Read Timugon Murut 1 SAMUIL 26 Bible Online

1 SAMUIL 26 - Timugon Murut bible

1 SAMUIL 26

¹Sangarawan raginio kukula' ngaulun intor ra Jiip timinuum ra Raja' Saul giu' ra Gibia. Nambala' ilo ra Raja' Saul ra nansibuni i Daut giu' ra Bulur Gakila, giu' ra igig ru tana' kaagisan Jiuda.

²Nagindibok Raja' Saul minugar minongoi ra tana' kaagisan Jiip nabaya' ra talu ngaribu ngaulun saujor ondo' moonsoi kaga' koson maguyum ri Daut.

³Raja' Saul am pulalai nano nangkim ra kiing ru ralan giu' ra Bulur Gakila. Paat raginio i Daut no lakat poyo soroi giu' ra tana' kaagisan no, am norongog no ra nakaratong noyo Raja' Saul naguyum riso giu' ra tana' kaagisan.

⁴Ginio ra nangator io ra kukula' ngaulun pansigo. Binalaan io boo ra motopot Raja' Saul soroi ra giu' no.

⁵Nagindibok i Daut minongoi ra pangkiman ru Raja' Saul, am kakito no ra kim kaalangan ru Raja' Saul no mamaar ri Abnir anak ri Nir, panglima ru saujor. Kim ru Raja' Saul no nakaayan tatanga' am saujor-saujor nano nangkim ra liput no.

⁶I Daut pana nangkuot boo ri Agimilik ulun ru Git no, am ri Abisai pabukat ri Joab, (ina' nilono iono i Jiruya), “Osoi ondo' baani mumpos ra pangkiman ru Raja' Saul no mabaya' raki'?” Taam i Abisai, “Aku.”

⁷Paat ra rondom raginio i Daut am i Abisai simininok umpos ra pangkiman ru Raja' Saul, am nakakito ra Raja' Saul tatanga' nombolong giu' ra tanga' ru pangkiman. Tutura' ru Raja' Saul no paritansok ra tana' mamaar ra ulu nano. I Abnir am pulalai nano nombolong giu' ra liput ru Raja' Saul.

⁸Kon ri Abisai no ri Daut, “Pinataak noyo ri Aki Kapuuno' no pantula' muno rirun ra rondom raiti'. Iowo' aku ti mapatura' ra tutura' nano galama' ra inan nano saboi makaujak ra tana'. Aku ondo' mamatoi riso ra igondo' tura' ayuk, kalo pana saboi induo!”

⁹Kaa' indagu i Daut, “Pai' mu jamari' io! Maaru' TUHAN no mangukum ra ulun ondo' lumaat ra raja' ondo' pinili' Nano.

¹⁰Ralalom inggalan ru TUHAN ondo' naayag, aku nakapandai ra TUHAN galama' ondo' mamatoi ra Raja' Saul, iou lair ru matoi ra kaindalaman paat ra pupus ru bayag nano nasaboi noyo, kapoam kinibit ru pangayawan.

¹¹Gama' ayuk ru manginggalar TUHAN no raki' mamatoi ra raja' ondo' pinili' Nano! Alapo' to tutura' am rarapu' nano ayuk, am ugar intor ragiti!”

¹²Ginio ra inalap ri Daut tutura' am rarapu' ru Raja' Saul ondo' pinabanta' ra sapapa' ru ulu nano, am ugar ilo. Kolondo' sangulun pana nakakito ra baal raginio kapoam nakapandai ra atan ondo' nasauk no, kapoam nakarat, sabap ra TUHAN nangkinibit risilo ngaangai' no nakalunus toojo.

¹³Kopongo raginio simindaup i Daut ra limayak no minongoi ra igig ra bokon am nagaloi ra tampak ru bulur, saboi sama' galur intor ra pangkiman ru Raja' Saul.

¹⁴Kopongo raginio giminolok i Daut no ri Abnir am saujor ru Raja' Saul, “Okou Abnir, mokorongog kou kia ra bolos kutu?” Nangkuot i Abnir, “Osoi kia okou ondo' gumolok-golok no am mapakarat ra raja'?”

¹⁵Taam i Daut, “Okou Abnir, sala' ka kia okou alia ulun ondo' kauligan kaga' giu' ra titikop ru Israil? Kua kalo inampin mu raja' muno? Bagu ayuk mokoondo' ulun minumpos ra pangkiman koson mamatoi ra tuan muno.

¹⁶Kaa' kalo pinaugar mu kandoi. Magibot aku ralalom inggalan ru TUHAN ondo' naayag, okou Abnir, ra akau ngaangai' no kalo maaya' maayag. Kalo inampin min tuan mino ondo' pinasauk ru TUHAN ra raja'. Ilai' noyo! Ati boo tutura' ru raja'? Ati boo nua' rarapu' ondo' pinabanta' ra sapapa' ru ulu nano?”

¹⁷Nauligan ru Raja' Saul bolos ri Daut, am nangkuot io, “Daut, okou kia ginio, alii ra anak kuno?” Taam i Daut, “Iou, raja' kuno.”

¹⁸Indagu poyo i Daut, “Kua kia lakat kou poyo mangilou ra ulipon muti? Atan kia boo binaal kutu? Atan kia boo kasalaan kutu?

¹⁹Raja' kuno, rongogo' ragu kutu. Amon ru TUHAN no nanusub rirun maa' raginio gumula' raki', rondo' taak ru taak simbalui makasalui ra sangit Nano raki'. Kaa' amon ru ondo' nanusub rirun no ulun, gama' ru ulason ilo ru TUHAN! Kinibit ru binaal nilono, aku ti pinagiru' noyo intor ra tana' longgom ru TUHAN am minugar kalalaat minongoi ra pagun ra bokon. Giu' no musiti' aku sumambayang ra dewa-dewa ru ulun bansa' ru bokon.

²⁰Pai' polosoo' ra aku ti matoi giu' ra pagun ru ulun, maalur intor ra TUHAN. Kua kia ra raja' Israil masaga' mamatoi raki' ondo' inasaban nogondo' ra kutu ti? Kua kia masaga' kou mangilou raki' koson ra ulun mangilou ra tombokou?”

²¹Taam Raja' Saul, “Sotopot no makatula noyo aku ti. Saguli' no, alii ri Daut anak kuno! Kalo boo lumaat aku rirun. Rondom i pinoloso mu aku naayag. Sasambungon aku kaga'! Binaal kuti jajajou kaga'!”

²²Indagu i Daut, “Gitio noyo tutura' mutu. Susubo' noyo sangulun ra saujor muno matong pangalap ragitio.

²³TUHAN masalok mambarakat ra ulun ondo' gumagaya' am mabanis guang. Kabalu' pana ra orou raiti' okou pinataak No noyo raki', kaa' kalo lumaat aku rirun, raja' ondo' pinili' noyo ru TUHAN.

²⁴Koson ra aku nopoloso rirun naayag, gama' ru TUHAN niayuk mopoloso rirun maayag am mapalabus rirun intor ra ngaangai' kapaganan!”

²⁵Indagu Raja' Saul no ri Daut, “I Aki Kapuuno' mambarakat rirun, alii ra anak kuno! Makasugut kou ra ralalom ru ngaangai' pirot muno!” Kopongo raginio rinayus ri Daut pangkiralanan nano, am Raja' Saul minuli' ra baloi.