Read Timugon Murut 1 SAMUIL 25 Bible Online

1 SAMUIL 25 - Timugon Murut bible

1 SAMUIL 25

¹Kopongo raginio i Samuil minatoi. Ngaangai' ulun ru Israil timinimung am nanulaboi riso. Linobong nilo baangkai ri Samuil ra baloi nano giu' ra Rama. Kopongo raginio minongoi i Daut ra tana' kaagisan Paran.

²Giu' ra bandar Maon mokoondo' sangulun ungkuyon makainggalan ri Nabal, intor ra bansa' Kalib. Io ti mokoondo' ra tana' mamaar ra bandar Karmil. Io ti langkaya' kaga' am mokoondo' ra talu ngaribu ngainan domba am saribu ngainan kambing. I Abigail andu' nano, maligag am mantalur, kaa' i Nabal ti makuliga' am makapaliso ra malaat. Rondo paat raginio tatanga' i Nabal mopolompor ra bulu ru domba nano giu' ra Karmil.

⁴Paat raginio, soroi i Daut giu' ra tana' kaagisan, nokorongog ra baal raginio.

⁵Kopongo raginio nanusub i Daut ra mopor ngaulun buayoi minongoi ra Karmil. Nanusub io risilo tumuum ri Nabal am mampasaboi ra ragu kaansayan ri Daut no riso.

⁶Nanusub i Daut no risilo mindagu koson ragitio, “Nangator i Daut ra ragu kaansayan nano rirun am sasambaloi muno am niayuk ra ngaangai' longgom muno.

⁷Norongog ri Daut ra tatanga' kou mopolompor ra bulu ru domba muno. Kaala' no ra magagalung-magagalung muno ondo' soroi ra intok maino kalo igondo' mai taliojowo', am kalo igondo' ilo natatakan ra atan pana buoi soroi giu' ra Karmil.

⁸Kinami' noyo kuati' ilo ra baal raginio. Maaru' iowon nilo ginio. Ginio sabap ra malansan i Daut maa' raginio akai ti ulun nano apuon ra matanda' ra baloi muno, sabap ra minatong akai ra orou maayo ti. Pataaki' noyo atan ayuk maya' ra kasagaan muno ra ulipon-ulipon muti am niayuk ri Daut, rangan moonsoi muno.”

⁹Pakasaboi ulun-ulun ri Daut ra Karmil, pinasaboi nilo bilin ri Daut no ri Nabal, am naginaa ilo ra giu' no.

¹⁰Taam i Nabal, “I Daut? Osoi kia io? Osoi kia anak ri Isai no? Kalo poyo igondo' aku pakaining intor riso? Pupupus ti, mokoondo' masuang ulipon nagigiru' intor ra tingganai nangandayan nilono giti ra pagun ti!

¹¹Ati kulaan ku alapon ruti' am inumon kuno, am niayuk kual ondo' tinampos kuno ra tayar ru ulun mopolompor ra bulu ru domba-domba kuno, am pataakin ngaangai' no ra ulun ondo' tawa ati intor!”

¹²Ginio ra ulun-ulun ri Daut siminaguli' ri Daut am nambala' ra rinagu ri Nabal no riso.

¹³Nanusub i Daut, “Abilo' ilang mino ra awak min sigagama'!” Nataki' ulun-ulun ri Daut giminagaya' ra susuban nano. Inabil niayuk ri Daut ilang nano ra awak nano am minugar nabaya' ra olo'-olo' apat ngaatus ngaulun, am ruo ngaatus ngaulun ra bokon timinatang koson magalung ra kuliamos-kuliamos.

¹⁴Liliwa' raginio sangulun ra mangngandoi ri Nabal minindagu ri Abigail, andu' ri Nabal, “Nokorongog kono kia ra baal ondo' nasauk? Nanusub i Daut ra kukula' ngaulun intor ra tana' kaagisan koson mampasaboi ra ragu kaansayan ra tuan takano. Kaa' tuan takano nagasab risilo,

¹⁵ali ka moonsoi ilo kaga' ramon am kalo igondo' panaliajou ramon. Paat ra akai nababaya' risilo giu' ra tana' kaagisan, kolondo' rondo' pana ra longgom maino tinakou.

¹⁶Nangampin ilo ramon ra matawang am rondom ti buoi akai nagalung ra domba mamaar risilo.

¹⁷Ginio ra karaa' toojo atan ondo' musiti' baalon! Baal ragitio maaru' maparatong ra baal makalalaa' ra tuan takano am ngaangai' ru sasambaloi nano. Tuan takano bambalingatan kaga' saboi marara' mangkirongog ra bilin ru osoi pana!”

¹⁸Nataki' i Abigail nangalap ra 200 ruti', ruo ngakantungan ru kungkung ondo' napanu' ra wain, limo ngainan domba pinanggang, 17 ngakilogram unor-unor ondo' sininggala', 100 ngantiis kismis am 200 kuui ara. Pinasakoi no ngaangai' no ra kukula' ngainan kaladai.

¹⁹Io pana mindagu boo ra ulipon-ulipon nano, “Ugar kano pagulu. Sumunu' aku.” Kaa' kalo nambala' io ra baal raginio ra ralaki nano.

²⁰Kopongo raginio nangura' i Abigail ra kaladai nano. Pakasaboi io ra lilikowon giu' ra igig ru gunung, nakapaguma' io ri Daut am ulun-ulun nano ondo' tatanga' mambusul sumuku' riso.

²¹Paat raginio tatanga' i Daut nangkara', “Banangan ku nanindung ra longgom ru ulun no giu' ra tana' kaagisan! Kolondo' rondo' pana ra longgom nano tinakou ru ulun, am raino nambalos io ra kinoonsoi kuno ra kalaatan.

²²Polosoon noyo i Aki Kapuuno' no mamatoi raki'[62] amon ru kalo mamatoi aku ra moonong ungkuyon ra giu' no ra kalo poyo makasirang mato ru orou!”

²³Pakakito i Abigail ri Daut, nagindibok io tuun intor ra kaladai nano am samba

²⁴ra kalayam ri Daut. Kon ri Abigail, “Tuan, kasaga' noyo mangkirongog ra ragu kutu. Polosoon noyo kasalaan no saanin ku galama'!

²⁵Pai' noyo lioo' i Nabal no, ulun ondo' kolondo' onong no. Sala ka kia inggalan nano galama' arati' no sasambungon?[63] Kalio aku ra giu' i paat ra ulun-ulun sinusub muno nakasaboi.

²⁶TUHAN nanginggalar noyo rirun ra mansuli' am mamatoi ra pantula' muno. Raino magibot aku ralalom inggalan ru TUHAN ondo' naayag ra pantula' muno am ngaangai' ru ulun ondo' masaga' lumaat rirun ukumin koson ri Nabal.

²⁷Apuo' noyo tinaakan ondo' inibit kutu rirun am ulun-ulun muno.

²⁸Ampuno' noyo kasalaan kutu. Maaru' TUHAN no mapasauk rirun am papag muno raja' ru Israil, sabap ra nangayou kou ra tayar ru TUHAN; kalo mambaal kou ra atan pana kalaatan[64] ra buoi ru bayag muno.

²⁹Amon ru mokoondo' sasangulun ondo' mamulunsar rirun am kuminam mamatoi rirun, maaru' TUHAN i Aki Kapuuno' no mangampin rirun koson ra sangulun magalung ra rapu' nano ondo' mologo kaga'. Kaa' pantula' muno papatiron ru TUHAN ra maalur, koson ra batu ondo' pinobobol ra lasitik.

³⁰Mambaal TUHAN ra ngaangai' moonsoi ondo' binantu' Nano rirun, am kalo boo mabuoi okou pasaukon No ra raja' ru Israil.

³¹Paat raginio makara' mu ra kalo namatoi kou ra kolondo' sasaban kapoam mansuli'. Ginio ra okou kalo pana mangiluk guang kapoam pansagulian guang. Paat ra TUHAN no mambarakat rirun ra tauli no, pai' liliani' ulipon muti.”

³²I Daut pana mindagu boo riso, “Koompor noyo TUHAN, i Aki Kapuuno' ru ulun ru Israil, ondo' nanusub noyo rirun mongoi raki' ra orou raiti'!

³³Maringkuanang aku sabap ra kapintaran muno. Binaal muno ra orou raiti' nanginggalar raki' ra mamatoi koson mansuli'.

³⁴Nanginga' noyo TUHAN no raki' lumaat rirun. Ralalom inggalan ru TUHAN, i Aki Kapuuno' ru Israil ondo' naayag, amon ru kalo nataki' kou nakatuum raki', maaru' ra ngaangai' ulun ri Nabal no minatoi paat ra sumirang mato ru orou!”

³⁵Inapu ri Daut tinaakan ri Abigail, am kono boo riso, “Uli' no am pai' kaimamang. Suguton ku kitaakon muno.”

³⁶Paat ri Abigail minuli' ri Nabal, mokoondo' bunsag maayo giu' ra baloi nano, koson ra bunsag ru raja'. Sabap ra nagauk i Nabal am maansukan, kalo nambala' i Abigail ra atan pana riso saboi ra suabon no.

³⁷Suabon no ra iosusuab, paat ra natabinaasan i Nabal, nantunung i Abigail ra ngaangai' no ri Nabal. Namulali' i Nabal no narualan ra pusu' saboi ngaangai' ru inan nano minatoi.

³⁸Olo'-olo' mopor ngoorou buoi no, binutus ru TUHAN painawo ri Nabal.

³⁹Pokorongog i Daut ra minatoi noyo i Nabal, indagu io, “Koompor noyo TUHAN! Binalasan No noyo i Nabal sabap ra pagasaban nali raki'. Nanginggalar noyo TUHAN no raki', ulipon Nati intor ra mambaal ra kalaatan. TUHAN galama' nangukum noyo ri Nabal sabap ra kalaatan nano.” Kopongo raginio nangator i Daut ra ulun mongoi ri Abigail koson manambili' riso masauk ra andu' nano.

⁴⁰Ulun-ulun sinusub ri Daut timinuum ra ruandu' no giu' ra Karmil, am indagu riso, “Sinusub akai ri Daut tumuum rirun, sabap ra makaguang io manangandu' rirun.”

⁴¹Ingkakat i Abigail am igulatur am indagu, “Aku ti ulipon ri Daut. Nakatampos aku no mambagu' ra kalayam ru ulipon-ulipon nano.”

⁴²Kopongo raginio tampos io ra mataki', am nangura' ra kaladai nano. Binaya' io ru limo ngaulun ulipon nano, ugar io nabaya' ra ulun-ulun sinusub ri Daut. Kon raginio noyo i Abigail nasauk ra andu' ri Daut.

⁴³Ra buoi ti i Daut nanangandu' ri Aginoam intor ra Jijriil. Raino ti i Abigail niayuk nasauk ra andu' ri Daut.

⁴⁴Liliwa' raginio pinaanduan ru Raja' Saul i Mikgal anak ruandu' nano, iono andu' ri Daut, ri Palti anak ri Lais intor ra bandar Galim.