Read Timugon Murut 1 SAMUIL 27 Bible Online

1 SAMUIL 27 - Timugon Murut bible

1 SAMUIL 27

¹Nangkara' i Daut, “Atan pana kulaan niayuk, rondo' orou no Raja' Saul no mamatoi raki'. Moonsoi poyo magiru' aku giu' ra pagun ru ulun ru Palistin. Mopongo raginio Raja' Saul no kalo boo maguyum raki' giu' ra Israil, am aku pana mamimio.”

²Ginio ra i Daut am onom ngaatus ngaulun ulun nano nagindibok minugar koson tumuum ra Raja' Akis anak ri Maok, raja' ru bandar Gat.

³I Daut am ulun-ulun nano minayan giu' ra Gat nababaya' ra sasambaloi ru sigagama'. Karuruo ngaulun andu' ri Daut, i Aginoam intor ra bandar Jijriil, am i Abigail, napuor ri Nabal intor ra Karmil, niayuk minaya' riso.

⁴Pokorongog Raja' Saul ra nagiru' noyo i Daut ra Gat, kalo boo minirot io mamparakop riso.

⁵Kopongo raginio rinagu ri Daut ginuang nano ra Raja' Akis, “Amon ru maansayan kou raki', anii' aku ra rondo' bandar boborok giu' ra asak koson intok ayanan, maa' raginio aku ti kalo sumimpung rirun ra pusor bandar ti.”

⁶Ginio ra pinataak ru Raja' Akis no bandar Jiklag ri Daut. Intor raginio noyo Jiklag no nasauk ra longgom ru raja'-raja' ru Jiuda.

⁷Minayan i Daut ra pagun ru ulun ru Palistin buoi sambilor am apat ngansila'.

⁸Buoi raginio, i Daut am ulun-ulun nano naindalom mamulunsar ra ulun ru Gisur, Girji am Amalik; nabuoi ilo noyo minayan ra intok raginio. Sinubol ri Daut intok nilono saboi ra Sur, am rayus ra Misir tampilon ra rabugus.

⁹Pinatoi ri Daut ngaangai' ungkuyon am ruandu', am niayuk nanalingaau ra ngaangai' domba, sapi', kaladai, unta am bayang niayuk. Kopongo raginio minuli' io am minuma' ra Raja' Akis.

¹⁰Paat ra Raja' Akis nangkuot riso, “Ati intok sinubol mu ra raino ti?” Taamon ri Daut ra minongoi io noyo ra tampilon rabugus ru Jiuda kapoam giu' ra wilayah ru ulun ru Jiragmiil kapoam giu' ra wilayah intok inayanan ru ulun ru Kiin.

¹¹Pinatoi ri Daut no ngaangai' ulun, ungkuyon am ruandu', maa' raginio kolondo' sangulun pana makasaguli' ra Gat koson mambala' ra atan ondo' sotopot no binaal ri Daut am ulun-ulun nano. Kon raginio noyo binaal ri Daut buoi io minayan giu' ra pagun ru ulun ru Palistin.

¹²Kaa' nangintopot toojo Raja' Akis ri Daut. Nangkara' Raja' Akis, “Kasisangin toojo i Daut ti ru bansa' nano galama', saboi nasauk io kalalaat ra ulipon kuno ra buoi ru bayag nano.”