Read Timugon Murut 1 SAMUIL 28 Bible Online

1 SAMUIL 28 - Timugon Murut bible

1 SAMUIL 28

¹Kopongo kukula' buoi, nanimung ulun ru Palistin ra saujor nilono koson mamulunsar ra Israil. Indagu Raja' Akis ri Daut, “Maaru' nakarati' kou ra okou am ulun-ulun muno musiti' sumaung raki'.”

²Taam i Daut, “Maaru', maagu no makito mu galama' ra atan ondo' baalon ru ulipon mutu.” Indagu Raja' Akis, “Iou noyo, pasaukon tokou ra magagalung raki' galama' ondo' mantilayun.”

³Minatoi noyo i Samuil am tinangian io ru ngaangai' ru ulun ru Israil, am linobong giu' ra Rama, bandar nano. Kukula' buoi ra nakasail no pinagiru' ru Raja' Saul ngaangai' mangngilong am mampiau ra ambiluo ru ulun minatoi intor ra Israil.

⁴Saujor ru Palistin timinimung am nangkim mamaar ra bandar Sunim. Nanimung Raja' Saul ra saujor ru Israil, am nangkim ilo giu' ra Gunung Gilboa.

⁵Pakakito Raja' Saul ra pulalai ru mangayou ru Palistin, nalaa' io kaga'.

⁶Nangkuot io ra TUHAN intor ra atan musiti' baalon nano. Kaa' TUHAN kalo timinaam, iou pana ra inupi, kapoam ra Urim am Tumim, kapoam ra pinabala' galing ra nabi.

⁷Ginio ra indagu Raja' Saul ra pagawai-pagawai nano, “Paguyum kano ra sangulun ruandu' mampiau ra ambiluo ru ulun minatoi. Masaga' aku tumuum riso koson makitulu'.” Taam ilo, “Giu' ra In-Dor mokoondo' sangulun mampiau ra ambiluo ru ulun minatoi.”

⁸Ginio ra siminalu Raja' Saul maa' raginio kalo mauligan ru ulun. Nambayang io ra bayang ra bokon. Binaya' ru ruo ngaulun ungkuyon, minugar Raja' Saul tampilon ra rondom. Nakasaboi ilo ra baloi ru ulun mampiau ra ambiluo ru ulun minatoi no, am indagu Raja' Saul, “Piawo' noyo ambiluo ru ulun ondo' sabiton ku inggalan nano, am kitaako' noyo maa' raginio manala' io ra atan boo ondo' masauk.”

⁹Taam ruandu' no, “Maaru' okou pana nakapandai ra jinajalan noyo ru Raja' Saul no ngaangai' mangngilong am mampiau ra ambiluo ru ulun minatoi koson mangiruan ra Israil.[65] Kua pangkinam kou mangurana' raki' saboi potoyon aku?”

¹⁰Kopongo raginio nagibot Raja' Saul, “Ralalom inggalan ru TUHAN ondo' naayag, nambantu' aku ra kalo potoyon kou sabap nambaal ra baal ragitio.”

¹¹Pangkuot ruandu' no, “Osoi ra ambiluo ondo' musiti' piawon ku ra tayar muno?” Taam Raja' Saul, “Ambiluo ri Samuil.”

¹²Pakakito ruandu' no ri Samuil, golok am indagu io ra Raja' Saul, “Kua ruungo' mu aku? Okou ti Raja' Saul!”

¹³Kon ru Raja' Saul riso, “Pai' kalaa'! Pambala' noyo ra atan ondo' nakito muno!” Kon ru ruandu' no, “Nakito ku ambiluo siminalula' intor ra tana' ti.”

¹⁴Kon poyo ru Raja' Saul, “Ati kulaan baal nano?” Taam ruandu' no, “Baal nano koson ra sangulun ungkuyon matutuo. Nansukub io.” Nalimanan ru Raja' Saul ra ginio noyo ambiluo ri Samuil, am samba io boo koson mangurumat riso.

¹⁵Kon ri Samuil ra Raja' Saul, “Kua ulisoo' mu aku am nampiau saguli' raki'?” Taam Raja' Saul, “Aku ti ralalom ru kapaganan maayo! Ulun-ulun ru Palistin mamulunsar raki', am i Aki Kapuuno' no nangiruan noyo raki'. Kalo boo tumaam Io raki', iou kia pinabala' galing ra nabi kapoam inupi. Ginio sabap ra aku nampiau rirun, maa' raginio mambala' kou raki' ra atan musiti' kuno baalon.”

¹⁶Kon ri Samuil, “Atan onong no ra okou mampiau raki' amon ru nangiruan noyo TUHAN no rirun, am nasauk ra pantula' muno?

¹⁷Nambaal noyo TUHAN ra atan ondo' rinagu Nali rirun pinabala' galing raki'. Nangalap noyo TUHAN no ra pamarintaan ru Israil intor rirun, am pinataak no ginio ri Daut.

¹⁸Kalo giminagaya' kou ra susuban ru TUHAN. Kalo linuus min ulun ru Amalik am ngaangai' ru longgom nilo. Ginio noyo sabap ra TUHAN nambaal ragitio rirun raino.

¹⁹Okou am ulun ru Israil pataakon No ra ulun ru Palistin. Susuab no okou am anak-anak ungkuyon muno maya' raki'; am niayuk saujor ru Israil pana pataakon ru TUHAN ra ulun ru Palistin.”

²⁰Paat raginio niayuk Raja' Saul nakaranga' ra tana' sabap ra nalaa' kaga' nokorongog ra ragu ri Samuil. Mulu' poyo ra malawo io kaga' sabap ra kalo nangakan ra atan pana songorou am sorondom.

²¹Mininggaar ruandu' no ra Raja' Saul am nakapandai ra magalabo io kaga'. Ginio ra kon ru ruandu' no riso, “Raja' kuno, pinataak ku noyo painawo koson manugut ra kitaakon muno.

²²Raino suguto' noyo kitaakon kutu. Akan no sanganu ra akanon ondo' pinasulung kutu maa' raginio marayusan mu pangkiralanan.”

²³Marara' Raja' Saul am minindagu ra marara' io mangakan. Kaa' pagawai-pagawai ru Raja' Saul pana nampajajal riso ra mangakan. Pupus no ginagaya' ru Raja' Saul; sukal io intor ra tana' am panturung ra intok pambalangan.

²⁴Nagindibok ruandu' no nanimbalui ra sanginan anak sapi' ondo' molomok. Io niayuk nangalap ra tapung am pongoono' ginio, am nangansak ra ruti' kalo linatakan ra ragi.

²⁵Nampasulung io ra akanon no ra Raja' Saul am pagawai-pagawai nano, am akan ilo boo. Kopongo raginio minugar ilo ra rondom raginio niayuk.