Read Timugon Murut 1 SAMUIL 29 Bible Online

1 SAMUIL 29 - Timugon Murut bible

1 SAMUIL 29

¹Nanimung ulun ru Palistin ra ngaangai' saujor nilono giu' ra Apik, am ulun ru Israil nangkim mamaar ra taur ru timug giu' ra Limayak Jijriil.

²Limo ngaulun raja' ru Palistin baris ra minugar nababaya' ra pulalai-pulalai intor ra maatus ngaribu am saribu ngaulun. I Daut am ulun-ulun nano baris ra tinaulian nababaya' ra Raja' Akis.

³Pakakito panglima ru ulun ru Palistin ri Daut am ulun-ulun nano, pangkuot ilo, “Kua ra ngaangai' ru ulun ru Ibrani ti soroi ragiti?” Taam Raja' Akis, “Gitio i Daut, ondo' ragili pagawai ru Raja' Saul intor ra Israil. Lalair io noyo minayan raki'. Intor ra io minatong raki' saboi ra orou raiti', kalo igondo' ku io karampati' ra makasala.”

⁴Kaa' panglima-panglima ru Palistin siminangit ra Raja' Akis. Konilo riso, “Susubo' io muli' ra bandar ondo' tinaakan muno riso. Pai' io paayaa' ritakau mongoi pangayou. Kolondo' makapandai ra paat ra pangayawan ra maagu no, manumbalik io ritakau. Sala' ka kia ginio kaluagan ra moonsoi kaga' riso koson mangambi' ra guang ru raja' nano ra mamatoi ra ulun takati?

⁵Io no i Daut, am ra tayar nano noyo ruandu'-ruandu' ragili liminigo liliwa' narimbai ragitio, ‘Raja' Saul namatoi ra riribu ngaulun pantula', kaa' i Daut namatoi ra opor-opor ngaribu ngaulun pantula'.’ ”

⁶Nampiau Raja' Akis ri Daut am indagu riso, “Nagibot aku ra sabap ra TUHAN ondo' naayag, ondo' sambaan ru Israil ra gumagaya' kou raki'. Masaga' aku ra okou maya' raki' mongoi ra pangayawan ti sabap ra intor ra okou minatong raki', kalo igondo' kou makasala raki'. Kaa' raja'-raja' ra bokon kalo masaga' rirun.

⁷Ginio ra uli' no ra kaansayan am pai' pambaal ra rondo' ondo' makatabual ra sangit ru raja'-raja' no.”

⁸Taam i Daut, “Atan kia kasalaan kutu? Rinagu mu ra intor ra aku minatong rirun, kalo igondo' aku ti makasala rirun. Amon ru koson raginio, kua kia kalo mokoongoi aku pangayou manggal ra pantula'-pantula' muno?”

⁹Taam Raja' Akis, “Nakapandai kou ra aku ti mangkara' rirun ra gumagaya' koson ra malaikat ri Aki Kapuuno'. Kaa' raja'-raja' ra bokon no namatas noyo ra kalo makaaya' kou ramon mongoi pangayou.

¹⁰Ginio ra susuab no, akau ngaangai' no ondo' nangiruan noyo ra Raja' Saul am minatong raki', moonsoi rumondom kau kumarat ra susuab ti am mataki' mugar ra kalo poyo sumirang mato ru orou.”

¹¹Ginio ra i Daut am ulun-ulun nano riminondom minugar ra suabon no, am minuli' ra pagun ru Palistin. Saujor-saujor ru Palistin naparayus ra pangkiralanan nilo minongoi ra Jijriil.