Read Timugon Murut 1 SAMUIL 19 Bible Online

1 SAMUIL 19 - Timugon Murut bible

1 SAMUIL 19

¹Nambala' Raja' Saul ri Jonatan, anak ungkuyon nano am ngaangai' ru pagawai nano ra nangatang io koson mamatoi[50] ri Daut. Kaa' motogom kaga' i Jonatan no ri Daut,

²am indagu io ri Daut, “Ama' kuno mirot mamatoi rirun. Ilalain ra susuab no. Pansibuni no ra rondo' intok moopot am ayan no ra giu' no.

³Mongoi aku ra padang mabaya' ra ama' kuno am migor mamaar ra intok pansibunian muno. Raguin ku boo io intor ra kuayan nano rirun. Amon ru mapandayan ku, mambala' aku rirun.”

⁴Rinagu ri Jonatan baal ri Daut ra mongoonsoi no ra Raja' Saul, kono, “Ama', pai' jamari' i Daut, ulipon muno. Kalo nambaal io ra kasalaan ru atan pana rirun; kaa' masuang noyo indangan nano rirun.

⁵Pinataak no painawo nano paat io namatoi ri Goliat, am nanaak TUHAN no ra kamanangan ondo' maayo ra Israil. Okou galama' nakatainu raginio, am naansukan kou paat ragili. Kua kia raino masaga' kou mangimbolo' ra sangulun ondo' kolondo' sala, am masaga' mamatoi ri Daut ra kolondo' sasaban?”

⁶Nalimanan ru Raja' Saul no nalupus nokorongog ra ragu ri Jonatan no, am nagibot io ralalom inggalan ru TUHAN ra kalo mamatoi io ri Daut.

⁷Kopongo raginio nampiau i Jonatan ri Daut am nambala' riso ra ngaangai' sinunur ra raitii' ni. Ibito' boo ri Jonatan i Daut ra Raja' Saul, am nangandoi i Daut ra Raja' Saul koson ragili.

⁸Kopongo raginio nasauk saguli' pangayawan ra ulun ru Palistin. Binulunsar am kinala ri Daut ulun ru Palistin liningon saboi ra ilo nagigiru'.

⁹Sangarawan raginio tatanga' Raja' Saul nanturung liliwa' nampaguut ra tutura' giu' ra baloi. Pulali' ru Raja' Saul no sinubol poyo ru ambiluo malaat ondo' sinusub ru TUHAN. Paat raginio soroi i Daut ra giu' no am tatanga' nangkuli ra jitor nano.

¹⁰Nangkinam Raja' Saul mapatura' ra tutura' nano ri Daut ondo' soroi mamaar ra rinding, kaa' nailiu ri Daut, saboi tutura' no nakatujok ra rinding. Nagiru' i Daut koson mamayag ra inan.

¹¹Rondom raginio niayuk, nanusub Raja' Saul ra kukula' ngaulun minongoi ra baloi ri Daut koson mansigo ri Daut, am mamatoi riso ra tampilon ra susuab no. Kaa' i Mikgal, andu' ri Daut, nambala' riso, “Amon ru kalo magiru' kou ra rondom no niayuk, susuab no maaru' potoyon kou.”

¹²I Mikgal nampatuun ri Daut intor ra gigimpalan am nagiru' i Daut intor ra intok raginio.

¹³I Mikgal pana nangalap ra sinungkalalaing ru baloi nano am pinabanta' no ra intok pambalangan ri Daut. Pinabanta' no niayuk bantal ondo' binaal intor ra bulu ru kambing ra ragana' ru ulu ru sinungkalalaing no, am kinuluput no ra bajang.

¹⁴Paat ra ulun-ulun ri Raja' Saul minatong koson mamparakop ri Daut, indagu i Mikgal, “Marualan i Daut no.”

¹⁵Kaa' nanusub Raja' Saul no risilo mongoi poyo ra giu' no koson magilong ri Daut ra mato nilo galama'. Nanusub io, “Ibito' min io ragiti pabayaan ra intok pambalangan nano, maa' raginio mapatoi ku io.”

¹⁶Minumpos ilo ra lamin am kakito nilo sinungkalalaing ondo' pinabanta' ra intok pambalangan am bantal intor ra bulu ru kambing giu' ra ragana' ru ulu nano.

¹⁷Pangkuot Raja' Saul ri Mikgal, “Kua ruungo' mu aku koson ragitio? Nangindangan kou ra pantula' kuno nagiru'!” Taam i Mikgal, “Linolob no aku koson mamatoi raki' amon ru kalo inindangan ku io nagiru'.”

¹⁸Nagiru' i Daut am minongoi ri Samuil giu' ra Rama. Nambala' i Daut ri Samuil ra ngaangai' ondo' pinamakuan ru Raja' Saul no riso. Kopongo raginio i Daut am i Samuil minongoi ra Nayot am minayan ra giu'.

¹⁹Raja' Saul binalaan ra soroi i Daut giu' ra Nayot mamaar ra Rama.

²⁰Ginio ra nanusub Raja' Saul ra kukula' ngaulun minongoi ra giu' no koson mamparakop ri Daut. Giu' no nakito nilo[51] santimungan nabi tatanga' lumigo' am nagagampan giminolok, am tiningganai ilo ri Samuil. Ulun-ulun sinusub ru Raja' Saul pana kinuasa' ru Ambiluo ri Aki Kapuuno', am ilo pana tumalimpuun lumigo' am gumolok.

²¹Pokorongog Raja' Saul ra tanou raginio, nangator io ra masuang poyo ulun-ulun ra bokon. Kaa' ilo pana tumalimpuun lumigo' am gumolok. Koson ra kaintalu no Raja' Saul nangator ra ulun, kaa' ilo pana koson niayuk raginio nasauk.

²²Ginio ra Raja' Saul galama' minongoi ra Rama. Pakasaboi io ra tulubong ondo' maayo giu' ra Siku, nangkuot io ra ati intok ri Samuil am i Daut. Ulun ra giu' no nambala' riso ra soroi ilo giu' ra Nayot.

²³Paat ra Raja' Saul mongoi ra giu' no, io niayuk kinuasa' ru Ambiluo ri Aki Kapuuno', saboi io lumigo' am gumolok ra galur ru pangkiralanan mongoi ra Nayot.

²⁴Pakasaboi ra giu' no, nangalus Raja' Saul ra bayang nano am liminigo' am giminolok ra saang ri Samuil. Kopongo raginio Raja' Saul liminuya' am nagibabaang ra nonsongorou am nosorondom. (Ginio noyo talimpuun no ra ulun mindagu, “Nabi niayuk kia i Saul no?”)