi.

²¹Kaa' ulun-ulun kuno kalo namatoi ra ngaangai' bibiag tinambiag; pinili' nilo noyo domba am sapi' ondo' molomok kaga', am nagibit ra ngaangai' no giu' ra Gilgal koson pataakon ra tayar ru taak simbalui ra TUHAN, i Aki Kapuuno' muno.”

²²Indagu i Samuil, “Ati kia ondo' kasagain poyo ru TUHAN, gagaya' kapoam taak am taak simbalui? Moonsoi poyo gumagaya' ra TUHAN intor ra mapataak Riso ra domba ondo' molomok kaga' no.

²³Gumuor ra TUHAN nogondo' laat no ra mambaal ra sihir, am guang ra malilimbau nogondo' laat no ra sumamba ra sinungkalalaing. Ginio sabap ra okou nangimpai ra susuban ru TUHAN, TUHAN pana nangimpai rirun koson ra raja'.”

²⁴Korongog ragu-ragu no indagu Raja' Saul ri Samuil, “Topot makatula aku noyo ra maayo. Minanggal aku noyo ra susuban ru TUHAN am napalilian ra bilin muli. Malaa' aku ra ulun-ulun kuno, am iniou ku kinitaak nilo.

²⁵Kaa' raino makitaak aku ra ampunon tula kuno, am baya' no raki' sumaguli' ra Gilgal, maa' raginio makasambayang aku ra TUHAN.”

²⁶Kaa' taam i Samuil, “Kalo masaga' aku maya' rirun. Nangimpai kou noyo ra susuban ru TUHAN, am raino nangimpai Io rirun koson raja' ru Israil.”

²⁷Kopongo raginio likar i Samuil ra mugar, kaa' Raja' Saul nanginga' riso ra ginuut no sukub nano, saboi narilak sukub no.

²⁸Ginio ra kon ri Samuil ra Raja' Saul, “Paat ra orou raiti' niayuk rinilak noyo ru TUHAN no pamarintaan ru Israil intor rirun am pinataak ginio ra ulun ra bokon ondo' moonsoi poyo intor rirun.

²⁹I Aki Kapuuno' ondo' matulai, i Aki Kapuuno' ru Israil no kalo nagabau am kalo nangulau ra ginuang Nano, sabap ra Io sala' ka ulun.”

³⁰Taam Raja' Saul, “Makatula aku noyo. Kaa' pangindangan no, baya' no raki' sumaguli' maa' raginio makasambayang aku ra TUHAN, i Aki Kapuuno' muno. Kon raginio ra okou mangurumat raki' ra saang ru tingganai-tingganai ru mamagun am ngaangai' ulun ru Israil.”

³¹Ginio ra i Samuil minaya' ra Raja' Saul siminaguli' ra Gilgal, am Raja' Saul no siminambayang ra TUHAN.

³²Kopongo raginio nanaak i Samuil ra susuban, “Ibito' min Raja' Agag no ragiti.” Raja' Agag no pinauma' riso, am nonontol Raja' Agag ra nalaa' sabap indoson no, “Mapara' boo kinapait ru kapatayan.”[46]

³³Kon boo ri Samuil, “Koson ra ilang muno nangkinibit noyo ra masuang ina' naluusan ra anak, kon raginio niayuk ra ina' muno maluusan ra anak nano.” Puputulo' boo ri Samuil no Raja' Agag giu' ra saang ru altar giu' ra Gilgal.

³⁴I Samuil pana minuli' boo ra Rama am Raja' Saul minuli' ra baloi nano giu' ra Gibia.

³⁵Polos ra pupus ru bayag nano, kalo boo igondo' i Samuil timinuum ra Raja' Saul, kaa' nangiluk guang ri Samuil sabap ra pansagulian TUHAN nampili' ra Raja' Saul nasauk ra raja' ru Israil.